போலி மோதல் கொலைகள் மற்றும் குஜராத், மோடி


மீண்டும் குஜராத் போலி மோதல் கொலைகள் இந்திய ஊடகங்களில் வலம் வருகிறது. ஒரு அலையைப் போல் சில நாட்கள் பேசப்படுவதும், அடங்கிவிடுவதும் பின் வேறொரு நாளில் மீண்டும் எழுவதும் என இதன் ஏற்றவற்றங்களினால் பெறப்படவேண்டிய உண்மை ஆழ்கடலில் மூழ்கிப் போயுள்ளது. தேர்தல் லாபத்திற்காக நடத்தப்பட்ட கொலைகள் என்று காங்கிரசும், நாட்டில் ஆயிரக்கணக்கில் போலி மோதல் கொலைகள் நடந்திருக்கும் போது குஜராத்தை மட்டும் கேள்வி எழுப்புவது ஏன்? என்று பாஜக வும் மெய்யான அதன் கிடக்கையை பேசுபொருளாக்குவதில் இருந்து போலி மோதல் கொலைகளை தள்ளிவைக்கின்றன.

மோடிக்கு அடுத்த இடத்திலிருக்கும் அமித் ஷா கைது செய்யப்பட்டிருப்பதும், மைய புலனாய்வுக் குழுவின் விசாரணைக்கு உட்படுத்தப்பட்டிருப்பதும் சோராபுதீன் விவகாரத்தில் நீதி வழங்கப்படுவதற்கான ஏற்பாடுகளை செய்வதைப்போல் தோற்றம் காட்டினாலும், மெய்யாகவே அமித் ஷா உள்ளிட்ட அனைவரும் தண்டிக்கப் பட்டாலும் கூட (அப்படி நடக்கப் போவதில்லை என்றாலும்) அது ஒரு கொலை நிகழ்ச்சி அதற்கான தண்டனை என்பதைத் தாண்டி எதையும் வெளிப்படுத்தப் போவதில்லை.

போலி மோதல் கொலைகள் ஆத்திரத்தினாலோ, பகைமை உணர்ச்சியினாலோ நடைபெறுவதில்லை. அது திட்டமிட்டு அரசியல் நோக்கங்களுக்காகவே நடத்தப்படுகின்றன. குஜராத்தில் நிகழ்ந்த போலி மோதல் கொலைகளுக்கு மோடியை கொல்ல செய்யப்பட்ட சதி முறியடிக்கப்பட்டதாகவே ஒவ்வொரு முறையும் காரணம் கூறப்பட்டிருக்கிறது. தேர்தல் பிரச்சார நேரத்தில் இந்த போலி மோதல் கொலைக்கான காரணங்கள் மக்களிடம் உரங்களாக தெளிக்கப்பட்டு ஓட்டுக்களாக அறுவடை செய்யப்பட்டிருக்கின்றன. எனில் கொலைக்கான தண்டனை என்பது மட்டும் நீதியாக இருக்கமுடியுமா?

இந்த சோராபுதீன் விவகாரத்தில் கூட 2005 நவம்பர் 26ல் சோராபுதீன் சுட்டுக் கொல்லப்பட்டதும், சோராபுதீன் லஷ்கர் இ தொய்யிபா அமைப்பைச் சேர்ந்த தீவிரவாதி, மோடியை கொல்லும் நோக்கத்தில் வந்தவன் என்று காவல் துறை அதிகாரிகள் அறிவித்ததைத் தொடர்ந்து சாட்சிகளை சுட்டுக்கொன்றதிலிருந்து இன்று வரை காவல் துறையும் அரசு எந்திரமும் அவர்கள் சொன்ன பொய்யான காரணத்தை மெய்ப்படுத்துவதற்காக செயல்பட்டு வந்திருக்கின்றனர். இவைகளை கொலைக்கான தண்டனை என்பதோடு முடித்துக் கொண்டுவிடலாமா?


குஜராத் மட்டுமல்ல காஷ்மீர் தொடங்கி வடகிழக்கு மாநிலங்கள் ஈறாக சில நாட்களுக்கு முன்னர் கொல்லப்பட்ட தோழர் ஆசாத் கொலை உட்பட தினந்தோறும் போலி மோதல் கொலைகள் நடைபெற்றுக்கொண்டே இருக்கின்றன. அரசை எதிர்ப்பவர்கள் தொடங்கி அரசின் பொய்ப் பிரச்சாரத்திற்கு பயன்படும் என்றால் எவரும் இந்த போலி மோதல் கொலைகளிலிருந்து தப்பித்துவிடமுடியாது. பதக்கங்களை குத்திக்கொள்வதற்காக கொல்வதிலிருந்து தொடங்கி, மாவோயிஸ்டுகளுடன் பேச்சு வார்த்தை நடத்தத் தயார் என்று கூறிக்கொண்டே அதற்கான முனைப்புகளைச் செய்த தோழர் ஆசாத் சுட்டுக்கொல்லப்பட்டதுவரை அரசின் விருப்பத்திற்காக, அரசின் ஆசைகளை நிறைவேற்றுவதற்காகவே தினந்தோறும் கொலைகள் நடத்தப்படுகின்றன. எனும்போது எங்காவது ஒரு பிரச்சனையில் மாட்டிக்கொள்ள நேரும் போது ஒரு கொலை அதற்கான தண்டனை எனும் அளவில் இந்த போலி மோதல் கொலைகள் தீர்க்கப்பட்டால், இது என்ன வகைத் தீர்வு?

அரசின் விருப்பிற்காக அதை நிறைவேற்றுவதற்காக செய்யப்படும் கொலைகள் பொய்யான காரணங்களினால் தான் மக்கள் மத்தியில் பரப்பப்படுகிறது, அல்லது மோதல் கொலைகளின் மெய்யான காரணங்களை மக்களிடம் வெளிப்படையாக சொல்ல முடிவதில்லை என்பது; அரசு என்பது மக்களின் தேவைகளுக்காக, மக்களை நிர்வகிப்பதற்காக இருக்கவில்லை எனும் உண்மை அவர்களாலேயே வெளிப்படுத்தப்படும் இடமாகும். மோடி மக்களுக்கான அரசாக செயல்பட்டிருக்க முடியாது என்பதால் தானே சோராபுதீனைக் கொன்று மோடியை கொல்லவந்ததாக காட்டி ஓட்டு வாங்கவேண்டிய தேவை ஏற்படுகிறது. காவல் துறையும், ராணுவமும் மக்களை காப்பதற்குத்தான் என்றால் அப்பாவி பொதுமக்களைக் கொன்று தீவிரவாதியாக சித்தரித்து பதக்கம் வாங்க வேண்டிய அவசியம் ஏன் எழுந்தது? அரசு மாவோயிஸ்டுகளுடன் பேச்சு வார்த்தை நடத்தத் தயார் என்றால் தோழர் ஆசாத்தை கொல்லும் தேவை எப்படி ஏற்பட்டிருக்க முடியும்?

அரசின் திட்டங்கள், செயல்பாடுகள், நோக்கங்கள் என எதுவும் மக்களுக்கானதாக இருப்பதில்லை. அவை தரகு, பன்னாட்டு முதலாளிகளுக்காகவே இருக்கின்றன, அவர்களுக்காகவே இயங்குகின்றன. அவர்களின் தேவையை நிறைவேற்றுவதற்காகவே ஒவ்வொரு திட்டமும் தீட்டப்படுகிறது. இவைகளை புள்ளிவிபரங்கள், தரவுகள் ஊடாக நிரூபிக்கமுடியும். விலைவாசி உயர்வு முதல் மக்களை பாதிக்கும் அனைத்துப் பிரச்சனைகளும் எங்கிருந்து உருவம் கொள்கின்றன என்பதை அரசுகளின் செயல்பாட்டு திட்டங்களின் மூலமே மறுக்கவியலாத வகையில் வெளிப்படுத்த முடியும். என்றாலும் இவைகளை வேறொரு கோணத்திலிருந்து, வேறொரு தளத்திலிருந்து வெளிப்படுத்துபவைகள் தாம் போலி மோதல் கொலைகள்.

தோழர் ஆசாத்

போலி மோதல் கொலைகளில் உள்ளாடும் இந்த அரசியல் பின்னணியை விளக்காமல், போலி மோதல் கொலைகள் ஏன் நடக்கின்றன என்பதை வெளிப்படையாக விவாதிக்காமல்; இவைகளை பேசுபொருளாக்குவதை கவனமாக தவிர்த்துவிட்டு வெகுசில நிகழ்வுகளில் விசாரிப்பதனாலோ, தண்டனை வழங்கிவிடுவதாலோ போலி மோதல் கொலைகளை தடுத்துவிட முடியாது. முதலாளிகளுக்கான அரசை தக்கவைத்துக் கொண்டு போலி மோதல் கொலைகளை தடுத்துவிட முடியும் என நினைக்கவும் முடியாது. ஏனென்றால் வெளிப்படையான ஜனநாயகம் என்பது இதில் சாத்தியமில்லை. பாட்டாளிகளுக்கான அரசு ஏற்படும் போது மட்டுமே, பாட்டாளிகளின் சர்வாதிகாரம் நிருவப்படும் போது மட்டுமே இவைகளைத் தீர்க்க முடியும்.

தொடர்புடைய கட்டுரைகள்

மோடி விசாரணை: நீதி வென்றுவிட்டதா?

குஜராத் அமைச்சரின் தலைமறைவு: நீதிக்கு இன்னும் தூரமிருக்கிறது

ஒரு பதில்

  1. அதற்கான தண்டனை குஜராத் தீவிரவாதி மோடியை அரசு கொல்வதிலிருந்து குஜராத் மட்டுமல்ல காஷ்மீர் தொடங்கி வடகிழக்கு மாநிலங்கள் முடியா போலி மோதல் கொலைகளை தீர்க்க முடியும். குஜராத் கொலைக்கான தண்டனை என்பது மோடியை அரசு கொல்வதிலிருந்து மட்டும் நீதியாக இருக்க முடியும்.

உங்கள் கருத்தின் மூலம் என்னை மேம்படுத்துங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s

%d bloggers like this: