மட்டக் குதிரை…!

வானத்தில் ஓட்டை விழுந்து விட்டதைப் போல் தொடர்ந்து மழை கொட்டிக் கொண்டிருந்து. மிகவும் அடர்த்தியாகவும் நெருக்கமாகவும். ஒவ்வொரு துளியும் ஒரு புளியாங்கொட்டை அளவுக்குப் பருத்திருந்தது. சாலையில் கணுக்கால் அளவுக்குத் தண்ணீர் நிரந்திருந்தது. அவன் மிகவும் சோர்ந்திருந்தான். அன்னாந்து வானத்தைப் பார்த்தான். இரவின் அடர்த்தியில் மறைந்து போயிருந்த வானத்திலிருந்து கலங்கலான நிறத்தில் மழை நீர் இறங்கிக் கொண்டிருந்தது.

 

“சனியன்…”  மழையைச் சபித்தான். நீண்ட நேரமாக பைக்கைத் தள்ளி வந்ததில் லேசாக முதுகு வலித்தது. தொடர்ந்து தண்ணீரில் நடந்து வந்ததால், உள்ளங்காலின் தோல் இளகி விட்டிருந்தது. செருப்பிலிருந்து எப்போதும் நழுவிக் கொண்டேயிருந்தது. நனைந்து விட்ட ஜட்டியின் பக்கவாட்டு எலாஸ்டிக் வார் ஒரு கூரான கத்தியைப் போல் உள் தொடையின் இடுக்கில் உராய்ந்து உராந்து புண்ணாக்கி விட்டிருந்தது; அவன் கால்களை அகட்டி வைத்து நடந்து கொண்டே பைக்கைத் தள்ள மிக சிரமப்பட்டான்.

 

நுரையீரல் காரமான சிகரெட்டுப் புகைக்கு மிகவும் ஏங்கியது. மழை நாளின் நள்ளிரவு பன்னிரண்டு மணிக்கு ஊரே கம்பளியினுள் முடங்கி விட்டிருந்ததால். கடைகளும் கூட கண்கள் மூடித் தூங்கிக் கொண்டிருந்தது. கீழ் வரிசைப் பற்கள் மேல் வரிசைப் பற்களோடு ஒரு கடும் சண்டையைத் துவங்கியிருந்தது. சட்டு சட்டென்று கீழ் வரிசைப் பற்கள் தொடர்ந்து அடித்ததாலோ, இல்லை உச்சந்தலையில் தொடர்ந்து மழைத் துளிகள் இடித்ததாலோ மண்டையின் இரு பக்கமிருந்தும் ஒரு வலி புறப்பட்டு புருவ மத்தியில் சந்தித்து கைகுலுக்கிக் கொண்டது. ஒரு மாதிரி பச்சை நிறத் திரையொன்று கண்களைச் சூழ்வதை உணர்ந்தான். குளிருக்கு இறுகிப் போயிருந்த அடிவயிற்றின் தசைகள் இடது பக்கமாக இழுத்துக் கொண்டது. இன்னும் ஒரு பத்து நிமிடங்கள் தாக்குப் பிடிக்கலாம்; வண்டியை அப்படியே போட்டு விட்டு ஓரமாகப் படுத்து விடலாமா என்று யோசித்தான்… பச்சை நிறம் அடர் பச்சையானது. அதன் அடர்த்தி இன்னும் இன்னும் கூடிக் கொண்டே போய் ஆழமான இருளானது.

 

“என்ன சொல்றீங்க முரளி? தெரிஞ்சு தான் பேசறீங்களா? இது காலண்டர் இயர் எண்ட் தெரியுமில்லே? இன்னும் இந்த க்வாட்டருக்கான பில்லிங் முடியலை. அதுக்குள்ளே பொண்டாட்டி கூப்பிட்டா.. புள்ளைக்கு ஒடம்பு செரியில்லைன்னு… கொஞ்சம் கூட சீரியஸ்னெஸ் இல்லாமெ பேசறீங்க? அதான் இன்னும் நீங்க இப்படியே இருக்கீங்க” இருளின் ஏதோவொரு மூலையிலிருந்து அந்தக் குரல் எழுந்தது.

 

கீழே குனிந்தான். தரை கண்ணுக்குப் புலப்படவில்லை. இடுப்புக்குக் கீழ் எல்லாமே இருளாய்க் கிடந்தது. மிக அதிசயமாகச் சற்றுத் தொலைவில் ஒரு மெர்குரி விளக்கு சோகையாய் எரிவது புலப்பட்டது. உடலின் எஞ்சிய சக்தியையெல்லாம் திரட்டி வண்டியைத் தள்ளினான். வண்டியின் முன் சக்கரம் விளக்குக் கம்பத்தில் இடிக்கவும் இவன் அதைக் கீழே விட்டு சரியவும் சரியாக இருந்தது.

 

“ஹேய்.. தோ பாரேன். யாரோ கீழ விழுந்திடாங்க” எங்கிருந்தோ ஒரு கீச்சுக் குரல் கேட்டது.

“அப்பா.. அப்பா எழுந்திருப்பா யாரோ விழுந்திட்டாங்க” இன்னொரு கீச்சுக் குரல் தொடர்ந்து கேட்டது.

 

பச்சை நிறம் இருளின் மையத்திலிருந்து உற்பத்தியாகி முழுவதும் வியாபித்தது. சின்னச் சின்னக் குமிழாய் உற்பத்தியானது பச்சை. ஒவ்வொரு குமிழும் பெரிதாகி வெடித்தது. கண்களுக்குள் அடர் பச்சையும் இருளும் மாறி மாறி முன்னும் பின்னுமாய் வந்து கொண்டேயிருந்தது.ஏதேதோ சப்தங்கள் இன்ன திசையென்றில்லாமல் எல்லா திசைகளிலிருந்தும் ஈட்டியைப் போல் வந்து கொண்டேயிருந்தது. அந்த ஈட்டிகளின் மூலமும் இலக்கும் ஒன்றேதானோவென்று முரளி குழம்பிப் போனான்.

 

“அப்பா…எனக்கு எக்ஸ் பாக்ஸ் கேம்ஸ் வேணும்ப்பா..” என்று குழைவாய் ஒன்று..

 

“இந்தாங்க… ஒங்களைத்தானே… தீபாவளி பர்ச்சேசுக்கு என்னிக்குங்க போலாம்?” என்று கொஞ்சலாய் ஒன்று..

 

“இதப்பாருங்க.. வீட்டு ஓனரம்மா ரொம்பத்தான் பன்றாங்க; நமக்கே நமக்குன்னு ஒரு புறக்கூண்டாச்சும் பாருங்க” என்று அதட்டலாய் ஒன்று…

 

“முரளி.. இஃப் யு கான்ட்; ப்ளீஸ் க்விட். ப்ளீஸ் புட் இன் யுவர் பேப்பர்ஸ். நத்திங் மோர் டு ஸே..” என்று மிரட்டலாய்…

 

“அண்ணே… அவங்க அண்ணி வீட்லேர்ந்து அவரோட அண்ணனுக்கு கார் வாங்கித் தந்திருக்காங்கலாம்” என்று எதிர்பார்ப்போடு…

 

“யு ஆர் அவுட் டேட்டட் முரளி. ஸாரி டு ஸே திஸ். வீ நீட் சம் யெங் ப்ளட்..”  அதட்டலாய்…

 

“சார் ப்ளீஸ்… ஐ காட் மெனி கமிட்மென்ட்ஸ். ஐ வில் ட்ரை டு கிவ் மை பெஸ்ட்” கெஞ்சலாய்…

 

“ஓக்கே.. ஸ்பென்ட் சம் எக்ஸ்ட்ரா டைம். புரிஞ்சிக்க முயற்சி பண்ணுங்க. அக்கௌன்டிங் அப்ளிகேஷனை சேப்புக்கு மாத்திருக்கோம். படிங்க. நிறையப் படிங்க. நிறைய தெரிஞ்சுக்கங்க. வீ டோன்ட் சே யூ டோன்ட் வான்ட். பட் வீ நீட் திங்ஸ் டு மூவ்…” கட்டளையாய்…

 

முரளி ஒரு குதிரை. அப்படித்தான் அவன் தன்னை நினைத்துக் கொண்டான். அவன் ஓட வேண்டும். தங்கைக்காய், மனைவிக்காய், மகனுக்காய், கம்பெனிக்காய்…. உண்பதும் கழிவதும் உறங்குவதும் புணர்வதும் பினங்குவதும் சிரிப்பதும் அழுவதும் கூட ஓட்டத்தின் ஊடாகத்தான். ஓட்டம் வேறு குதிரை வேறல்ல. ஓடாதவொன்றைக் குதிரையல்ல. அவன் அப்படித்தான் நம்பினான். குதிரையின் கடிவாளம் உலகத்தை அதற்கு மறுத்து விடுகிறது. அம்மா, அப்பா, சகோதரி, மனைவி, பிள்ளை, அதிகாரி என்று கணக்கற்ற கடிவாளங்களைக் கட்டியிருந்தான்; அதையொரு வரமென்று நம்பினான்.

 

குளிர் கொஞ்சம் குறைவது போலிருந்தது. இருளின் நிறம் இப்போது வெளிர் பச்சையானது. மசமசப்பாய் ஏதேதோ உருவங்கள் தோன்றி பக்கவாட்டில் கடிவாளத்தின் மறைப்பில் ஒதுங்குவது தெரிந்தது. ஹோவென்ற கூச்சல் இருபுறமிருந்தும் கேட்டுக் கொண்டேயிருந்தது. வேகமான ஓட்டத்திற்கு ஆரவாரித்தது. வேகம் குறைந்த சமயங்களில் எள்ளலாய் ஒலித்தது. முரளி மிக வேகமாய் ஓட வேண்டும் என்று கங்கணம் கட்டிக் கொண்டான். குடும்பம், சமூகம், கம்பெனி என்று அவன் மேல் மாறி மாறியும் ஒரே நேரத்திலும் சவாரி செய்தார்கள். மறுப்பது பாவம் என்று அவனது சமூகம் அவனுக்கு போதித்தது. காலில் விழுந்தாவது பணி உயர்வு பெற்றுக் கொள்வது கெட்டிக்காரத்தனம்.எவன் காலையாவது வாரி விட்டு மேலே செல்வது புத்திசாலித்தனம்.  கடன்பட்டாவது கார் வாங்குவது கெட்டிக்காரத்தனம். அவன் சமூகம் அவனது ஓட்டத்தினூடாய் அவனுக்கு நிறைய போதித்தது.

 

வாழ்க்கைக்காக ஓட்டமில்லை; ஓட்டத்துக்காகவே வாழ்க்கை. வேலை செய்யவே வாழ்கை. தொண்டூழியம் செய்யவே வாழ்க்கை. முதலாளியின் கருணை பாக்கியம். அந்தக் கருணையை சம்பாதிக்க கொல்ல வேண்டுமா கொல்; திருட வேண்டுமா திருடு; பொய் பேச வேண்டுமா பேசு; காலில் விழ வேண்டுமா விழுந்து நக்கு. முரளி ஒரு குதிரை. எதிர்க் கேள்வி கேட்காமல் ஓடுவதற்கென்றே திட்டமிட்டு வளர்க்கப்பட்ட குதிரை. அவன் சமூகம் அதைச் சாமர்த்தியம் என்றது. ‘பெஸ்ட் வொர்க்கர் அவர்டா’ என்று கொண்டாடியது.

 

அதற்கு அவன் பெரிய விலை கொடுக்க வேண்டியிருந்தது. அந்த விலை அவன் வாழ்க்கை.

 

பச்சை நிறத்தின் அடர்த்தி இன்னும் லேசானது. முரளிக்குக் கனவொன்று தோன்றியது. அது ஒரு நல்ல காலை. நிறைய கம்பளிப் புழுக்கள் ஓடிக் கொண்டிருக்கிறத.பெரிய கூட்டம். உலகின் கம்பளிப் புழுக்களெல்லாம் ஒன்றாய் திரண்டு விட்டதைப் போன்றதொரு ப்ரும்மாண்டப் பேரணி அது. வேகம் மிக வேகம். கூட்டத்தின் வேகத்திற்கு இணையாய் ஓடாத புழுக்கள் நசுங்கிச் செத்தன. பிணங்களின் மேல் ஏறிச் சென்றன பின் வந்த புழுக்கள். தனது கூட்டிலிருந்து தலை நீட்டிப் பார்க்கும் பச்சை நிறக் கம்பளிப் புழுவொன்று இன்னெதென்று தெரியாமல் அந்தக் கம்பளிக் கூட்டத்தைத் தொடர்கிறது.எங்கே ஓடுகிறோம்; தெரியவில்லை.ஏன் ஓடுகிறோம்; புரியவில்லை. ஆனாலும் தொடர்ந்தது. அது ஒரு பைத்தியக்காரக் கூட்டம். நீண்ட ஓட்டத்தின் இறுதியில் ஒரு மைதானத்தை அந்தப் பேரணி அடைந்தது.

 

மைதானத்தின் மத்தியில் ஒரு பெரிய கம்பம் நடப்பட்டிருந்தது. அதன் மேல் எல்லா புழுக்களும் வேகமாய் ஏறிக் கொண்டிருந்தன.எதையோ பிடிக்கப் போகும் வேகம். பச்சை நிறப்புழுவும் அதன் மேல் வெறியோடு ஏறியது. முன்னே சென்ற புழுவைக் கீழே இழுத்துப் போட்டு; பின்னே வரும் புழுவின் தலையில் எட்டி நெம்பி.. சாமர்த்தியம் கொண்ட புழுக்களெல்லாம் அப்படித்தான் ஏறிக் கொண்டிருந்தன. மேலே ஏதோவொன்று இருக்க வேண்டும் என்று எல்லோரும் நம்பினர். நிறைய புழுக்கள் அந்தக் கம்பத்தின் பாதிலேயே பிய்த்தெரியப்பட்டு கீழே விழுந்து செத்துப் போனது.எப்படியோ அடித்துப் பிடித்து உச்சியை அடைந்தது பச்சைப் புழு.

 

அங்கே கம்பத்தின் உச்சியில்… ஒன்றுமில்லை. வெறுமை. வானம். வெட்டவெளி. வேறெதுவுமில்லை. துணுக்குற்ற பச்சைப் புழு எதைத் தேடி இத்தனை வேகமாய் ஓடினோம் என்று திகைத்து அசைவற்று நின்றது. கம்பத்தின் உச்சியை தொட பின்னாலேயே வந்த அடுத்த புழு தனக்கான இடத்தைப் பிடிக்க, அசைவற்று நின்ற பச்சைப் புழுவை கம்பத்தினின்று இழுத்துக் கீழே எறிந்து விட்டு மேலே வந்தது. கம்பத்தின் உச்சியிலிருந்து கீழே கீழே கீழே விழுந்து கொண்டிருந்தது பச்சைப் புழு. பட்டென்று விழித்தான் முரளி.

 

“அம்மா இங்க பாரேன் இவரு முழிச்சுக் கிட்டாரு” கீச்சுக் குரல். சின்னப் பெண்.எண்ணை காணாத தலை முடி. முரளி மல்லாந்து படுத்திருந்தான். கீழே வழவழப்பான ப்ளாஸ்டிக் கித்தான் விரிக்கப்பட்டிருந்தது. தலைக்கு நேர் மேலே, மூன்றடி உயரத்தில் மரப்பலகையால் அடித்த கூரை தெரிந்தது. பக்கவாட்டில் இருபுறமும் இரண்டிரண்டு சைக்கிள் டயர்கள் தெரிந்தது. முரளி குழம்பினான். சுற்றிலும் தெரிந்த காட்சிகளில் லேசக பச்சை நிறம் ஒரு பாசம் போலப் படிந்திருந்தது. எழுந்து கொள்ள முயன்றான். முடியவில்லை

 

அது மோட்டார் இணைக்கப்பட்ட ஒரு நான்கு சக்கர சைக்கிள் வண்டி என்பது புரிந்தது. அதன் கீழே ப்ளாஸ்டிக் கித்தான் விரித்து ஒரு சின்னக் குடும்பம் ஒண்டிக் கொண்டிருந்தது. முன் பின் டயர்களின் இடையே வெள்ளை நிற சிமென்டு சாக்குப் பைகளில் துணிமணிகள் நிறைத்து செருகப்பட்டிருந்தது. கால்மாட்டில் ஒரு மண்ணென்னை ஸ்டவ்வும் மிகச் சில ஈயப்பாத்திரங்களும் நெருக்கியடித்துக் கொண்டிருந்தது. தலைமாட்டில் இடதில் ஒரு சிருவனும், வலதில் ஒரு சிருமியும் குந்தவைத்திருந்தனர்.  அந்த வண்டியின் பின்பக்கமிருந்து ஹேன்டில் வரை மேல் புறமாக ஒரு ப்ளாஸ்டிக் கித்தான் மறைத்து நின்றது. முன் சக்கரத்தின் பக்கத்தில் ஒரு நடுத்தர வயதுப் பெண்மணி குறுகி அமர்ந்திருந்தார்.  

 

முன் சக்கரத்தின் இடைவெளியில் கித்தான் கொஞ்சமாகப் பிளந்திருந்தது. அது வாயில். அதன் ஊடாகப் பார்த்த போது முரளியின் பைக் தெரிந்தது. முரளிக்கு இப்போது நினைவு தெளிவானது. கடைசியாக விழுந்த இடத்தின் அருகே இருந்த நடைமேடையின் மேலே நிறுத்தப்பட்டிருந்த பார வண்டியின் கீழே இருக்கிறோம் என்று நினைத்துக் கொண்டான். வெளியே ஏதோ பேச்சுக் குரல் கேட்டது.

 

” என்னா சார் பேசறீங்க. பாரு சார் எத்தினி மழ பேஞ்சிருக்கு. எத்தினி தண்ணி தேங்கிக் கிடக்கு. வண்டி வராது சார்”

 

“முனுசாமி.. இது ரொம்ப அர்ஜென்டு. இப்பயே லோடு போய்ச் சேரலைன்னா எனக்கு பத்தாயிரம் நட்டமாகும். பத்து வருசமா என் கடைக்கு நீ தான் லோடு அடிக்கிறே. இப்ப வர முடியாதுன்னு தகறாரு பண்ணாத. பின்ன நாளைக்கு நான் வேற வண்டி பாக்க வேண்டி இருக்கும். இப்ப நீ கிராக்கி பண்ணிட்டிருந்தா நாளைக்கு சோத்துல மண்ணு விழும். அவ்வளவு தான் சொல்ல முடியும்”

 

“சார்.. பொண்டாட்டி புள்ளைங்கள்லாம் வண்டிக்குக் கீழ தான் ஒண்டிக்கிட்டிருக்காங்க இன்னிக்கு. வண்டி இன்னிக்கு ராவுக்கு வராதுன்னா வராது சார். நீ வேற வண்டி பாக்கனும்னா பாத்துக்க. நான் ஒன்னியும் உன்னெ நம்பிப் பொழைக்கல. உன் கட இல்லேன்னா ஊர்ல எனக்கு ஆயிரம் கட இருக்கு. கைல வண்டி இருக்கு. ஒடம்பில தெம்பு இருக்கு.என்னோட சோறு நீ போட்டதில்ல. நான் ஒழைக்கறேன் நான் திங்கறேன். நீ ஒன்னும் எனக்குப் பிச்ச போடலை. மொதல்ல இப்ப எடத்தை காலி பண்ணு.எதுவா இருந்தாலும் காலைல பேசிக்கலாம்.”

 

தொடர்ந்து கார் இஞ்சின் ஒன்றின் ஆத்திரமான உருமல் கேட்டது. தார்ச் சாலையை ரப்பர் டயர்கள் கீறிப் புறப்படும் ஓசை கேட்டது.  முரளியின் கண்களைப் பீடித்திருந்த பச்சை நிறம் சட்டென்று மறைந்து ஒரு வெளிச்சம் பரவியது. பார்வையின் இரு பக்கத்தையும் மறைத்து நின்ற ஏதோவொன்று சட்டென்று விலகியது போல் இருந்தது.

 

குறிப்பு : இக்கதையின் நாயகன் முரளி இல்லை.

 

முதல் பதிவு: தோழர் கார்க்கி

 

மின்னூலாக(PDF) தரவிறக்க‌
Advertisements

உணவுப் பாதுகாப்பு சட்டம்: உணவை வழங்குவதற்கா? பறிப்பதற்கா?

கடந்த வாரத்தில் அமைச்சரவை கூடி உணவுப் பாதுகாப்பு சட்டத்தை கொண்டுவருவதிலுள்ள சிக்கல்களை களைவது குறித்து விவாதித்தது. வறிய மக்கள் அனைவருக்கும் உணவு கிடைப்பதை உறுதி செய்யும் விதத்தில் இந்த சட்டம் நடைமுறைப் படுத்தப்படும் என்று அரசு கூறுகிறது. ஓரிரு மாதங்களுக்கு முன்னர் தான் கிடங்குகளில் சேமிக்கப்பட்டிருக்கும் உணவு தானியங்கள் வீணாய் கெட்டுப் போனாலும் போகலாமேயன்றி ஏழைகளுக்கு அதை வழங்க முடியாது என்று மண்மோகன் சிங் முழங்கியிருந்தார். அப்படியிருக்க திடீரென்று என்ன மாற்றம் எப்படி நேர்ந்தது? மாற்றமோ மாறுதலோ ஒன்றுமில்லை. மண் மோகன் ஏற்கனவே முழங்கியிருந்தது அரசின் கொள்கை நோக்கம், இப்போதைய சட்டவடிவம் மக்களை ஏமாற்றி அதை செயல்படுத்துவதற்கான உத்தி.

அண்மையில் இந்தியாவின் உணவு நிலை குறித்து ஐநா அறிக்கை ஒன்றை தயாரித்தது. அதில் இந்தியாவில் கிராமப்புறங்களில் வசிக்கும் மக்களில் தோராயமாக 23 கோடிக்கும் அதிகமானோர் ஊட்டச் சத்து குறைபாட்டால் பாதிக்கப்பட்டுள்ளதாக குறிப்பிடப்பட்டுள்ளது. இந்தியாவில் நிகழும் மரணங்களில் 33 நூற்றுமேனிக்கு பெரியவர்களும், 50 நூற்றுமேனிக்கு குழந்தைகளும் பட்டினி மற்றும் ஊட்டச்சத்துக் குறைவால் இறக்கின்றனர். மேலும், 6 கோடி குழந்தைகள் வயதுக்கேற்ற வளர்சியின்றியும், 2.5 கோடி குழந்தைகள் உயரத்திற்கு ஏற்ற எடையின்றியும், 5.4 கோடி குழந்தைகள் வயதுக்கு ஏற்ற எடையின்றியும் இருப்பதாக குறிப்பிடுகிறது. அதாவது, ‘வல்லரசு’ இந்தியாவின் நிலை ஆப்பிரிக்க கண்டத்தைவிட மிகவும் மோசம்.

ஒரு மாதத்திற்கு முன்னர் ஊடகங்களில் பரபரப்பாக பேசப்பட்டு தற்போது மறக்கப்பட்டுவிட்ட ஒரு செய்தி, வறுமைக்கோட்டுக்காக நிர்ணயிக்கப்பட்ட அளவு. நகர்ப்புறங்களில் 32 ரூபாயும், கிராமப்புறங்களில் 26 ரூபாயும் சம்பாதிக்க முடிந்தவர்களெல்லாம் வறுமைக்கோட்டுக்கு மேலே இருப்பவர்கள் என்றார் திட்டக் கமிசன் துணைத்தலைவர் அலுவாலியா. எல்லா ஊடகங்களிலும் இது விமர்சிக்கப்பட்டது, விவாதிக்கப்பட்டது. எந்த மாற்றமும் வரவில்லை.

ஏகாதிபத்திய நாடுகளால் இந்தியாவின் மீது திணிக்கப்பட்ட அத்தனை ஒப்பந்தங்களும் உணவு தானியங்களுக்காக வழங்கப்படும் மானியங்களைக் குறைப்பது, ரேசன் கடைகளை நீக்குவது உள்ளிட்டவைகளை நோக்கமாக கொண்டிருக்கின்றன. இந்த அனைத்தையும் ஒருங்கிணைக்கும் நோக்கத்துடன் தான் தேசிய உணவு பாதுகாப்புச் சட்டம் உருவாக்கப்பட்டுள்ளது. அதாவது, ஐநா அறிக்கையை காரணமாக வைத்து நாட்டில் மக்கள் உணவுக்கு திண்டாடுகிறார்கள் எனவே அவர்களுக்கு உதவுகிறோம் என்று கூறிக்கொண்டு, வறுமைக்கோட்டை குறைத்து மதிப்பீடு செய்து கோடிக்கணக்கான மக்களை இலக்குக்கு வெளியே தள்ளிவிட்டு, மானியங்களை, ரேசன் கடைகளை ரத்து செய்யும் நோக்கத்துடன் ஒரு சட்டத்தை உருவாக்கி விட்டு மக்கள் எதிர்த்துவிடக் கூடாது என்பதற்காக உணவுப் பாதுகாப்பு என்று பெயரையும் வைத்திருக்கிறது அரசு.

அனைவருக்குமான உணவுப்பாதுகாப்பு என்று டம்பமாக அறிவிக்கப்பட்டிருந்தாலும் அதில் கூறப்பட்டிருக்கும் வரம்புகள் மக்களின் பட்டினியைப் பார்த்து கேலி செய்கிறது.

1. அந்தோதையா திட்டம், அன்னபூர்ணா திட்டம் போன்று தற்போது நடைமுறைப் படுத்தப்பட்டுக் கொண்டிருக்கும் உணவு வழங்கல் திட்டங்கள் அனைத்தும் இந்தச் சட்டம் அமலுக்கு வரும் போது நீக்கப்பட்டுவிடும்.

2. திட்டக் கமிசனால் வறுமைக் கோட்டுக்கு கீழே வசிப்பவர்கள் என்று கணக்கிடப் படுபவர்களுக்கு மட்டுமே இந்த சட்டம் உணவுப் பாதுகாப்பை வழங்கும்.

3. நக்சலைட்டுகள், மாவோயிஸ்டுகள் போன்று தீவிரவாதத்தால்(!) பாதிக்கப்பட்ட அதாவது அரசை எதிர்க்கும் பகுதியிலிருக்கும் மக்களுக்கு இந்தத் திட்டம் பொருந்தாது.

4. பொருளாதார நெருக்கடியில் அரசு இருக்கும் போது இந்த திட்டம் நிறுத்தி வைக்கப்படும்.

இவ்வாறு தனக்குத்தானே வரம்பிட்டுக் கொண்டிருக்கும் இத்திட்டம் செய்யப்போவது என்ன?

1. வறுமைக் கோட்டுக்கு கீழே வாழும் குடும்பங்கள் கண்டறியப்பட்டு அக்குடும்பங்களுக்கு மாதம் தோறும் 25 கிலோ அரிசியோ, கோதுமையோ சலுகை விலையில் வழங்கப்படும்.

2. இதற்கான செயல் திட்டங்களை மத்திய மாநில அரசுகள் இணைந்து தீட்ட வேண்டும்.

3. இதை உறுதிப்படுத்துவது குறித்தும், நிறைவேற்றத் தவறுபவர்களை தண்டிப்பது குறித்தும் வரைவுகள் ஏற்படுத்தப்படும்.

4. உணவுக்குப் பதிலாக பணமாக கொடுப்பது குறித்தும் ஆலோசிக்கப்படும்.

இவைதான் வரவிருக்கும் உணவுப் பாதுகாப்பின் முதன்மையான அம்சங்கள். மேலோட்டமாக பார்க்கும் போதே தெரிகிறது, இதன் நோக்கம் ஏழை மக்களுக்கான உணவுப் பாதுகாப்பு அல்ல என்பது.

2001ல் உச்சநீதி மன்றம் பிறப்பித்த ஒரு உத்திரவை அடுத்து பல மாநிலங்கள் குடும்ப வழங்கல் அட்டைகளுக்கு மாதம் ஒன்றுக்கு 35 கிலோ வரை அரிசியோ கோதுமையோ வழங்கிக் கொண்டிருக்கின்றன. அன்னபூர்ணா, அந்தோதையா போன்ற திட்டங்களிலும் 35 கிலோ வரை அரிசியோ கோதுமையோ வழங்கப்பட்டுக் கொண்டிருக்கிறது. தமிழ்நாட்டில் 20 கிலோ வரை அரிசி இலவசமாகவே வழங்கப்பட்டுக் கொண்டிருக்கிறது. இவைகளையெல்லாம் ஒழித்துவிட்டு சலுகைவிலையில் மாதம் ஒன்றுக்கு 25 கிலோ வழங்குவது உணவுப் பாதுகாப்பா? இருப்பதையும் பறிப்பதா?

மொழி தெரியா ஒரு வடமாநில தொழிலாளி சென்னையில் கட்டுமான வேலைகளுக்காக தினமும் போக்குவரத்திற்காக மட்டுமே பத்து ரூபாய்க்கு மேல் செலவழிக்க நேர்கிறது. ஒரு தேனீர் ஐந்து ரூபாய்க்குமேல் விற்கும் விலையில் ஒருவன் 36 ரூபாய் சம்பாதிக்க முடிந்தால் அவனை வறுமைக் கோட்டுக்கு மேலே வரம்பிடுகிறார்கள் என்றால், அதை அதிகாரிகளின் பார்வையில் ஏற்பட்ட வறுமை என்பதா? அல்லது பச்சை அயோக்கியத்தனம் என்பதா? வறுமை என்பது கிடைக்கும் ஊதியத்தில் மட்டும் இல்லை, உண்ணும் கலோரியிலும் இருக்கிறது. கடின உழைப்பு செய்பவர்களுக்கு அதிக கலோரிகளும் ஏனையவர்களுக்கு குறைந்த அளவு கலோரிகளும் தேவைப்படும். சராசரியாக நாளொன்றுக்கு ஒரு மனிதன் 2500 கலோரிகள் உட்கொண்டாக வேண்டும். இந்த அளவு கலோரி அவர்கள் உண்ணும் உணவில் கிடைக்கவில்லை என்றால் அவர்கள் வறுமையில் இருக்கிறார்கள் என்பது சர்வதேச அளவீட்டு முறை. ஆனால் இந்திய அரசு இதை 1700 கலோரிகளாக நிர்ணயித்திருக்கிறது. இப்படி கலோரிகளைக் குறைப்பதும், வறுமைக்கோட்டு அளவை குறைவாக நிர்ணயிப்பதும் அறியாமையால் அல்ல, அயோக்கியத்தனத்தால். இப்படி குறைவாக நிர்ணயிப்பதால் கோடிக்கணக்கான மக்கள் வறுமைக் கோட்டுக்கு மேலே இருப்பதாக கணக்கு காட்டி அதன் மூலம் பலனாளிகளை குறைப்பதற்காகவே இது திட்டமிட்டு செய்யப்படுகிறது. ஏற்கனவே இருக்கும் பல திட்டங்களின் மூலம் உணவு தானியங்களை பெற்றுக் கொண்டிருப்பவர்களை சதித்தனமாக வெளியேற்றி உணவு கிடைக்காமல் செய்வதற்கு உணவுப் பாதுகாப்பு என்று பெயர் சூட்டுவது சரியா? உணவுப் பறிப்பு என்று பெயர் சூட்டுவது சரியா?

மேடைகள் தோறும், ஊடகங்கள் அனைத்திலும் வறுமையினாலும், முறையான கட்டமைப்பு வசதிகள் இல்லாததாலும் தான் மக்கள் தீவிரவாதங்களுக்கு ஆதரவளிக்கிறார்கள், அந்தப் பகுதிகளில்  தேவையான வசதிகளை ஏற்படுத்திக் கொடுத்தால் தீவிரவாதம் ஒழிந்துவிடும் என்று தான் அரசு பிரச்சாரம் செய்து கொண்டிருக்கிறது. நக்சலைட்டுகள் தீவிரவாதிகளல்ல என்பதும், வறுமைக்கு பயந்து யாரும் தீவிரவாதிகள் ஆகிவிடுவதில்லை என்பதும் ஒருபுறமிருக்கட்டும், தற்போது தீவிரவாதம் பாதித்த பகுதிகளில் உணவுப் பாதுகாப்பு சட்டம் செயல்படுத்தப்படாது என அரசு கூறுவதன் பொருள் என்ன? மக்களை மிரட்டுவது தான். ஏற்கனவே வடகிழக்கு மாநிலங்களின் கனிம வளங்களை தரகு பன்னாட்டு முதலாளிகள் கொள்ளையடிப்பதற்கு வசதியாக மக்களுக்கு எதிராக பசுமை வேட்டையை ஏவிவிட்டிருக்கிறது அரசு. தங்கள் வாழ்வாதாரங்கள் சூரையாடப்படுவதற்கு எதிராக மக்கள் திரண்டு போராடுவதை தீவிரவாதமாக சித்தரித்து வருகிறது. இந்த நிலையில் அரசுக்கு எதிராக போராடினால் அந்தப் பகுதிகளில் எந்த அரசு திட்டங்களும் செயல்படுத்தப்படாமல் மக்கள் பட்டினியில் சாக விடப்படுவார்கள் என்று மிரட்டி எச்சரிப்பதைத் தாண்டி இதற்கு வேறு என்ன பொருள் இருந்துவிட முடியும்? அறைகுறையாக அந்த மக்கள் பெற்றுவறும் உணவையும் பறிப்பதுதான் இந்த சட்டத்தின் நோக்கமாக இருக்கும் போது அதற்கு உணவுப் பாதுகாப்புச் சட்டம் என்று பெயரிடுவது எப்படி பொருந்தும்?

 

ஒவ்வொரு பன்னாட்டு நிறுவனங்களும் இங்கு வந்து தொழில் தொடங்கும் போதும் லட்சம் பேருக்கு வேலைவாய்ப்பு, நேரடி வாய்ப்பு மறைமுக வாய்ப்பு என்று அரசு அந்த நிறுவனங்களுக்கு அறிவிக்கப்படாத விளம்பரதாரராக செயல்படுகிறது. இதுவரை தொடங்கிய நிறுவனங்களையும், அறிவிக்கப்பட்ட வேலை வாய்ப்புகளையும் கணக்கிட்டுப் பார்த்தால் வேலையில்லாமல் யாரும் இருக்கமுடியாது எனும் அளவுக்கு அறிவிப்புகள் வந்திருக்கின்றன. இந்த வேலைவாய்ப்புகளை காரணம் காட்டித்தான் அரசுகள் தனியார் நிறுவனங்களுக்கு சலுகைகளையும், வரிவிலக்குகளையும், தள்ளுபடிகளையும் வாரி வழங்கி வருகின்றன. இப்படி வழங்கப்படும் சலுகைகளையும் விலக்குகளையும் பொருளாதார நெருக்கடி என்று எந்த அரசும் எந்த பொழுதிலும் நிருத்தியதாகவோ குறைத்ததாகவோ வரலாறு இல்லை. லட்சக்கணக்கான கோடிகளை நிதிநிலை அறிக்கையில் அறிவித்தே கொட்டிக் கொடுக்கும் அரசு, ஏழைகளுக்கு உணவு கொடுப்பதற்கு பொருளாதார நெருக்கடி வந்தால் நிறுத்திவிடுவோம் வரைவில் இருக்கும் போதே விதி ஏற்படுத்துவது எந்த அளவுக்கு கொடுமையானது? கொடூரமானது? அரசின் நோக்கத்திற்கு இதைவிட வேறு சான்று என்ன வேண்டும்?

இருபத்தைந்தாயிரம் பேர் மரணமடைந்தும், லட்சக் கணக்கானோர் பாதிப்படையவும் செய்த போபால் நச்சுக்கசிவு கொடுமையில் இத்தனை ஆண்டுகள் கழிந்தும் இன்னமும் முழுமையாக நிவாரணம் வழங்கப்படவில்லை. பெரும் அணைக்கட்டு திட்டங்களுக்காக தங்கள் வாழிடங்களை விட்டு இடம்பெயர்ந்தவர்கள் இழப்பீடுகளுக்காக இன்னமும் அரசிடம் கையேந்திக் கொண்டிருக்கிறார்கள். ஆனால், அரசு 25 கிலோவுக்கு பதில் பணம் கொடுப்பது குறித்து ஆலோசிப்பது மக்களுக்கு உணவு வழங்கலில் இருக்கும் நடைமுறை சிக்கல்களை தவிர்ப்பதற்காக அல்ல. இதன்பின்னே பெரும் சதித்திட்டமே மறைந்து கிடக்கிறது. ரேசன் கடைகள் மூலம் அரிசியோ கோதுமையோ மக்களுக்கு வழங்க வேண்டுமென்றால் விவசாயிகளிடமிருந்து அரசு பெருமளவில் கொள்முதல் செய்ய வேண்டும். ஆனால் பல ஆண்டுகளாக அரசு நேரடியாக கொள்முதல் செய்வதிலிருந்து படிப்படியாக விலகி வருகிறது. மட்டுமல்லாது தனியார் நிறுவனங்கள் விவசாயிகளிடமிருந்து கொள்முதல் செய்து கொள்வதற்கான அனுமதியை வழங்கியிருப்பதோடு, அவ்வாறு கொள்முதல் செய்வதற்கு வசதியாக கடைக்கோடி கிராமம் வரை சாலை வசதிகளையும் ஏற்படுத்தி வருகிறது. இந்த நிலையில் உணவுக்குப் பதிலாக பணமாக கொடுப்பது என்பது கொள்முதலை முற்றாக கைவிடுவதும், ரேசன் கடைகளை மூடுவதுமே அரசின் நோக்கம் என்பதின் வெளிப்பாடு தான்.

மெய்யாகவே அரசு மக்களுக்கு உணவு கிடைப்பதை உறுதி செய்யும் எண்ணமிருந்தால் அது என்ன செய்திருக்க வேண்டும்? விவசாய நாடான இந்தியாவில் உணவு உற்பத்தியில் போதுமான இலக்கை எட்ட அனைத்து விதங்களிலும் விவசாயிகளுக்கு உறுதுணையாக இருக்க வேண்டும். ஆனால் பல பத்தாண்டுகளாக அரசே திட்டமிட்டு விவசாயத்தை அழித்து வருகிறது என்பது வெளிப்படை. நீர்நிலைகளை பராமரிக்க மறுத்தது, உர நிறுவனங்களை கொழுக்க வைப்பதற்காக வேதிஉரங்களை விளைநிலங்களில் கொட்டி நிலத்தை மலடாக்கியது, பணப்பயிர் திட்டங்களை ஊக்குவித்ததன் மூலம் உணவு தானிய உற்பத்தியிலிருந்து விவசாயிகளை அப்புறப்படுத்தியது, மூன்று லட்சம் விவசாயிகள் தற்கொலை செய்து மாண்டு போயிருந்தும் அதை தடுப்பதற்கு எந்த முயற்சியும் செய்யாமல் கண்டு கொள்ளாமல் விட்டது, விவசாயிகளுக்குத் தெரியாமல் மரபணு மாற்ற திட்டங்களை புகுத்தியது, விதை நெல்லுக்கும் அன்னிய நிறுவங்களிடம் கையேந்தும் அவல நிலைக்கு விவசாயிகளை கொண்டு வந்தது, விளைபொருளுக்கு உரிய விலை தராமலும், விலை நிர்ணயம் செய்யும் உரிமையை விவசாயிக்கு தராமல் மறுத்ததும், வர்த்தகச் சூதாடிகளை அனுமதித்து விவசாயிகளை கருவறுத்தது, எல்லாவற்றுக்கும் மேலாக பசுமைப்புரட்சி எனும் புரட்டுத்திட்டம் என்று விவசாயத்திற்கு எதிராக இந்திய அரசின் நடவடிக்கைகளை கூறிக் கொண்டே போகலாம். விவசாயத்தை ஒழித்துவிட்டு அரசு எப்படி மக்களுக்கு உணவு வழங்கும்?

அரசின் ஒவ்வொரு நடவடிக்கையிலும், ஒவ்வொரு அசைவிலும் பன்னாட்டு, தரகு முதலாளிகளின் லாபத்தையும், அவர்களது வளர்ச்சியையும் தவிர வேறு எந்த வித எண்ணமும் இல்லை என்பது திண்ணம். இதை புரிந்து கொள்வதும் இதற்கு எதிராக விழிப்படைவதும் ஒன்று திரள்வதையும் தவிர மக்கள் தங்களைக் காத்துக் கொள்வதற்கு வேறு வழியில்லை.

மின்னூலாக(PDF) தரவிறக்க‌

செங்கொடியல்ல இஸ்லாமே கற்பனைகளின் களம் 12

பூமி உருண்டை என யார் சொன்னது அல்லாவா? மனிதனா?

எடுத்துக் கொள்ளப்பட்ட நண்பர் இஹ்சாஸின் பதிவு

பூமியின் வடிவம் குறித்த அந்த பதிவில், உருண்டை என குரான் கூறுவதாக சொல்லப்படும் வசனங்களில் பெரும்பாலான வசனங்கள் பூமியின் வடிவம் குறித்து எதுவும் கூறாமல் இரவு பகலின் காட்சியை விவரிக்கும் வசனங்களாக இருக்கின்றன என்பதையும்; தஹாஹா, துல்கர்னைன் குறித்த வசனங்கள் பொய்யாகவும், வலிந்து ஏற்றப்பட்டதாகவும் இருக்கின்றன என்பதையும்; இன்னும் ஏராளமான வசனங்கள் பூமியின் வடிவத்தை தட்டை எனும் பொருள்பட குறிப்பிட்டுள்ளன என்பதையும் விளக்கியிருந்தேன். இவற்றில் தஹாஹா குறித்து அந்த வசனத்திற்கு ஜாஹிர் நாயக் தவறான விளக்கம் கொடுத்து வருவதாக நண்பரும் சேர்ந்து கூறியிருப்பதால் அந்த வசனத்தை தள்ளுபடி செய்துவிடலாம். ஆனால் ஜாஹிர் நாயக் மட்டும் தான் வசனங்களுக்கு பொருந்தாத அறிவியல் விளக்கம் கூறியிருக்கிறாரா? வேறு யாரும் கூறுவதில்லையா? துல்கர்னைன் வசனத்திற்கு பிஜே அளிக்கும் விளக்கம் எப்படி அறிவியலற்று இருக்கிறது என்பதை கீழே பார்ப்போம்.

முதலில், இரவு பகல் காட்சிகளை விவரிக்கும் வசனங்கள் குறித்து நண்பர் குழப்பமான வாக்கியங்களில் கடந்து செல்கிறார். அந்த வசங்களில் பூமியின் வடிவம் குறித்த விளக்கம் இருக்கிறதா? இல்லையா? நண்பர் அதை சரி காண்கிறாரா? மறுக்கிறாரா? \\அதை தவறு என்று மறுக்கவில்லை. மாறாகஇதை 1400 வருடங்களுக்கு 

முன் என்ன 2800    வருடங்களுக்கு முன்இருந்தவர்களாலும் 

சொல்ல முடியும் என்கிறார். ஆக, இதற்களிக்கும்விளக்கத்தில்

 எந்த மறுப்பும் அன்னாருக்கில்லை என்றாகிவிட்டது// என்று குறிப்பிட்டிருக்கிறார். அதாவது அந்த வசனங்கள் பூமி உருண்டை என விளக்குவது போலவும், அதை நான் தகுந்த முறையில் மறுக்கவில்லை என்பது போலவும் ஒரு தோற்றத்தை ஏற்படுத்த முனைந்திருக்கிறார். ஆனால் புளி போட்டு விளக்கும் அளவுக்கு அந்த வசனங்களில் ஒன்றுமில்லை என்பதை அந்த பதிவில் தெளிவு படுத்தியிருக்கிறேன். \\ஏனென்றால் மனிதன் தோன்றிய காலம் முதல் இன்று வரை இரவு பகல் மாற்றம் மெதுவாக கொஞ்சம் கொஞ்சமாகத்தான் நிகழ்கிறது. அறிவியலின் வாசம் கூட இல்லாத இந்த ஒன்றுமற்ற வசனத்தை தான் மாபெரும் அறிவியல் கொண்டதாக புழுகுகிறார்கள்// ஒன்றன்பின் ஒன்றாக வருகிறது, தொடர்கிறது, அடுத்தடுத்து வருகிறது, ஒன்றை ஒன்று மூடுகிறது இதுபோன்று தான் அந்த வசனங்கள் இரவு பகலை விவரிக்கின்றன. மனிதன் தோன்றிய நாள் முதல் இரவு பகல் இப்படித்தான் வந்து கொண்டிருக்கிறது. இதைக் கூறுவதற்கு, ஆண்டவனிடம் டியூசன் படித்தவர்களால் மட்டும் தான் முடியுமா? ஆனால் அந்த வசனங்களில் பூமி உருண்டை என கூறப்பட்டிருப்பதாக ஜல்லியடிப்பதற்கு நிச்சயம் ஆண்டவனிடம் டியூசன் படித்திருக்க வேண்டும். அவ்வாறு டியூசன் எதுவும் படிக்கவில்லை என்பதால் தான் நண்பர் அவைகளில் உருட்டு விளக்கங்கள் கொடுக்காமல் தவிர்த்துக் கொண்டார் போலும்.

துல்கர்னைன் வசனங்களை எடுத்துக் கொண்டால், அந்த வசனங்களில் பிஜே அவர்கள் துப்பறிந்து பூமி உருண்டை என்று கண்டுபிடிப்பதை இதை சொடுக்கி கண்டு களியுங்கள். இந்த விளக்கத்தைத் தான் நண்பரும் தன்னுடைய மறுப்பில் எடுத்து வைத்திருக்கிறார். அதாவது பூமியில் நேர்கோட்டில் பயணம் செய்தால் சூரியன் மறைவதையும் உதிப்பதையும் பார்க்கலாம். அப்படி பார்ப்பதாக குரான் கூறுவதால் பூமி உருண்டை என்று உறுதிப்படுகிறது என்கிறார். இது எப்படி அடிப்படையற்றதாக இருக்கிறது என்பதைப் பார்ப்போம். திசைகள் என்பவை மனிதனுக்கான அடையாளங்கள் தாம், அண்ட வெளியில் திசைகள் இல்லை. சூரியன் உதிக்கும் திசை கிழக்கு, மறையும் திசை மேற்கு என்றால் சூரியன் கிழக்கில் உதித்து மேற்கில் சென்று மறைவதில்லை. பூமி சுழல்வதால் அப்படியான தோற்றம் வருகிறது. இப்போது ஒருவர் பூமியில் கிழக்கு நோக்கி பயணம் மேற்கொள்கிறார்(படம்) என்று கொள்வோம். அவரின் முகத்திற்கு எதிரே சூரியன் இருப்பதால் கிழக்காக செல்கிறார் என்று பொருள். தொடர்ந்து 90 பாகை கடந்ததும் அவர் தன் பாதையில் இயல்பாக மேற்கு நோக்கி திரும்பி விடுவாரா? நிச்சயம் மாட்டார். பூமியின் இரவுப் பகுதியில் நுழையும் போது அவரால் சூரியன் மறைவதை காண முடியாது. ஏனென்றால் சூரியனின் மறைவு அவரது பின் தலையில் நிகழும். 180 பாகை கடந்ததும், மீண்டும் அவர் சூரியன் உதிப்பதை காண முடியும். இப்படி அவர் எத்தனை சுற்றுகள் பூமியை சுற்றி வந்தாலும், சூரியன் உதிப்பதை மட்டுமே திரும்பத் திரும்ப காண முடியுமேயன்றி ஒருபோதும் அவரால் சூரியன் மறைவதை காண முடியாது. சூரியனின் மறைவை காண வேண்டுமென்றால் அவர் திரும்பி தன் திசையை மாற்றுவதைத் தவிர வேறு வழியில்லை. எனவே ஒருவர் கிழக்காகவோ, மேற்காகவோ எந்த திசையில் சென்றாலும் சூரியன் உதிப்பதையோ மறைவதையோ ஏதாவது ஒன்றை தான் காண முடியுமேயன்றி இரண்டையும் காண முடியாது. இரண்டையும் கண்டிருக்கிறார் என்றால், அவர் தன் திசையை மாற்றியிருக்கிறார் என்பதைத்தவிர வேறு ஒரு பொருளும் இல்லை. இதைத்தான் பதிவில் இப்படி \\நேர் கோட்டில் பயணம் செய்யும் ஒருவரால் ஒரே திசையில் சூரியன் உதிப்பதையும் மறைவதையும் காணமுடியாது// சுருக்கமாக குறிப்பிட்டிருந்தேன்.

இதே துல்கர்னைன் வசனத்தில் முதலில் ஒரு பாதை, பின்னர் ஒரு பாதை என்று குறிப்பிடப்பட்டிருப்பதை சுட்டிக்காட்டி அவர் இருவேறு திசைகளில் பயணம் செய்திருக்கிறார் என்று கூறியிருந்ததை மறுத்து நண்பர் \\அவர் இது வரை பயணம் செய்த வழி தரைவழிப்பயணம் எனபதையும் மேற்குத்திசை நோக்கி பயணம் செய்தார் என்பதையும் ….. பின்னர் ஒருவழியில் சென்றார் என்பதன் அர்த்தம் கடல் மார்க்கமாக அல்லது நீர்மார்க்கமாக பயணம் செய்ததை குறிப்பிடுகிறது என்பதை அறியலாம்// என்று குறிப்பிட்டிருக்கிறார். ஒரு வாதத்திற்காக அப்படியே வைத்துக் கொள்வோம். என்றாலும் அவர் திசையை மாற்றாமல் ஒரே நேர்கோட்டில் சென்றார் என்பதை எப்படி கூறுகிறார்கள்? ஒரே திசையில் தான் சென்றார் என்பதை அந்த வசனத்தில் எந்த சொல்லிலிருந்து எடுத்துக் கொண்டார்கள்? அவர்களுக்கு தேவை என்றால் எப்படி வேண்டுமானலும் வளைத்து, நெளித்து பொருள் சொல்வார்களா?

குரான் 2800 ஆண்டுகளுக்கு முன்பே எல்லாவற்றையும் கூறிவிட்டது என்று வாய்ப்புக் கிடைத்த எல்லோருமே கூறித் திரிகிறார்கள். ஜாஹிர் நாயக் கூறியது தவறு என்று நண்பர் கூறுகிறார். பிஜே கூறியதை என்ன செய்வது? ஆனால் இவர்களுக்கெல்லாம் முன்னால் சௌதி இமாம் ஷேக் இபின் பாஸ் பூமி தட்டை என்பதை ஏற்காதவர்கள் குரானை மறுக்கும் காபிர்கள் என்று வரலாற்று புகழ்மிக்க பத்வாவை வழங்கியிருக்கிறார் என்பது நண்பரின் கவனத்திற்கு.

பூமியின் வடிவம் குறித்து எதுவும் கூறாத வசனங்களை உலையில் பழுக்க வைத்து சம்மட்டியால் அடித்து நீட்டி பூமி உருண்டை என்று கதற வைக்கிறார்கள் என்பது ஒருபுறமிருந்தாலும்; பூமியின் வடிவத்தை தட்டை எனும் பொருளில் குறிப்பிடும் வசனங்களைக் கூட எப்படி உருண்டை என்று பொய் சாட்சி சொல்ல வைத்துவிடுகிறார்கள் என்பதை அந்த பதிவில் விளக்கியிருந்தேன். அதை மறுக்க வேண்டும் என நினைத்த நண்பர் எப்படி மறுப்பது என்பது புரியாததால் அறிவை ஐயப்படுகிறார். பூமியை விரித்தான் என்று கொண்டாலும், பூமியில் விரித்தான் என்று கொண்டாலும் அங்கு பூமி உருண்டை எனும் பொருளை அதிலிருந்து பெறமுடியாது. இதை தெளிவாகவே கேட்டிருக்கிறேன், \\ எந்த வடிவத்தில் அந்த விரிப்பு விரிக்கப்பட்டிருக்கிறது? சமதளத்திலா? அல்லது உருண்டை வடிவத்திலா? என்ற கேள்விக்கு குரானில் விடை இருக்கிறதா? பூமி உருண்டையாக இருப்பதனால் அதன் மேலும் விரிப்பை பரப்ப முடியும் என்ற முடிவுக்கு வரமுடிகிறது. பூமி உருண்டையா தட்டையா என்று தெரியாது எனக்கொண்டால் குரானிய வசனங்களின் படி உருண்டை தான் என எப்படி உறுதிப்படுத்துவது?// சதுரமாக இருந்தாலும், முக்கோணமாக இருந்தாலும் விரிப்பை விரிக்க முடியும். பூமியில் விரிக்கப்பட்டிருக்கும் விரிப்பு எந்த வடிவின் மேல் விரிக்கப்பட்டிருக்கிறது? இதற்கு பதில் சொல்ல இன்னொரு முகம்மதா வருவார்? இருக்கும் முகம்மதுகள் தான் பதில் கூற வேண்டும்.

முகம்மது பிறப்பதற்கு வெகு காலத்திற்கு முன்னதாகவே பூமி உருண்டை என்பது மக்களுக்கு தெரிந்து தான் இருந்தது. கடலாடிகள் தங்கள் பட்டறிவின் மூலமும், அறிவியலாளர்கள் ஆய்வுகள் மூலமும் அதை வெளிப்படுத்தி இருந்தார்கள். இதில் புளகமடையும் விதமாக நண்பர் தன் நேர்மையுணர்ச்சியை வெளிப்படுத்தியிருக்கிறார். ஒரே செய்தியை நானும் அவரும் கூறியிருப்பதை பாருங்கள். \\கிரேக்கர்கள் சீனர்கள் இந்தியர்கள், அராபியர்கள் கடலாடிய செய்திகள் பண்டைய இலக்கியங்களில் விரவிக்கிடக்கின்றன. ….. பூமியின் வடிவம் உருண்டை என்பதை பட்டறிவாகவே விளங்கி வைத்திருந்தனர்// இது நான். \\இந்தியா, சீனா, கிரேக்கம் போன்ற நாடுகளில் குறிப்பிட்டது முகம்மது 

நபிக்குஎப்படித் தெரியும்?// இது நண்பர். அரபியர்களை மட்டும் நேர்மையாக மறைத்து விட்டார். தொடர்ந்து எனக்கு நெத்தியடி, சாட்டையடி முதல் இன்னும் பலவாறான அடிகளை அடிப்பதாக எண்ணிக் கொண்டு கேள்விகளாக அடுக்கியிருக்கிறார். ஸ்ஸ்ஸ்ஸ்யப்பா, முடியல (வடிவேலு பாணியில் படித்துக் கொள்ளவும்)

பூமி உருண்டை என்று குரான் கூறுகிறதா? என்பது எடுத்துக் கொண்ட தலைப்பு. ஆம் கூறுகிறது என்பதாக சுட்டப்படும் வசனங்களை மூன்றாக பிரித்து 1) இரவு பகல் காட்சி வசனங்களில் பூமி உருண்டை என்று கூறப்படவில்லை, 2) தஹாஹா, துல்கர்னைன் வசனங்களில் பூமி உருண்டை என்று கூறப்படவில்லை, 3) தட்டை என்று பொருள் கொள்ளத்தக்க வசனங்களிலும் பூமி உருண்டை என்று கூறப்படவில்லை என்பதை தெளிவுபடுத்தியிருக்கிறேன். மேலதிகமாக முகம்மதின் காலத்திற்கு வெகுமுன்பே பூமி உருண்டை என்பது நிருபணமாகியிருக்கிறது என்பதையும் எடுத்தியம்பி இருக்கிறேன். இதை மறுக்க வேண்டும் என்பதற்காக ஏதேதோ உளறி வைத்திருக்கும் நண்பர், அறிவுடன் தான் எழுதுகிறேனா? என்றும் கேட்டிருக்கிறார். மெய்யாகவே நண்பருக்கு அறிவு முற்றி இருக்கும் துளைகள் வழியாகவெல்லாம் வெளியேறிக் கொண்டிருப்பதாக எண்ணினால் உருப்பெருக்கி கொண்டு குரானின் வரிகளுக்கிடையே தேடி பூமி உருண்டை என்று கூறும் வசனங்களை கூற முயலட்டும், அவரால் முடிந்தால்.

இதுவரை

செங்கொடியல்ல, இஸ்லாமே கற்பனைகளின் களம்    
செங்கொடியல்ல, இஸ்லாமே கற்பனைகளின் களம் ௨   
செங்கொடியல்ல, இஸ்லாமே கற்பனைகளின் களம் ௩   
செங்கொடியல்ல, இஸ்லாமே கற்பனைகளின் களம்    
செங்கொடியல்ல, இஸ்லாமே கற்பனைகளின் களம் ௫   
செங்கொடியல்ல, இஸ்லாமே கற்பனைகளின் களம் 6  
செங்கொடியல்ல, இஸ்லாமே கற்பனைகளின் களம் 7  
செங்கொடியல்ல, இஸ்லாமே கற்பனைகளின் களம் 8   
செங்கொடியல்ல, இஸ்லாமே கற்பனைகளின் களம் 9  
செங்கொடியல்ல, இஸ்லாமே கற்பனைகளின் களம் 10
செங்கொடியல்ல, இஸ்லாமே கற்பனைகளின் களம் 11

மின்னூலாக(PDF) தரவிறக்க‌

முல்லை பெரியாறு: கேரள அடாவடியும் தமிழகத்தில் எழுச்சியும்

நீறு பூத்து கனன்று கொண்டிருந்த முல்லைப் பெரியாறு அணை பிரச்சனையை கேரளாவில் நடக்கவிருக்கும் இடைத்தேர்தல் விசிறிவிட்டு வெடித்துப் பரவச் செய்திருக்கிறது. எதிர்க்கட்சியும் ஆளும்கட்சியும் சம எண்ணிக்கையில் இருக்கும் கேரள சட்டமன்றத்தில் வரப்போகும் ஒரு தொகுதிக்கான இடைத்தேர்தல் அவைகளுக்கான இழுபறியை வாழ்வா சாவா நிலைக்கு கொண்டு வந்து விட, இரண்டுக்குமே முல்லை பெரியாறு ஆயுதமாகி இருக்கிறது. ஓட்டுக்கட்சி பன்றித் தொழுவத்தில் களறியிடுவது என்று ஆனபின் கம்யூனிஸ்டுகள் என்று பெயரை மட்டும் தாங்கியிருப்பதால் கட்சி நிலைபாடு குறித்து பரிசீலனை ஏற்பட்டுவிட முடியுமா? தங்கள் பங்குக்கு அள்ளிப் பூசிக் கொண்டிருக்கிறார்கள்.

முல்லை பெரியாறு குறித்து கேரளா எடுத்து வைக்கும் அனைத்து வாதங்களும் உண்மைக்கு மாறானவை என்பதோடு மட்டுமல்லாமல் தமிழகத்தினால் முறியடிக்கவும் பட்டிருக்கின்றன. நீதிமன்ற தீர்ப்பு உட்பட தமிழகத்தின் முயற்சிகளையும், முன்னேற்றங்களையும் கேரளா அநீதியான முறையிலேயே மீறிவந்திருக்கிறது. என்றாலும் கூட இன்றைய நிலையில் முல்லை பெரியாறு குறித்து கேரள மக்களிடம் இருக்கும் உணர்வு தமிழக மக்களிடம் இல்லை. தேனி உள்ளிட்ட இடங்களில் மட்டுமே மக்கள் போராடி வருகிறார்கள், ஏனைய பகுதிகளில் இன்னமும் இது செய்தியாகவே பார்க்கப்படுகிறது. ஊடகங்களும், ஓட்டுக்கட்சி அரசியல்வாதிகளும் கேரளாவில் செய்ததைப் போன்ற ஒருங்கிணைந்த பரப்புரையை தமிழக ஊடகங்களோ, இங்குள்ள ஓட்டுக்கட்சிகளோ செய்யவில்லை.

கொந்தளிப்பான இன்றைய நிலையிலும் கூட, கேரளா தண்ணீர் தர மறுக்கிறது என்பது போன்று தான் இங்கு பரப்புரை செய்யப்பட்டு வருகிறது. இதற்கு மாறாக புதிய அணை கட்டி தண்ணீர் தருகிறோம் என்று தானே கூறுகிறோம் மறுக்கவில்லையே என்று கேரளாவிலும் பேசப்பட்டு விருகிறது. ஆனால் இது தண்ணீர் பற்றாக்குறை குறித்த பிரச்சனையல்ல, அணையின் உரிமை யாருக்கு எனும் பிரச்சனை. இது புரியவைக்கப்படாததால் தான் அவர்கள் தான் தண்ணீர் தருகிறோம் என்று கூறுகிறார்களே எனும் எண்ணம் தமிழகத்தின் பிறபகுதிகளில் நிலவுகிறது.

1979ல் தொடங்கிய இந்தப் பிரச்சனையில் அடாவடி செய்யும் கேரளத்திற்கு சாதகமாக பல்வேறு கட்டங்களில் தமிழக ஒட்டுக் கட்சிகளால் விட்டுக் கொடுப்புகள் செய்யப்பட்டிருக்கின்றன. தமிழகத்தின் வசம் இருந்த இந்த அணையின் பாதுகாப்பு பணியை 1980ல் கேரள காவல்துறைக்கு மாற்ற அனுமதித்தார் எம்.ஜி.ஆர். தொடர்ந்து அணையை பலப்படுத்த எடுத்த முயற்சிகளுக்கு கட்டுமான ஊழியர்களை தாக்குவது, பொறியாளர்கள் மீது வழக்கு தொடுத்து கைது செய்வது, வாகனங்களை கைப்பற்றுவது என்று ஆண்டுக்கணக்கில் கேரள அரசுகள் செய்து வந்த இடையூறுகளுக்கு எதிராக தமிழகத்தில் எம்.ஜி.ஆர்., கருணாநிதி அரசுகள் சிறு முணுமுணுப்பைக் கூட காட்டியதில்லை. அவ்வளவு ஏன், ஒரு சட்டமன்ற தேர்தலின் போது கேரளாவில் போட்டியிட்ட ஜெயா தலைமையிலான அதிமுக தேர்தல் வாக்குறுதியில் முல்லை பெரியாறு அணையில் நீரை தேக்க அனுமதிக்க மாட்டோம் என்று கூறியே ஓட்டுக் கேட்டது. 2006ல் நீர் மட்டத்தை உயர்த்திக் கொள்ளலாம் என நீதி மன்ற தீர்ப்பு வந்தபோது ஆட்சியில் இருந்த ஜெயா, அதை செயல்படுத்த எந்த நடவடிக்கையும் எடுக்கவில்லை. தீர்ப்புக்குப் பிறகு, கேரளா அளித்த வரைவுத் திட்டத்தை ஏற்று ஐவர் குழுவை நீதிமன்றம் ஏற்படுத்தியபோது அதை எதிர்த்திருக்க வேண்டிய கருணாநிதி ஏற்றுக் கொண்டார். இப்படி கொஞ்சம் கொஞ்சமாக அணையின் மீதான தமிழகத்தின் உரிமைகளை கேரளா கபளீகரம் செய்தபோது ஒற்றுமையாய் ஆதரித்த ஓட்டுக் கட்சிகள், இன்று கேரளத்திற்கு எதிராக அனைத்துக் கட்சிகளும் ஓரணியில் நிற்பதாக படம் காட்டுகின்றன.

நீதிமன்றங்களும் பலமுறை நியாயமற்று கேரள சார்பு நிலைப்பாட்டை எடுத்துள்ளன. உச்சநீதி மன்றம் தான் வழங்கிய தீர்ப்பை நடைமுறைப்படுத்த மறுத்து, கேரளா செய்த மேல்முறையீட்டு மனுவை தானே விசாரித்தது எந்த சட்ட அடிப்படையில் வரும்? உச்சநீதி மன்றம் தீர்ப்பு வழங்கிய சில நாட்களில் புதிய சட்டத் திருத்தத்தைக் கொண்டுவந்து தீர்ப்பை செல்லாக் காசாக்கியது கேரளா. இதை எதிர்த்து தமிழ்நாடு அந்த சட்டத் திருத்தத்தை ரத்து செய்ய வேண்டும் என்று வழக்கு தொடர்ந்தது. இந்த வழக்கையும், அதாவது கேரள சட்டமன்றத்தில் செய்யப்பட்ட சட்டத் திருத்தத்தை ஏற்கலாமா? கூடாதா? என்று தீர்ப்பளிக்க வேண்டிய இந்த வழக்கையும், ஏற்கனவே அணையின் நீர்மட்டத்தை உயர்த்த வேண்டும் என்று அளிக்கப்பட்ட தீர்ப்ப்பை எதிர்த்து கேரளா தொடர்ந்த மேல் முறையீட்டு மனுவையும் ஒன்றாக இணைத்து ஐந்து நீதிபதிகள் கொண்ட சட்ட அமர்வுக்கு மாற்றியது எந்த சட்ட அடிப்படையில் சரியானது? இரண்டு வேறு வேறு வழக்குகளை ஒன்றாக இணைத்ததன் மூலம் உச்சநீதி மன்றம் தான் வழங்கிய தீர்ப்பை தானே குப்பைக் கூடைக்கு அனுப்பியது. இத்தனைக்கும் மேலாக வழக்குகள் நிலுவையில் இருக்கும் நிலையிலேயே, அந்த இடத்தில் புதிய அணை கட்டுவதற்கான ஆய்வுகளை நடத்த கேரளாவுக்கு அனுமதி வழங்குகிறார் காங்கிரஸ் அமைச்சர் ஜெய்ராம் ரமேஷ். ஆக கேரள அரசு, உச்சநீதி மன்றம், மத்திய அரசு ஆகிய மூன்றும் இணைந்து தான் முல்லை பெரியாறு பிரச்சனையை இன்று கொதி நிலைக்கு கொண்டு வந்திருக்கின்றன.

திமுக வழக்கம் போல உண்ணாவிரதம், மனிதச் சங்கிலி என்று போராட்டங்களையும்(!) இந்த விசயத்தில் தமிழக அரசுடன் ஒத்துழைப்போம் என்று அரசியல் நாகரீகத்தையும்(?) காட்டிக் கொண்டிருக்கிறது. ஜெயாவோ தானே உண்ணாவிரதம் இருந்துவிடலாமா? அல்லது ஒரு நாள் பந்த் நடத்தலாமா? என்று சோதிடர்களிடம் ஆலோசனையில் ஈடுபட்டிருக்கிறார். தமிழ்வாதக் கட்சிகளோ மலையாளிகளை அடி, மலையாளக் கடைகளை நொறுக்கு என்று இனவாதத்தை தொடங்கி விட்டார்கள். வைரமுத்து போன்ற உலக மகா கவிஞர்களுக்கு சோவியத் யூனியன் ஞாபகத்திற்கு வந்துவிட்டது. தேசியக் கட்சிகளான காங்கிரஸ், பாஜக, போலிகள் மாநிலத்திற்கு ஏற்றார்ப் போல் பேசிக் கொண்டிருக்கிறார்கள். எப்போதும் ’சவுண்டு’ மட்டுமே விடும் இளங்கோவன் இப்போதும் உம்மன் சாண்டியை டிஸ்மிஸ் செய்ய வேண்டும் எனக் கூறியிருக்கிறார். இதை ஏன் அவர் சோனியா காந்தியிடம் கூறக் கூடாது? அணையை உடைக்க கம்பிகளுடன் வெறித்தனத்தைக் காட்டிய கேரள பாஜகவை தண்டிக்கக் கோரி பாஜக தலைமையிடம் தமிழக பாஜக வற்புறுத்தலாமே, இந்தப் பிரச்சனையை தோற்றுவித்து எண்ணெய் ஊற்றி வளர்த்து வரும் கேரள தோழர்(!)களிடம் இங்குள்ள சீபீஎம் மேடையில் சர்வதேசியம் பேசிக் கொண்டும் மக்களிடம் பிராந்திய இனவெறியை கிளப்பியும் கம்யூனிச வித்தை காட்டுவது குறித்து விமர்சனம் வைக்கலாமே. அதைவிட்டு கேரளாவில் அணையை உடை என்றும் தமிழ்நாட்டில் அணையை பாதுகாப்போம் என்றும் இந்தக் கட்சிகள் வசனம் பேசுவது அப்பட்டமான மோசடி அல்லவா?

இவைகளுக்கு மாறாக, தேனி பகுதியிலுள்ள விவசாயிகள் புதிய எழுச்சி மிகுந்த வரலாற்றை படைத்திருக்கிறார்கள். எழுபதாயிரம் விவசாயிகள் வரை திரண்டு, ஓட்டுக் கட்சிகளைப் புறக்கணித்து அணையைக் கைப்பற்ற கிளம்பி விட்டார்கள். குமுளி வழியான கேரள எல்லையை அடைத்து போக்குவரத்தையும், கேரளாவுக்கு அனுப்பப்படும் பொருட்களையும் தடை செய்தது கேரளாவில் பெரும் பாதிப்பை ஏற்படுத்தியிருக்கிறது.

கேரளாவைப் பொருத்தவரை ஓட்டுக் கட்சிகளின் நச்சுப் பரப்புரைகள் ஊடக பலத்தினாலும், தொடர்ச்சியான முனைப்பினாலும் கடைக்கோடி மக்களையும் சென்றடைந்திருக்கிறது. மட்டுமல்லாது, அணை உடைந்து பல லட்சம் மக்கள் செத்து மடிவதைப் போன்ற குறுந்தகடுகள் வரைகலை உத்திகளுடன் தயாரிக்கப்பட்டு திட்டமிட்டு பரப்பப்பட்டதால் பீதியடைந்திருக்கும் மக்கள் இயல்பாகவே கேரள ஓட்டுப் பொறுக்கிகளின் கோரிக்கைகளுடன் ஒன்றிப் போய்விட்டார்கள். இந்த மக்கள் ஆதரவு எனும் பலம் இருப்பதுதான் கேரள ஓட்டுக் கட்சிகளின் சண்டித்தனங்களுக்கு தடமேற்படுத்தித் தந்திருக்கிறது. ஆனால் அவர்களின் தேவையற்ற பயமும், புரிதலற்று ஓட்டுக் கட்சிகளின் பின்னே அணிவகுப்பதும், தமிழகத்தின் ஐந்து மாவட்ட மக்களின் வாழ்வாதாரத்தோடு தொடர்புடையது என்பது அவர்களுக்கு உணர்த்தப்பட்டாக வேண்டும். அவ்வாறு உணர்த்துவதற்கும், கேரள ஓட்டுப் பொறுக்கிகளுக்கு ஒரு நெருக்கடியை ஏற்படுத்துவதற்கும் பயன்படுமாயின் குமுளி, களியக்காவிளை, செங்கோட்டை உள்ளிட்ட இடங்களில் போக்குவரத்தை நிறுத்தி காய்கறி உள்ளிட்டு பொருட்களின் தடையை ஏற்படுத்தலாம். ஆனால், அது ஒருபோதும் இனவாத அடிப்படையில் பயன்படுத்தப்படக் கூடாது. கேரளாவுக்கு அனுப்பப்படும் பொருட்களை உற்பத்தி செய்வதற்கே 500 டி.எம்.சி க்கு மேல் தண்ணீர் தேவைப்படுகிறது என்பதை அவர்களுக்கு உணர்த்தலாம்.

பிரச்சனை என்று வந்தால் பேச்சுவார்த்தை நடத்துங்கள் என்று கூறுவதையும், கமிட்டி அமைத்து ஆறப் போடுவதையும் வழமையாக வைத்திருக்கும் மத்திய அரசு, அதை மீறிப்போகும் மாநிலத்தை வழிக்கு கொண்டுவர என்ன செய்திருக்கிறது இதுவரை? அதிகாரிகள் தொடங்கி கடைநிலை ஊழியர்கள் வரை பேச்சு வார்த்தை நடத்தி பின் வழக்கு தொடுத்து தீர்ப்பு வந்தபின் அதையும் செயல் படுத்தாமல் மீறும் மாநிலத்தை ஒன்றும் செய்யாமல் வேடிக்கை பார்த்தால், பாதிக்கப்பட்ட மாநிலம் என்ன செய்வது? முன்னர் வந்த தீர்ப்பை கழிப்பறை காகிதமாக்கியது போல் கேரளா இனியும் நடக்காது என்பதற்கு என்ன உத்திரவாதம்? புவியியல் ரீதியாக கடைமாநிலத்தில் வாழும் மக்கள் தண்ணீருக்காக பிற மாநிலங்களிடம் கையேந்த வேண்டுமா? மாநிலங்களிடையேயான பகிர்வில் பொது ஒழுங்கை மீறும் அரசுகள் மீது இராணுவ நடவடிக்கை எடுக்கப்பட வேண்டும். ஆனால் கேரளாவைக் கண்டிக்குமாறு கோரிக்கை விடுக்கக் கூட தமிழ்நாட்டல் முடியவில்லையே ஏன்? ஏனென்றால், தேவையான உரிமைகள் மாநிலங்களுக்கு இல்லை. பிரிந்து போகும் உரிமையுடன் கூடிய சுயநிர்ணய உரிமை என்பது வெறுமனே பிரிந்து போகும் உரிமையல்ல. எந்த மாநிலமும் எல்லை மீறாதிருக்கவும் மீறும் போது அதை ஒழுங்கிற்குள் கொண்டுவர தேவையான ஏற்பாடுகளைக் கொண்டதாகவும் இருக்கும்.

தேனி பகுதியில் விவசாயிகளிடம் ஓட்டுக்கட்சிகளை புறந்தள்ளி ஏற்பட்டிருக்கும் இந்த எழுச்சி தமிழகத்தின் அனைத்து பகுதிகளிலும் பரவ வேண்டும். அது பிரிந்து போகும் உரிமையுடன் கூடிய சுய நிர்ணய உரிமையை நோக்கி நகர வேண்டும். இப்போதே பிற பகுதிகளில் வணிகர்கள் உள்ளிட்ட அமைப்புகள் கடையடைப்பு போன்ற போராட்டங்களை நடத்தி வருகின்றன. இவைகளை ஆதரிப்பதும், அதை இலக்கு நோக்கி வளர்த்தெடுப்பதுமே நம்முன் உடனடிக் கடமையாக இருக்கிறது.

தொடர்புடைய பதிவுகள்

முல்லைப் பெரியாற்றின் சிக்கல்களுக்கு அணை கட்டுவது எப்போது?

முல்லை பெரியாறு அணை பிரச்சனையும் தீர்வும் – ஆவணப்படம்

நெய்யாறு: கேரள அடாவடியும், சிபிஎம்மின் எடுபிடியும்

மின்னூலாக(PDF) தரவிறக்க‌

இந்த மண்ணில் சொர்க்கத்தைப் படைப்போம் 21

ஸ்டாலின் துற்றப்படுவது ஏன்?: பகுதி 21

டிராட்ஸ்கிய சதியில் வெளிநாட்டு உளவாளிகளின் தொடர்புகள் குறித்து …

 

சோவியத்தில் டராட்ஸ்கிய சதி பற்றி சர்வதேச ரீதியாக பல தகவல்கள் அன்று வெளியாகியது. அதேநேரம் அன்று சோவியத்தில் என்ன நடந்தது என்பது தொடர்பாக ஏகாதிபத்திய மதிப்பீடுகள் என்னவாக இருந்தது என்பதை பார்ப்போம். டிராட்ஸ்கி 1920 களில் லெனினை எதிர்த்து பகிரங்கமாகவும் இரகசியமாகவும் தனக்கான கோஷ்டியை உருவாக்கி, பிளவு நடவடிக்கையில் ஈடுபட்டதை லெனின் குறிப்பில் இருந்து பார்த்தோம் அல்லவா. இதை குறிப்பிட்டு சோவியத்தில் உளவாளியாக செயற்பட்ட பிரிட்டீசின் இரகசிய இலாக்காவைச் சேர்ந்த புருஸ் லோக்கார்ட் தனது குறிப்பில் “லெனினுக்கும் டிராட்ஸ்கிக்கும் இடையில் கருத்து வேறுபாடு” என தனது இரகசிய பிரிவுக்கு செய்தி அனுப்பினான். அமெரிக்க நிருபர் ஜசக் இந்நிலை தொடர்பாக கொடுத்த அறிக்கையில் “லெனினுடைய ஆட்சி கவிழ்ந்து விடும். டிராட்ஸ்கியும் அவனுடைய இடதுசாரிக் கூட்டத்தினரும் ஆதிக்கத்துக்கு வந்து விடுவர் என்றும் கம்யூனிஸ்டு வாலிபர்களும், பல அதிகாரிகளும், செம்படை வீரர்களும் டிராட்ஸ்கிக்குப் பக்கபலமாகி விடுகிறார்கள்” என அறிவித்தான். இக்காலத்தில் டிராட்ஸ்கி நாடு முழுவதும் சுற்றித் திரிந்ததுடன் பல கூட்டங்களில் “பழைப போல்சுவிக்குகள் பிற்போக்குகளாகி விட்டனர் வாலிபர்களே! என்பக்கம் வாருங்கள்” என அறைகூவல் விடுத்தான். இந்த நிலையில் தான், லெனின் மிக கடுமையாக இந்த போக்கை அம்பலப்படுத்தி விவாதித்ததின் ஒரு பகுதியை நாம் முந்தைய பகுதிகளில் பார்த்தோம். இதில் டிராட்ஸ்கி தோற்றுப் போன போது, ஒரு நாளும் தன்னை சுயவிமர்சனம் செய்யவில்லை. தனது மார்க்சிமல்லாத போக்கை நிறுத்திவிடவும் இல்லை. மாறாக பலாத்காரமான முறையிலும், சதிகள் மூலம் ஆட்சியை கவிழ்க்கும் முயற்சியை தொடங்கினான். கோஷ்டிவாதம் கூர்மையாகியது. லெனின் கட்சிக்குள் கோஷ்டி கட்டுவதை தடை செய்தார். இருந்தும் டிராட்ஸ்கிய குழு இரகசிய மற்றும் சட்டபூர்வமான அனைத்து வழியிலும், தன்னை ஒரு இரகசிய சதிக் குழுவாக புனர்நிர்மாணம் செய்து கொண்டது.

 

இந்த நிலையில் 1924 ஜனவரி 21 இல் லெனின் மரணமடைந்தார். லெனின் மரண நிகழ்ச்சியில் கூட, டிராட்ஸ்கி பங்கு கொள்ளவில்லை. அவரின் குடும்பத்துக்கு ஒரு இரகங்கல் செய்தியைக் கூட டிராட்ஸ்கி அனுப்பவில்லை. 1924 மே மாதம் நடந்த கட்சிக் காங்கிரசில், லெனினுக்குப் பிறகு அதிகாரத்தை கைப்பற்ற முனைந்தான். தனது கோஷ்டியைச் சேர்ந்த பல டிராட்ஸ்கிவாதிகள் இதை தடுத்த நிலையிலும், ஸ்டாலினுக்கு எதிராக தேர்தலில் போட்டியிட்டான். இருந்த போதும் 748 உறுப்பினர் ஒரு முகமாகவே ஸ்டாலினைத் தேர்ந்தெடுத்தனர். இதைத் தொடர்ந்து டிராட்ஸ்கி சதிகள் மேலும் இரகசியமாக கையாள முயன்றான். இதற்காக வெளிநாட்டு சதிக்குழுக்களுடன் சேர்ந்தான்.

 

பிரிட்டீஸ் உளவுப் பிரிவைச் சேர்ந்த சார்ச்சிலுடன் தொடர்பு கொண்டான். சார்ச்சில் தனது நூலில் ஒன்றில் இது பற்றி “1924 ஜூலை மாதத்தில் காமனேவும், டிராட்ஸ்கியும் அவனை (சாவிங்கோவ்) திரும்பி வரும்படி அழைத்தார்கள்” இதைத் தொடர்ந்து சாவிங்கோவ் சோவியத்துக்குச் சென்றான். ஆனால் சோவியத் அரசு அவனைக் கைது செய்தது. இது தொடர்பாக இரு வெவ்வேறு நாட்டு உளவுப் பிரிவினருக்கு இடையே நடந்த கடிதத் தொடர்பை இங்கு ஆராய்ந்து பார்ப்போம்.

 

பிரியமுள்ள ரெயிலி, உங்கள் கடிதம் கிடைத்தது. தொடக்கத்தில் நான் எதிர்பார்த்ததே நிகழ்ந்து விட்டது. சாவிங்கோ மீது மிகுந்த கோபம் கொள்ள மாட்டிர்கள் என நினைக்கிறேன். அவன் தப்ப முடியாத நிலையில் சிக்கிக் கொண்டான். அத்தகைய நிலையை வெற்றிகரமாக சமாளித்தவர்களுக்குத் தான், அவனைக் கண்டிக்க உரிமை உண்டு. சவிங்கோவின் கதை முழுவதும் தெரிவதற்கு முன் அவனைப்பற்றி நான் கொண்டுள்ள கருத்தை மாற்றிக் கொள்ள விரும்பவில்லை. –சார்ச்சில்

 

டிராட்ஸ்கி தான் ஆட்சிக்கு வருவதற்கான சதிக்கு, உள்நாட்டு மற்றும் வெளிநாட்டு சக்திகள் அனைத்தையும் பயன்படுத்தினான். டிராட்ஸ்கி எல்லாவித இடது, வலது அமைப்புக்களையும் பயன்படுத்தினான். ஸ்டாலினின் தலைமையிலான பாட்டாளி வர்க்க ஆட்சியை கவிழ்த்துவிடுவதே ஒரே நோக்கமாக கொண்டு செயலாற்றினான். இதேநேரம் உள்நாட்டில் நிலமைகள் மோசமாகிச் சென்றது. டிராட்ஸ்கி கட்சியை எதிர்த்து தீவிரமாகச் செயற்பட்டான். என் வாழ்க்கை வரலாறு என்ற தனது நூலில் இதையொட்டி டிராட்ஸ்கி எழுதுகின்றான் “கட்சிச் சண்டை வலுத்து 1926 ஆம் ஆண்டு வசந்த காலத்தில் எதிர்க்கட்சி, வெளிப்படையாக கட்சிக் கூட்டத்தில் கலவரம் செய்து எதிர்ப்பு பின்வாங்க நேரிட்டது.” என டிராட்ஸ்கி தனது சொந்த வாக்குமூலத்தில் தருகிறான். அதாவது எதிர்த்து நிற்க முடியாத நிலமை ஏற்பட்டதால், அதற்கான காலம் கனியும் வரை பின்வாங்கினான் டிராட்ஸ்கி. டிராட்ஸ்கி கூறும் எதிர்க்கட்சி எங்கிருந்தது, கட்சிக்குள் அல்லவா! லெனின் கோஷ்டிவாதத்தை தடை செய்து இருந்தார். ஆனால் டிராட்ஸ்கி இம்மியும் கூட அதைப் பின்பற்றவில்லை. ஆனால் தம்மை தாம் இன்று லெனினியவாரிசுகள் என்ற கூறுவதில் என்ன தார்மிக பலம் தான் உண்டு. மறுபக்கத்தில் ஆட்சியை கவிழ்க்கும் அளவுக்கு கலகம் செய்ய கூட ஜனநாயகம் இருந்துள்ளது. கட்சியின் ஜனநாயக மத்தியத்துவத்தையும், ஆட்சி அதிகாரத்தையும் கூட மிக கேவலமாக மார்க்சியத்துக்கு புறம்பாக துஸ்பிரயோகம் செய்தனர். இதையே மார்க்சியம் என்று இன்றும் பிதற்றுகின்றனர்.

 

இப்படி இருக்க ஸ்டாலினுக்கு எதிரான எதிர்ப்பை, எதிரி வர்க்கத்தில் இருந்தும் திரட்டினான். “1926 இல் 6 வீதமான குலாக்கள் (நிலப்பிரபுகள்) கோதுமை உற்பத்தியில் 50 சதவீதத்தை கட்டுப்படுத்தி சந்தையை நிர்வாகித்தனர்” இந்த வர்க்கத்தையும், இடைக்கால பொருளாதார திட்டத்தை சார்ந்து உருவான சுரண்டும் வர்க்கத்தையும் பிரதிபலித்த கட்சி உறுப்பினர்களின் ஆதாரவையும், தனது பக்கத்தில் டிராட்ஸ்கி திரட்டினான். 1927 இல் சோவியத் மீது  அன்னிய நாடுகளால் போர் தொடுக்கப்படும் என்ற நிலை நிலவிய காலத்தில், அதைப் பயன்படுத்தி தனது அதிகாரத்தை நிறுவ டிராட்ஸ்கி மீளவும் தனது தாக்குதலைத் தொடங்கினான். அதை டிராட்ஸ்கி “என் வாழ்க்கை” என்ற நூலில் அழகாகவே வாக்குமூலம் தந்திருக்கிறார். “மாஸ்கோ, லெனின்கிராட் ஆகிய இரு நகரங்களில் பல இடங்களில் இரகசியக் கூட்டங்கள் நடந்தன. தொழிலாளர்களும், மாணவர்களும், மாணவிகளும் இருபது முதல் இருநூறு நபர்கள் வரை, கூட்டங்களுக்கு வந்திருந்தார்கள். ஒரே நாளில் நான்கு கூட்டங்களுக்கு நான் போனதுண்டு” என தனது சதியை கூறுவதில் வெக்கப்படவில்லை. சதி நடந்தது என்பது வெட்டவெளிச்சமாகின்றது. கட்சிக்குள் இருந்தபடி செய்த இந்த சதியைத்தான் இவர்கள் மார்க்சியம் என்றனர். இந்தளவுக்கு கட்சியில் இருந்தபடி இதைச் செய்ததுடன், எந்தளவுக்கு சோவியத் ஆட்சியில் கருத்துச் சுதந்திரம் என்பது சதிவரைக்கு கூட அனுமதியளித்திருந்தது என்பதையும் வெளிப்படுத்தினர். 1917 இல் புரட்சி நடந்த கொண்டாட்ட நாளான 1927 நவம்பர் 7 ஆம் நாள், எதிர்புரட்சி ஆட்சிக் கவிழ்ப்பை நடத்த டிராட்ஸ்கி திட்டமிட்டான். சதிகளின் ஈடுபட்டு இன்று உயிருடன் இருப்பவர்கள் வழங்கிய வாக்கு மூலங்களில் இது சுட்டிக் காட்டப்படுகின்றது. இதை டிராட்ஸ்கிகள் இன்று பெருமையுடன் வெளியிடுகின்றனர். அதில் 1932 இல் “இடது எதிர்ப்பாளர்களின் அங்கத்தவர்கள் தனது தாயின் வீட்டில் ஒன்று கூடினர் என்பது தொடர்பாகக் கூறினார். இக்கூட்டத்தில் சினோவியேவ், கமனேவ் தாங்கள் ஸ்டாலினை அகற்ற வேண்டியதுடன் உடன் படுவதாகவும், டிராட்ஸ்கியுடன் தொடர்பேற்படுத்த வேண்டியதையும் ஏற்றுக் கொண்டனர். அவ்வேளை அவர்கள் தாம் 1917ல் விட்ட தவறை விட பெரிய தவறு 1927 இல் இடது எதிர்ப்பாளருடன் பிரிந்து போனது தான் என குறிப்பிட்டனர்.” 1927 இல் டிராட்ஸ்கி ஆட்சி கவிழ்ப்பை, தொழிலாளர் அணிவகுப்பின் முன் நின்று நடத்தும் சதியை திட்டமிட்டான். ஆனால் பாட்டாளி வர்க்கத்தின் முன் நிற்க முடியாமல் டிராட்ஸ்கியவாதிகள் சிதறி பின்வாங்கினர்.

 

இந்த எதிர்புரட்சிக் கும்பல், கட்சியில் மிகச் சிறிய குழுவேயாகும். 1927.12.27 ம் தேதி கட்சி முடிவுகளை எற்று அங்கீகரிக்கும் தேர்தலில் ஸ்டாலின் நிலைக்கு ஆதாரவாக 7,25,000 கட்சி உறுப்பினர்கள் வாக்களித்தனர். எதிராக 6000 ஆயிரம் வாக்குகள் போடப்பட்டது. எதிர்புரட்சிக் கும்பல் 0.82 சதவீத வாக்குகளைக் கூடப் பெறமுடியவில்லை. இதிலும் கூட மாற்றுக் கருத்து காணப்பட்டது. கட்சியில் ஆதாரவற்ற ஒரு சிறு கும்பலின் சதி தோல்வியுற்றது. அதேநேரம் அன்று டிராட்ஸ்கியின் நிறுவியிருந்த பல இரகசிய அச்சகங்களையும், ஆயுதங்களையும் பாட்டாளி வர்க்க அரசு கைப்பற்றியது. இரகசிய அறிக்கைகள், சதியை நடத்தக் கோரிய பல சதித் திட்டங்களை உள்ளடக்கிய ஆவணங்கள் கைப்பற்றப்பட்டன. மாஸ்கோவில் எதிர்ப்புரட்சி நடக்கவிருந்த நேரம், லெனின் கிராட்டிலும் எதிர்புரட்சி நடத்தச் சென்றிருந்த சினோவ்க், ராடெக்கும் கைது செய்யப்பட்டனர். சோவியத்  தூதனாக ஐரோப்பாவுக்கு சென்றிருந்த டிராட்ஸ்கிய வாதியான ஜோபி, இந்த சதி தோல்வியில் முடிந்ததை அறிந்து அங்கேயே தற்கொலை செய்து கொண்டான். இது போன்று தற்கொலை செய்த மற்றொருவன் பற்றி, அவரின் மகள் எழுதிய நூல் ஆட்சிக் கவிழ்ப்புக்கு முயன்றதை பிரகடனம் செய்கின்றது. 1995 இல் வெளியாகி “சரியான நேரத்தில் மீண்டும்” என்ற தலைபில் “எனது வாழ்க்கை, எனது தலைவிதி, எனது சகாப்தம்” என்ற குறிப்புடன், ட்ரோட்ஸ்கிய சதிகளில் பங்கு கொண்ட ஜொவ்வேயின் பற்றி இந்த நூல் பல தரவுகளை தருகின்றது. ஜொவ்வே டிராட்ஸ்கியுடன் ஆரம்பகால அரசியல் சதிகளில் ஈடுபட்டதுடன், 1917 போல்ஸ்விக் புரட்சியின் போது போல்ஸ்விக்கில் இனைந்தவன். போல்ஸ்விக்கில் இணையும் போது தெஸ்ராஒஸ்டி என்ற குழுவில் இனைந்த பின், போல்ஸ்விக் கட்சியுடன் பேரம் பேசி இணைந்தவர். இந்த நூல் எப்படிப்பட்ட சதிகளில் தன் தந்தை ஈடுபட்டார் என்பதை மிகப் பெருமையுடன் பேசுகின்றது. 1927 இல் இடது எதிர்பாளர்களின் இரகசிய சதி, கட்சிக்கு எதிரான ஆர்ப்பாட்டமாகி தோற்றபோது, தனது தந்தை தற்கொலை செய்த கொண்டதை சுட்டிக் காட்டுகின்றது. இவரின் மகளும், அவரின் கணவனும் தொடர்ந்த டிராட்ஸ்கி சதிகளில் எப்படி பங்கு பற்றினோம் என்பதை, இந்த நூல் சுய வரலாறாக விரிவாகப் பேசுகிறது. அன்று பழைய வெள்ளை இராணுவ அதிகாரிகள், சமூகப் புரட்சிக்காரர்கள், அன்னிய நாட்டு ஏஜன்டுகளும், டிராட்ஸ்கியவாதிகளும் பல இடங்களில் கைது செய்யப்பட்டனர். இந்த எதிர்புரட்சியைத் தொடர்ந்து டிராட்ஸ்கி கட்சியில் இருந்து வெளியேற்றப்பட்டு, வேறு இடத்தில் இருக்க அனுமதிக்கப்பட்டான். இருந்தும் தனது தலைமையை நிறுவ தொடர்ந்து சதிகளையே ஆதாரமாக கொண்டு செயல்பட்டான்.

 

வேறு இடத்தில் சோவியத் அரசு டிராட்ஸ்கிக்கு அனைத்து வசதிகளையும் வழங்கியிருந்தது. இதைப் பயன்படுத்தி சோவியத்துக்குள் தொடர்ந்தும் சதி செய்தான். அதை “என் வாழ்க்கை” என்ற நூலில் ஒரு சோவியத் பிரதிநிதியை சந்தித்ததைப் பற்றி எழுதுகையில் “உங்கள் கூட்டாளிகள் நாடு முழுவதும் சோவியத்துக்கு எதிராக சதி வேலையை மீண்டும் தொடங்கிவிட்டனர். அல்மா அட்டாசில் உங்களைச் சில வசதிகளுடன் வைத்ததினால் அந்த வேலையை நடத்த, நல்ல வாய்ப்புக் கிடைத்திருக்கிறது.” என ஒரு சோவியத் பிரதிநிதி குறிப்பிட்டதை டிராட்ஸ்கி தனது சுயசரிதை நூலில் பெருமையாக குறிப்பிட்டுள்ளார். தொடர்ச்சியான சதிகளை அடுத்து 1929 பெட்டவரி 13 இல் பாட்டாளி வாக்கத்துக்கு எதிரான சதிவேலை காரணமாக டிராட்ஸ்கி நாடுகடத்தப்பட்டான். ஆனால் டிராட்ஸ்கி தொடர்ந்து சதிவேலைகளை வெளிநாட்டில் இருந்து செய்தான். ஸ்டாலினை பலாத்காரமாக தனிமனித ரீதியாக அழிப்பதன் மூலம் ஆட்சி கைப்பற்றுவது என்ற புதிய வடிவத்தில் டிராட்ஸ்கியம் வளர்ச்சி பெற்றது. சோவியத்தை சோசலிச நாடு என்று கூறிய படி, ஸ்டாலின் தலைமைய அகற்றி தனது ஆட்சி நிறுவப்பட்டு விட்டால் எல்லாம் சரியாகி விடும் என்றான். இதற்காக ஸ்டாலின் தலைமையை அதிகார வர்க்க ஆட்சி என்றான். அதனால் தனிநபர்களை பயங்கரவாத வழிகளில் அழித்துக் கொள்வது சரி என்றான். இது மார்க்சியம் என்றுகூறி, டிராட்ஸ்கிய சதிக் கோட்பாட்டை முன் தள்ளினான். இதற்காக தனிநபர்களாக ஸ்டாலின் தலைமையை அழிக்கும் சதிகள் முன் தள்ளப்பட்டது. வெளிநாட்டில் இருந்து டிராட்ஸ்கி தனது முதல் மெய்காவலன் மூலம் 1930 இல் சோவியத்யூனியனுக்குள் திருட்டுத்தனமாக ஆயுதங்களை கொண்டு வந்த போது டிராட்ஸ்கியின் மெய்க்காவலன் சுட்டுக் கொல்லப்பட்டான். டிராட்ஸ்கிக்கு சோவியத்யூனியனை தாக்கி அளிக்க விரும்பிய ஏகாதிபத்தியங்களின் ஆதாரவு கிடைத்தது. ஸ்டாலின் தலைமையிலான பாட்டாளி வர்க்க ஆட்சியை அகற்றும் நோக்கத்தில் இருவரும் ஒன்றுபட்ட குறிக்கோளை கொண்டிருந்தனர். இதனால் டிராட்ஸ்கி தான் “மாபெரும் புரட்சிக்காரன்” என்ற பெயரை தக்கவைத்துக் கொண்டான். சதிகள் மற்றும் பயங்காரவாத வழிகளை தனது அரசியல் நோக்காக கொண்டு சோவியத்தில் சதித் திட்டங்களை திட்டிய அவன், அடிக்கடி “விதியா? அதைக் கேட்டு நான் சிரிக்கிறேன். மனிதர்களா? அவர்கள் அறிவிலிகள்” என அடிக்கடி கூறிக் கொண்டான்.

 

சோவியத்தில் எற்படக் கூடிய எந்த நெருக்கடியையும் டிராட்ஸ்கி தனது தலைமைக்கான ஒரு ஆட்சிக் கவிழ்ப்புக்காக பயன்படுத்த முனைந்தான். நெருக்கடியை எற்படுத்துவதும் அதன் அங்கமாகியது. ஜெர்மன் எழுத்தாளர் எமில் லட்லிக்கை சந்தித்த போது டிராட்ஸ்கி கூறினான் “ரஷ்யா மிகுந்த நெருக்கடிக்குள்ளாகி இருக்கிறது, ஐந்தாண்டுத் திட்டம் வெற்றிபெறவில்லை, வேலையில்லாத் திண்டாட்டமும் பொருளாதாரச் சீர்குலைவும் ஏற்படும். கூட்டு விவசாயம் படுதோல்வி, ஸ்டாலின் நாட்டைப் பாழ்படுத்துகிறார். எதிர்ப்பு பெருகி வருகிறது” எனக் கூறினான். ரஷ்யாவில் உங்களைப் பின்பற்றுபவர்கள் எத்தனை பேர் என அவர் கேட்ட போது “அதை மதிப்பிட முடியாது பலர் தலைமறைவாக வேலை செய்கின்றனர்” என பதிலளித்தான். நீங்கள் எப்போது வெளிப்படையாக வேலை செய்ய முடியும்? என்று கேட்ட போது “வெளியில் இருந்து வாய்ப்புக் கிடைக்கும் போது, போர் ஏற்பட வேண்டும் அல்லது அரசாங்கத்தின் பலவீனத்தைப் பயன்படுத்திக் கொண்டு ஐரோப்பிய நாடுகள் புதிய தாக்குதலைத் தொடுக்க வேண்டும்.” என்று டிராட்ஸ்கி கூறினான். அமெரிக்க நிருபர் ஜன்குந்தர் டிராட்ஸ்கியையும் அவருடன் இருந்தவர்களையும் சந்தித்த பின் கூறினார் “அவர் நாடுகடத்தப் பட்டவரைப் போல் நடந்து கொள்ளவில்லை. மணிமுடி தரித்த மன்னன் அல்லது சர்வாதிகாரி என்றே அவரைச் சொல்லலாம்” எனக் குறிப்பிட்டார்.  தொடர்ந்து அவர் நான்காவது அகிலத்தின் குறிக்கோளையும், அது செய்த வேலையையும் கேட்ட போது டிராட்ஸ்கி பதில் ஒன்றும் கூறவில்லை மாறாக இரகசிய ஏடுகளைக் காட்டினான். பின் ஜன்குந்தர் மேலும் எழுதினார் “டிராட்ஸ்கி ரஷ்யாவை இழந்து விட்டான். அல்லது சிறிது காலத்திற்காவது அவன் அதை இழந்து விட்டான் என்றே சொல்லலாம். பத்து அல்லது இருபது ஆண்டுகளிலாவது அவன் அதை திரும்ப பெறமுடியுமா என்று எவராலும் சொல்ல முடியாது. ஸ்டாலின் வீழ்ச்சியுறுவார் என்ற நம்பிக்கை அவனுக்கு இருக்கிறது. …ஒன்றே ஒன்றுதான் டிராட்ஸ்கியை ரஷ்யாவிற்கு உடனே செல்ல வைக்க முடியும். அது ஸ்டாலினின் மறைவு.” எனறு குந்தர் குறிப்பிட்டார். அந்தளவுக்கு டிராட்ஸ்கி இரகசிய சதி அமைப்புக்களை கம்யூனிச எதிர்ப்பு அணிகளை சோவியத்தினுள் உருவாக்கினான். இந்நிலையில் டிராட்ஸ்கி சர்வதேச ரீதியாக அன்னிய நாடுகளுடன் கூட்டுகளை உருவாக்கினான், சதிகள் தீட்டினான். டிராட்ஸ்கியம் தனது சதியை நியாயப்படுத்தும் போது “முல்லா கூற்றுப்படி தங்களது அரசியல் காரணங்களுக்காக ஆளும் கட்சியினர் டிராட்ஸ்கிய பத்திரிக்கைகள் கூறுவது போல் ‘மார்ச் 5 1933 அன்று ஜேர்மன் தேர்தலின் போது கூடிய கூட்டத்தை’ டிரொட்ஸ்கிச எதிர்ப்பாளர்களின் ஒரு சதிக் கூட்டம் என்று கூறுவது சரியல்ல. ஜெர்மன் தொழிலாளர் இயக்கம் தோல்வியடைந்ததால் ஏமாற்றமடைந்ததன் காரணமாக மேலும் இராணுவ நிபுணர்கள் பற்றிய பிரேமையும் கிளர்ச்சி எழுச்சியின் மூலோபாயங்கள் தொலை தூரத்தில் மாஸ்கோவில் இருந்தன் காரணமாக… பெர்லினில் இருந்த கட்சி தலைமை பற்றியும் கொள்கைகளைகள் பற்றியும் சில விமர்சனங்கள் செய்யப்பட்டிருக்கலாம் என்பதை அவர் விளக்கவில்லை” என்று கூறி சதியின் அடிப்படையை மூடிமறைக்கின்றனர். சோவியத்தில் இராணுவச் சதி ஜெர்மானிய டிராட்ஸ்கியவாதிகளினது வேலை திட்டமாக இருந்ததை இது நிறுவுகிறது. அத்துடன் ஜெர்மன் கம்யூனிச கட்சியை நாசிகளின் குடையின் கீழ் நின்று கடுமையாக தூற்றியதை ஒப்புக் கொள்கின்றனர்.

 

டிராட்ஸ்கி சதிக் குழுவில் இருந்த சிரஸ்டின்ஸ்கி 1930இல் சோவியத் வெளிநாட்டு மந்திரியாக இருந்தவன். இவன் 1930 கள் வரை ஜேர்மனிய அரசிடம் இருந்து உள்நாட்டு சதிக்காக 20,00,000 தங்க மார்க்குகளை பெற்றிருந்தான். இந்த உதவி 1930இல் நிறுத்தப்படுமளவுக்கு நாசிய நெருக்கடிகள் உருவாகியது. இதைத் தொடர்ந்து டிராட்ஸ்கி ஜேர்மனிய வேவு இலாகாவுடன் புதிய ஒப்பந்தம் செய்தான். இந்த உதவிக்காக சோவியத் இராணுவ இரகசியங்கள் கையளிக்கப்பட்டன. 1931 இல் டிராட்ஸ்கியின் மகன் லியோன் செடோவ் பெர்லினுக்குப் போனான். அவன் ஒரு மாணவன் என பிரயாணச் சீட்டில் ஜெர்மன் விஞ்ஞான கழகத்தில் சேரப் போவதாக எழுதப்பட்டிருந்தது. ஆனால் அவன் தலைநகரில் சதிவேலைகளில் ஈடுபட்டிருந்தான். சோவியத் வர்த்தக கமிட்டியில் டிராட்ஸ்கிய சதியாளர்களும் பெர்லினுக்கு வந்திருந்தனர். அவர்கள் சுமிர்நோவ், பயாட்டக்கோவ் ஆகியோர் குறிப்பிடத்தக்கவர்கள். சுமிர்நோவ் 1931இல் டிராட்ஸ்கிக்கு சாதகமாக சதிசெய்ததையும், அவன் பெர்லினில் டிராட்ஸ்கியின் மகனைச் சந்தித்ததையும் டிராட்ஸ்கிய பத்திரிகை ஒத்துக் கொண்டுள்ளதை கவனமாக நாம் இங்கு குறித்துக் கொள்ள வேண்டும். டிராட்ஸ்கியின் மகன் செடோவ் அவர்களுடன் சந்தித்து, சதியை எப்படி நடத்துவது என ஆராய்ந்தனர்.

 

பயாட்டக்கோவின் தனது குறிப்பில் இதுபற்றி குறிப்பிடுகையில் “செடோவை நான் ஒரு விடுதியில் சந்தித்தேன். நீண்டகாலமாக நாங்கள் இருவரும் ஒருவரை ஒருவர் நன்கறிவோம். டிராட்ஸ்கியின் பிரதிநிதியாக அவன் பேசுவதாகச் சொன்னான். ஸ்டாலின் தலைமையை எதிர்க்கும் போராட்டம் முடியவில்லை டிராட்ஸ்கி ஒவ்வொரு நாடாக நாடு கடத்தப்படுவதால், போராட்டம் தற்காலிகமாகத் தடைப்படுகின்றது மீண்டும் அந்தப் போராட்டம் தொடங்கப்பட்டிருப்பதாயும், செடோவ் என்னிடம் சொன்னான். இந்தப் போரில் கலந்து கொள்ள முடியுமா என்று ஒளிவு மறைவின்றி என்னைக் கேட்டான். நான் சம்மதித்தேன்” இதன்படி முதலில் ஜெர்மனில் இருந்த போர்சிக், டெமாக் என்ற இரு ஜெர்மன் கம்பனிகளில் கூடிய சாமான்களை கூடுதல் விலைகொடுத்து வாங்குவதன் மூலம், அதில் கிடைக்கும் பணத்தை சோவியத் எதிர்ப்புக்கு பயன்படுத்தக் கோரினான் செடோவ்.

 

பயாட்டக்கோவ் நாடு திரும்பியவுடன் டிராட்ஸ்கியிடம் இருந்து ஒரு கடிதம் வந்திருந்தது. அதன்படி ஸ்டாலினையும் அவருடைய கூட்டாளிகளையும் பயங்கரவாத வழிகளில் ஒழிப்பதை சுட்டிக் காட்டியது. அத்துடன் அனைத்து எதிர்ப்பு சக்திகளையும் ஒன்றிணைப்பதை கோரியது. இதை இன்று டிராட்ஸ்கிய பத்திரிகை எற்றுக் கொள்கின்றது. டிராட்ஸ்கியின் புதிய திட்டத்திற்கு பயாட்டக்கோவ் தலைவனாக இயங்கியதும், எல்லா இரகசிய இலாக்காவுடனும், சகல எதிர்ப்பு குழுக்களை ஒன்றிணைப்பதை டிராட்ஸ்கிய சதியாளர்களான கார்ல், ராடெக் போன்றோரையே திடுக்கிட வைத்தது. டிராட்ஸ்கி ராடெக்கு எழுதிய இரகசிய கடிதத்தில் “கடந்த காலத் திட்டத்தை நாம் இனிக் கையாள்வதில் பயனில்லை என்பது நாம் பெற்ற அனுபவம். எனவே, இனி நாம் புதிய முறையைக் கையாள வேண்டும். ஒன்று, சோவியத் யூனியனும் நாமும் அழிய வேண்டும் அல்லது தலைமைப் பதவி ஒழிய வேண்டும்.” எனக் குறிப்பிட்டான். இக்கடிதம், மற்றும் பயாட்டக்கோவ்வின் வற்புறுத்தலால் ராடெக் இயங்க ஒத்துக் கொண்டான். இந்தவகையில் சுமிர்னோவ், மிராக்கோவ்ஸ்கி, டிரீட்சர் போன்றோர் இரகசிய தனிநபர் பயங்கரவாத அமைப்பாளராக செயல்பட ஒத்துக்கொண்டனர். ஆனால் டிராட்ஸ்கிய பயங்கரவாத சதிகளை மூடிமறைக்கவும், அதை அரசியல் வடிவமாக சித்தரிக்கவும், ஸ்டாலினிசத்தினது பயங்கரவாதமும் தத்துவமற்ற தன்னிச்சைப் போக்கும் அதிகார இயக்கத்தின் அங்கமுமே, சோவியத்தில் காணப்பட்டதாக புளுகின்றனர். அன்று டிராட்ஸ்கி சோவித்தை தொழிலாளர் ஆட்சி என்ற கூறிக் கொண்டு, தலைமையை மட்டும் அகற்ற வேண்டும் என்ற கோரிய போது, பயங்கரவாதமும் சதியும் தத்துவத்திலும் சரி தன்னிச்சைப் போக்கிலும் சரி எங்கிருந்தது என்பதை, உள்ளடகத்தில் யாரும் ஒளிவுமறைவின்றி தெரிந்து கொள்ள முடியும்.

 

1932ம் ஆண்டு டிராட்ஸ்கிகள் தமது அணிகள் மத்தியில் “ஸ்டாலின் கட்சியின் திட்டம் முறிந்துவிடும் என்ற நம்பிக்கையுடன் இருந்தோம். அதில் நாம் தோல்வியடைந்து விட்டோம். நாம் இதுவரை பின்பற்றிய போராட்டத் துறைகளினால் பயன் ஏதுவும் கிட்டவில்லை. இனி ஒரே ஒரு போராட்டப் பாதைதான் இருக்கிறது. பலாத்காரத்தினால் கட்சியின் தலைமையை அகற்றுவது ஸ்டாலினையும் மற்ற தலைவர்களையும் ஒழித்துவிடவேண்டும். அதுவே முதல் வேலை.” என்று சதிகளின் வடிவத்தை மாற்றி அமைத்தனர். இதைத் தொடர்ந்து சோவியத் எதிர்ப்புக் குழுக்களுக்கு இடையில் ஐக்கிய முன்னணி அமைக்கப்பட்டது. இதை டிராட்ஸ்கிய பத்திரிகைகள் இன்று பெருமையுடன் ஒத்துக் கொள்கின்றன. பின் நிகழ்வான கைதுகளின் அலை, டிராட்ஸ்கிய – சினோவியேவிச் மையத்துக்கு எதிராக திட்டமிடப்பட்ட வழக்கு நடந்தாக கூறுகின்றது.

 

இந்த ஐக்கிய முன்னணிக்கான அமைப்பின் பெயர் “வலதுசாரிகள், டிராட்ஸ்கியவாதிகள் ஆகியோரின் குழு” என வரையறுத்தனர். மூன்று செயல்முறைக் கமிட்டி அமைக்கப்பட்டன. சினோவீவ், பயாட்டக்கோவ் ஆகிய இருவரும் இரு குழுக்களாகவும், புகாரினும், கிரிஸ்டின்ஸ்கியும் மூன்றாவது கமிட்டிக்கும் தலைவர்கள் ஆனார்கள். 1933 செப்டம்பர் மாதம் ஹிட்லர் ஜெர்மனியில் ஆட்சிக்கு வந்தான். அதைத் தொடர்ந்து ஒரு யுத்தம் நடைபெறும் என்பதையும், அதேநேரம் ஜெர்மனிக்கு சில சலுகைகள் வழங்குவதன் மூலம் இந்த யுத்தத்தைப் பயன்படுத்த டிராட்ஸ்கி முயன்றான். இதன் தொடர்ச்சியில் சோவியத் வெளிநாட்டு உதவி மந்திரியாக இருந்த டிராட்ஸ்கியின் சதிகாரனான நிக்கோலாய் கிரஸ்டின்ஸ்கி, ஜெர்மனியில் ஹிட்லர் ஆட்சிக்கு வந்து எட்டு மாதம் கழித்து ஜெர்மனியில் ஒய்வுக்காக வந்திருந்தான். இவனை டிராட்ஸ்கியவாதியான பெஸ்ஸாநோவ் சந்தித்தான். இதன் போது அவன் “ஜெர்மன் நாஜிக்கட்சியின் அன்னிய இலாகாத் தலைவனான ரோசன் பெர்க், ரஷ்ய டிராட்ஸ்கியவாதிகளுக்கும் ஜெர்மன் நேஷனல் சோசலிஸ்டுகளுக்கும் கூட்டுறவு எற்படுத்த விரும்புகிறான்.” எனக் கூறினான். இதனால் டிராட்ஸ்கி வெளிநாட்டு உதவி அமைச்சரான நிக்கோலாய் கிரஸ்டின்ஸ்கி சந்திக்க விரும்புவதாக கூறினான். இதையடுத்து மெரானோ நகரில் இந்த சந்திப்பு நிகழ்ந்தது. இது எப்படி உள் நாட்டில் சதியை நடத்துவது என்பதை அடிப்படையாக கொண்டே நடைபெற்றது. வெளிநாட்டு அரசு வரையிலும் இந்தச் சதி வலை ஒன்றாக பின்னப்பட்டது.

 

இது தொடர்பாக நடந்த ஒரு சம்பவத்தை குறித்து ராடக் சுட்டிக் காட்டினான். உதவி அமைச்சர் செக்கோல் நிக்கோவ், அலுவலகத்திற்கு வந்ததும் “இதைக் கேளுங்கள் நான் வெளிநாட்டு இலாகா அலுவலகத்தில் பேசி முடித்ததும், டிராட்ஸ்கி தன் அரசாங்கத்துக்கு அனுப்பிய திட்டங்களை எனக்கு சொல்ல முடியுமா?” என ஜப்பான் தூதுவன் கேட்டான். அதற்கு செக்கோல் நிக்கோவ் “சோவியத் உதவி மந்திரியாக நான் இதை எப்படிச் செய்வது இது முடியாத செயல்” என்று கூறினானான். ராடக் “ஆத்திரப்பட வேண்டாம். இங்குள்ள நிலமை டிராட்ஸ்கிக்குத் தெரியாது. இனி இம்மாதிரி நேரிடாது. ஒற்றர்கள் விழித்துக் கொண்டிருக்கிறார்கள். எனவே ஜெர்மனி அல்லது ஜப்பானுடன் ஒப்பந்தம் செய்ய முடியாது என்று, நான் டிராட்ஸ்கிக்கு முன்னமே எழுதுகிறேன்.” எனக் கூறினான். நிலைமை ஒருபுறம் வெளிநாட்டு சதிவரை நீள, மறுதளத்தில் சிலரை இரகசியமாக கொன்று விட திட்டம் இடப்பட்டது. அது மறைமுகமான வழிகளில் முதன்மையானவர்களான ஸ்டாலின், வாரோலோவ், மாலட்டோவ், ஜடானோவ், சிரோவ், மாக்ஸிம் கார்க்கி ஆகியோர் கொல்லப்பட வேண்டும் என டிராட்ஸ்கிகள் திர்மானித்தனர். இதைத் தொடர்ந்து மாலட்டோவைக் கொல்ல அவரது கார் ஓட்டுனரான டிராட்ஸ்கியவாதி வாலண்டைன் அர்னால்டு முயன்றான். சோவியத் மந்திரிசபைத் தலைவரான மாலட்டோவைக் கொல்லும் நோக்கில் தனது காரை திடீர் என பள்ளத்துக்கு திருப்பி ஓடிய போதும், கடைசி நேரத்தில் தனது மனோத்திடத்தை இழந்து அதை அவன் கைவிட்டான். இதனால் அவர் தப்பிக் கொண்டார்.

 

இக்காலத்தில் டிராட்ஸ்கி தனது மெய்காவலனாக இருந்த டிரீட்செர்க்கு 1934 இல் கண்ணுக்கு புலப்படாத மையினால் எழுதிய கடிதம் ஒன்றில்

 

பிரியமுள்ள நண்பனே!

இப்போது நாம் நிறைவேற்ற வேண்டிய அவசர – அவசிய வேலைகளாவன:

1) ஸ்டாலின் – வரோலோவ் ஆகிய இருவரையும் அகற்றுவது.

2) இராணுவத்தில் ஒரு குழுவை அமைப்பது.

3) போர் மூண்டால், அதிகாரத்தைக் கைப்பற்ற அந்த நிலைமையைப் பயன்படுத்துவது.” என எழுதினான். தொடர்ச்சியான சதியில் 1934 டிசம்பர் 1ம் திகதி லெனின்கிராட் கட்சிக்காரிய தரிசியும் ஸ்டாலிலின் நெருங்கியவருமான கிரோவ் படுகொலை செய்யப்பட்டார். கிரோவ் படுகொலை பற்றி 2.3.1938 இல் டிராட்ஸ்கி கூறினான் “கிரோவ் ஸ்டாலினின் கையாள் என்றான். அவனை கொலை செய்தவன் நன்றாகத் தெரிந்த இளம் கம்யூனிஸ்ட்டான நிக்கோலயேவ்யாவன். இவன் கிரோவ்வைக் கொன்றது தனிப்பட்ட காரணமே ஒழிய அரசியல் காரணமல்ல என்றான்.” சதியாளாகளால் கொல்லப்பட்ட கிரோவ் 1934 இல் நடந்த 16 வது காங்கிரஸ்சில் மாபெரும் தனித்துவமிக்க தலைவராக விளங்கினார். இது டிராட்ஸ்கிய சதியாளருக்கு மற்றொரு தலையிடியாக மாறியது. இதனால் இவரை ஒழித்துக் காட்டுவதன் மூலம், ஸ்டாலின் வலது கரத்தை துண்டிக்க விரும்பினர். இதன் அடிப்படையில் படுகொலை செய்த பின்பு, இதை தனிப்பட்ட பிரச்சனையினால் எற்பட்ட கொலை என்று சதி தொடர்பான விசாரனைகள் நடந்த காலத்தில் டிராட்ஸ்கி அதாவது 1938 இல் அறிவித்தான். மே 1934 கிரோவ் படுகொலைக்கு 6 மதத்துக்கு முன், சோவியத் இரகசிய இலாக்கத் தலைவனான மென்ஸ்கி மாரடைப்பால் மரணம் அடைந்தான். அப்போது துணைத் தலைவனாக இருந்த எக்கோடா தலைவனானான். எக்கோடா 1929 இல் டிராட்ஸ்கிய சதிக் கூட்டத்தில் சேர்ந்து இருந்தன். இவன் டிராட்ஸ்கிய குழு ஆட்சிக்கு வரும் என்று நம்பியதன் அடிப்படையால் மட்டும் அதில் இணைந்திருந்தான். 1934 இல் கிரோவ் கொலையாவதற்கு முன், கொலைகாரனான நிக்கோலயேவ், சோவியத் இரகசியப் போலிசாரால் லெனின்கிராட்டில் கைது செய்யப்பட்டான். கிரோவ் ஒவ்வொரு நாளும் போய் வருகின்ற நடைபாதையைக் காட்டக் கூடிய படமும், துப்பாக்கியும் அவனிடம் இருந்தது. லெனின்கிராட் உதவித் தலைவனாக இருந்த சர்ப்பரோ செட்ஸ் எகோடாவுக்கு வேண்டியவன். எனவே நிக்கோலயேவ் விடுதலையானான். இந்த கொலையை மறைமுகமாக எகோடா செய்வித்ததுடன், தாங்கள் ஆட்சிக்கு வரும் போது அதில் எப்படியான அரசு அமைய வேண்டும் எனக்கூட திட்டமிட்டான். இதற்கு என விசேட இரகசிய இராசாயண சாலை ஒன்றை நிறுவினான். இதில் பல விஞ்ஞானிகளை உருவாக்கினான். இதுவும் அவனுக்கு திருப்தி அளிக்கவில்லை. வேறு நூதன வழிகளைச் சிந்தித்தான். இதற்கு டாக்டர்களைப் பயன்படுத்த திட்டமிட்டான்.

 

இதன் அங்கமாகவே துணைத் தலைவராக இரகசிய இலாக்காவில் இருந்த போது, அதன் தலைவராக இருந்த மென்ஸ்கியை கொல்லும் வழியில் டாக்டர் லேவினை அனுகினான். மென்ஸ்கிக்கு வைத்தியம் செய்து வந்த லேவின் தனது திட்டத்துக்கு மிரட்டியும், பவ்வியமாகக் கதைத்தும் சம்மதிக்க வைத்தான். அவன் அவரிடம் “சோவியத் அரசாங்கத்தைக் கவிழ்ப்பதற்காக இரகசிய இயக்கம் வளர்ச்சியுறுகிறது. அந்தத் தலைவர்களில் நானும் ஒருவன். அந்த எதிர்ப்பு இயக்கத்தவர்கள் தான் சோவியத் யூனியனின் ஆதிக்கம் வகிக்கப் போகிறவர்கள். நீங்கள் வைத்தியம் செய்து வருகிற தலைவர்கள் சிலரை, எங்கள் பாதையில் இருந்து விலக்கியாக வேண்டும்.” என்று எகோடா டாக்டர் லேவினிடம் கூறினார். இதை செய்ய மறுத்த போதும் தற்காலிக தலைவர் முன் எதுவும் பலிக்காது எனக் கருதி அதற்கு சம்மதித்தான். மென்ஸ்கிக்கு வைத்தியம் பார்த்த இன்னுமொரு டாக்டர் கசாக்கோவையும் பயன்படுத்தினான். இதன் தொடர்ச்சியில் லெவின்க்கும் கசாக்கோக்கும்  இடையிலான உரையாடலைப் பார்ப்போம்.

 

லேவின்:- மென்ஸ்கி நடைப்பிணம். உண்மையில் நீங்கள் நேரத்தை வீணாக்குகிறீர்கள்.  ஒரு விசயத்தைப் பற்றி உங்களிடம் பேச வேண்டும்.

கசாக்கோவ்:- எதைப்பற்றி?

லெவின்:- மென்ஸ்கியின் உடல் நலத்தைக் குறித்து …. நீங்கள் மிகத் திறமையுள்ளவர்கள் என எண்ணினேன். நீங்கள் இன்னும் என்னை அறிந்து கொள்ளவில்லை. மென்ஸ்கியை சற்றுக் குணப்படுத்தி இருக்கிறீர்கள். அவர் மீண்டும் வேலைக்குப் போகாமலிருக்கும் படி செய்யவேண்டும். மென்ஸ்கி உண்மையில் ஒரு பிணம். அவரைக் குணப்படுத்தி திரும்பவும் வேலை பார்க்கத் தகுதியுள்ளவராகச் செய்தால், எகோடாவின் கோபத்திற்கு ஆளாவீர். மென்ஸ்கி எகோடாவின் பாதையில் தடைக் கல்லாக இருக்கிறான். … இது பற்றி ஒரு வார்த்தை கூட மென்ஸ்கியிடம் செல்லக்கூடாது. சொன்னால், எகோடா உங்களை அழித்து விடுவார். எங்கே போய் ஒழித்தாலும் அவரிடம் இருந்து தப்ப முடியாது. தலைமறைவாக இருந்தாலும் கூட அவர் உங்களை விடப் போவதில்லை.

 

நவம்பர் 6 1933 இல் டாக்டர் கசாக்கோவை சந்திக்க எகோடா கார் அனுப்பினான். எகோடா தனது அலுவலகத்தில்

 

எகோடா:- மென்ஸ்கி எப்படி இருக்கிறார்

கசாக்கோவ்:-கவலைக்கிடமான நிலைமை

எகோடா:- லெவினைச் சந்தித்து பேசினீர்களா?

கசாக்கோவ்:- ஆம்

எகோடா:- அப்படியானால் ஏன் காலத்தை வீணாக்குகிறீர்கள். ஏன் வேலையை முடிக்கக் கூடாது? பிறர் காரியத்தில் நீர் தலையிடுகிறீர்?

கசாக்கோவ்:- நான் என்ன செய்ய வேண்டும் என்று சொல்லுகிறீர்கள்?

எகோடா:- மென்ஸ்கிக்கு உம்மை யார் வைத்தியம் செய்யச் சொன்னது.? அவன் உயிர் வாழ்ந்தால் யாருக்காவது பலன் உண்டா? இல்லை. அவன் எல்லோருக்கும் இடையூறாக இருக்கிறான்…”

 

1934 மே 10இல் மென்ஸ்கியின் இதயத்தைப் பலவீனப்படுத்திக் கொன்றனர். இதே போன்று 1935 ஜனவரி 25 இல் பொலிட் பீரோ உறுப்பினர் குயுபிவ் அலுவலகத்தில் மாரடைப்பு ஏற்பட்டது. உடன் ஓய்வுக்கு அனுப்புவதற்கு பதில் அவரின் காரியதரிசியான மாக்ஸிமோவ் என்ற புகாரியவாதி, நடந்து வீடு செல்லும்படி கூறினான். குயுபிவ் நடந்து விடுபோய் சேர்ந்ததும் இறந்தார். இந்த சதியில்  இரகசிய சதிக் குழுவைச் சோந்த எனுகிட்ஸ் இணைந்தே திட்டமிட்டு கொன்றனர். “1936 வசந்த காலத்தில் சோவியத் உளவுத் துறை கடைசியாக ஒரு “டிராட்ஸ்கிய சதியை” கண்டபிடிப்பதில் வெற்றி கொண்டது” என்று டிராட்ஸ்கிய பத்திரிகை இன்று ஒத்துக் கொள்கின்றது. ஆனால் அதற்கு எதிரான நடவடிக்கையை தூற்றுகின்றனர்.

 

உண்மையில் சோவியத் 1936-1937 களில் விழித்துக் கொண்டது. உள்நாட்டு சதி மற்றும் 5ம் படையாகச் செயற்பட்ட இந்த சதியாளர்கள் ஜப்பானுடனும், ஜேர்மனியுடனும் உள்ள கூட்டு மெதுவாக தெரிய வந்தது. ஏகாதிபத்திய ஆக்கிரமிப்புக்கு உதவுவதன் மூலம் சோவியத்தை சிதைத்து நாசமாக்கி அழித்துவிடவும், தமது அதிகாரத்தை நிறுவவும் கனவு கண்ட சதிகள் மெதுவாக கசிந்த நிலையில் விசாரணை முடுக்கி விடப்பட்டன. சோவியத் விசாரணையைக் கட்டுப்படுத்த எகோடா எடுத்த முயற்சி அனைத்தும் வீணாயிற்று. எகோடாவின் கையாளான போரிசோவ் விசாரணைக்காக லெனின்கிராட்டுக்கு வரவேண்டுமென கட்டளை பிறப்பிக்கப்பட்டது. அவன் விசாரணைக்காக போகும் வழியில் கார் விபத்தில் கொல்லப்பட்டான். இதனைத் தொடர்ந்து “மாஸ்கோ விசாரனை“கள் நடத்தப்பட்டன. பலர் கைது செய்யப்பட்டனர். செப்டம்பர் 27 இல் எகோடா பதவியில் இருந்து நீக்கப்பட்டான். அவனுக்குப் பதில் எவ் என்பவர் நியமிக்கப்பட்டார். இவரை தன் வழிப்படுத்த எகோடா முயன்று தோற்றான். சிலர் கைது செய்யப்படுமுன் தமக்குள் கூடி கதைத்தனர். உடனடியாக சதியை ஆரம்பிப்பது பற்றி யோசித்த போதும் ஆபத்தானது என்பதால் கைவிட்டனர். இதைத் தொடர்ந்து வெளியில் தெரியாத கிரஸ்டின்கியிடம் சதிப் பொறுப்புக்களை ஒப்படைத்தனர். இவன் ரோசென்கோட்ஸ் என்பவனை துணைத் தலைவனாக்கினான். மார்ச்சில் துக்காசெவ்ஸ்கி சோவியத் பாதுகாப்பு இலாகா உதவிக் கமிசன் உறுப்பினரானான். அவன் தலைமையில் இராணுவத் தாக்குதல் தொடங்குவது என்று தீர்மானிக்கப்பட்டது. இந்த இராணுவச் சதியை டிராட்ஸ்கிய பத்திரிகைகள் இன்று ஒத்துக் கொள்கின்றன. (பார்க்க தொழிலாளர் பாதையை)

 

ஜனவரி 23 1937இல் பயாட்டக்கோவ், ராடேக், செக்கோல், நிக்கோவ், ஸ்டோவ், முரலோவ், மற்றும் பன்னிரண்டு பேர் கைது செய்யப்பட்டு விசாரணை செய்யப்பட்டனர். விசாரணையின் போது அவர்கள் ஒரே விதமாக ஒரே விடயத்தை தனித்தனியாக கதைத்தனர். ஒருவரை ஒருவர் குற்றம் சாட்டினர். இவர்கள் தமது நிலையைச் சரியெனக் கூறி பிடிவாதமாக மீள மீள விவாதித்தனர். இந்த விசாரனை என்பது அவர்கள் மீது பொய்யாக திணித்தாக கூறிய டிராட்ஸ்கிய வாதிகளின் அவதூறுக்கு பதில், அவர்கள் சோவியத் அமைப்பை எதிர்த்து வாதிட்டதுடன் தமது சதிகளையே மார்க்சியம் என நியாயப்படுத்தினர். இன்று டிராட்ஸ்கிய பத்திரிகைகள் அவற்றை தமது கொள்கைப் பிரகடனம் எனப் பீற்றிக் கொள்கின்றனர். அன்று விசாரணையைப் பார்க்க வந்த எந்தப் பத்திரிகையாளரும் (உள்நாட்டு, வெளிநாட்டு) இதை பொய்யாக சோடிக்கப்பட்டது என்று கூறியதை நம்பமறுத்தனர். அவர்கள் சதிகளை நியாயப்படுத்திக் கொள்ளும் பிரகடனங்களையே செய்தனர். (உ-ம்) பயாட்டக்கோவின் வாக்கு மூலத்தைப் பார்ப்போம்.

 

ஆம். பல ஆண்டுகளாக டிராட்ஸ்கிய வாதியாக இருந்து வருகிறேன். ஆனால் ஹெஸ் ஒப்பந்தத்தை நான் ஏற்றுக் கொள்ளவில்லை. நாங்கள் குருட்டுத்தனமாக நேச உடன்படிக்கை செய்து கொண்டோம். அதிலிருந்து விடுபட வழிதேடிக் கொண்டிருந்தேன். ….” (இங்கு ஹெஸ் ஒப்பந்தம் என்பது நாசிக் கட்சிக்கும், டிராட்ஸ்கிய வாதிகளுக்கும் இடையில் ஏற்பட்ட ஒப்பந்தம்) இன்னுமொரு டிராட்ஸ்கிய வாதியான கார்ல் ராடெக்கு தான் குற்றவாளி என்று ஒப்புக் கொண்டான். அவன் நாஜி ஜெர்மனியோடும், ஜப்பான் அரசோடும் டிராட்ஸ்கி செய்த ஒப்பந்தம் தனக்குப் பிடிக்கவில்லை என்றும், அந்த சதியை வெளிப்படுத்த தான் உறுதி கொண்டிருந்ததாகவும், அவன் கூறினான்.

 

அரசாங்க வக்கீல்:- என்ன முடிவுக்கு வந்தீர்

ராடெக்:- கட்சியின் மத்தியக் கமிட்டிக்குப் போய் எல்லோருடைய பெயர்களையும் குறிப்பிட்டு, ஒரு அறிக்கை கொடுக்கலாமென என முதலாவதாக எண்ணினேன். அதை நான் செய்யவில்லை. நான் இரகசிய இலாகாவிடம் போகவில்லை. ஆனால் அது என்னிடம் வந்தது.

அரசாங்க வக்கீல்:- திறமையான பதில்

ராடெக்:- துக்கமாக பதில்

 

ஜெர்மனிய நாசிகளுடன் கூட சதியாளாகளின் கூட்டாக செயல்பட்டனர். இந்த வகையில் டிராட்ஸ்கிவாதிகள் தமது தரப்பு நபர் என்று பெருமையுடன் கூறி ஒப்புக் கொள்ளும் ஒருவர், சோவியத்தில் இருந்த ஜெர்மனிய தூதரகத்தில் ஒளித்துக் கொண்ட ஒருவரை இன்று நியாயப்படுத்துகின்றனர். ஸ்டாலினுக்கு எதிராக கட்சி வட்டரங்களில் ராபின் ஹூட் என்று அழைக்கப்பட்ட ர்ழநடண சோவியத் ஒன்றியத்திற்கு வந்தவுடனேயே (ஜெர்மனியில் இருந்து) கட்சி அமைப்புடன் மோதலில் ஈடுபட்டார். அவர் தனித் தன்மை வாய்ந்தவர். ஸ்டாலினிச ஆட்சியை எதிர்த்து புரட்சி செய்தார். சோவியத் ஒன்றியத்தை விட்டு வெளியே செல்வதற்கு அவருக்கு அனுமதி மறுக்கப்பட்டது. பின்னர் அவர் மாஸ்கோவில் உள்ள ஜேர்மன் தூரகத்தை அணுகினார். பாட்டாளி வர்க்கத்தை கவிழ்க்க சதியில் ஈடுபட்டவர்கள் நாசிகளிடமே புகலிடம் பெற்றனர். இப்படியான சதியாளர்கள், ஜந்தாம்படை கைக்கூலிகள் மேலான விசாரணை பற்றி, ஏகாதிபத்தியத் தூதரகங்கள் தமது அரசங்கத்துக்கு என்ன அறிவித்தன என்பதைப் பார்ப்போம். அமெரிக்க தூதர் டேவிஸ் அரசாங்க செயலாளருக்கு 1937 பிப்ரவரி 17 இல் எழுதிய கடிதத்தில் இந்த சதி உண்மையானது என்று அறிவித்தார். அவர் தனது டையரிக் குறிப்பில் மற்றொரு இராஜ தந்திரி, மந்திரி ……… நேற்று மிகத் தெளிவான செய்தியைச் சொன்னார். விசாரணையைப் பற்றி விவாதிக்கையில் பிரதிவாதிகள் குற்றவாளிகள் என்பதில் சிறிதும் ஐயமில்லை. விசாரணையைக் கவனித்த எல்லோரும் அதே முடிவுக்குத் தான் வந்தோம். வழக்கு சோடிக்கப்பட்டதென, பத்திரிகைச் செய்திகளிலிருந்து வெளியுலகம் எண்ணுகிறது. அது அப்படி அல்ல என்பது அவருக்குத் தெரியும். ஆனால், வெளியுலகம் அப்படி நினைப்பது ஒருவகையில் நல்லது தான்.” என்று குறிபிட்டுள்ளார். அவரின் கருத்து கம்யூனிஸ்டுகளுக்கு எதிரான அவதூறுகளைப் பாதுகாக்கும் நோக்கிலானது. அத்துடன் டிராட்ஸ்கிய அவதூறுகளைக் கொண்டு கம்யூனிச எதிர்ப்புப் பிரச்சாரம் செய்யும் நோக்கில் இவை பாதுகாக்கப்பட்டது.

 

விசாரணை பொய்யாக சோடிக்கப்பட்டு திணிக்கப்பட்டது என்றால், டிராட்ஸ்கியம் வெற்றுவேட்டாகிவிடும். விசாரனையில் கைதானவர்கள் டிராட்ஸ்கிய மற்றும் பல்வேறு குழுவைச் சேர்ந்தவர்கள் என்பதை அவர்கள் அங்கிகாரிக்கின்றனர். அப்படி அவர்கள் தத்தம் கோஷ்டிகளுடன் இருந்தபடி, ஆட்சிக்கவிழ்ப்புக்காக செயல்பட்டவர்கள். அரசியல் ரீதியாக டிராட்ஸ்கியம், புக்காரியம் என அனைத்தும் தனிமைப்படுத்தப்பட்ட இரகசிய கோஷ்டிகளாக மேல் இருந்து செயல்பட்டவர்கள். உள்ளடக்கம் இன்றி விசாரனை நடை பெறவில்லை. உதாரணமாக 1927 இல் சோவியத் விவசாயத்தை எடுத்தால் 12 கோடி விவசாயிகள் இருந்தனர். இதில் ஒரு கோடி பேர் நிலப்பிரபுகளாகவும், 11 கோடி பேர் எழை விவசாயிகளாகவும் இருந்தனர். இந்த ஒரு கோடி பேர் எழை விவசாயிகளை சுரண்டிக் கொழுத்ததுடன், மிக உயர்ந்த வாழ்கைத் தரத்தைக் கொhண்டிருந்தனர். எழை விவசாயிகளின் வாழ்வை உயர்த்த ஒரு தொடர் புரட்சியின் அவசியத்தை கோரியது. இந்த நிலப்பிரபு வர்க்கம் சோவியத் அரசுக்கு எதிராக பொருட்களை விற்பதைக் கூட தடுத்து சந்தையை நெருக்கடிக்குள்ளாக்கி அரசியல் ரீதியாக ஆட்சியை கவிழ்க்கும் நிர்பந்தங்களைக் கூட தொடர்ச்சியாக செய்து வந்தது. தொடர்ந்து வர்க்கப் போராட்டத்தை நடத்துவதை எதிர்த்து வந்த டிராட்ஸ்கி அவர்களின் தற்காப்பை உறுதி செய்யும் கோட்பாட்டை வழங்கி, அவர்களின் ஆதாரவையும் திரட்டிக் கொண்டார். 1929 இல் புதிய பொருளாதார கொள்கை கைவிடப்பட்ட போது, அதை எதிபுத்த புக்காரின் சதியை செய்வதற்கு முன்வந்தான். 1929 இல் புதிய பொருளாதார திட்டம் கைவிடப்படவும், கூட்டுப்பண்ணையாக்கல் உருவாக்கவும் ஸ்டாலின் தலைமையிலான பாட்டாளி வர்க்கம் எடுத்த முடிவை அடுத்து, புக்காரின் ஸ்டாலினுக்கு எதிரான சதிக்காக 1928 இல் இடதுசாரி எதிர்பாளனராக கமனேவைச் சந்தித்தார். கமனேவ் விட்டுச் சென்ற தனது நாட்குறிப்பில் இது பற்றிய குறிப்பு அடங்கியுள்ளது. புக்காரின் கூறியதாக கூறும் அந்த குறிப்பு அவன் ஒன்றையும் விட்டுவைக்கமாட்டான்…. அவன் நம்மை அழித்துவிடுவான். அவன் தான் புதிய செங்கிஸ்கான்” என்று கூறி, ஸ்டாலின் வர்க்க போராட்டத்தை தொடர்ந்து நடத்துவதை எதிர்த்தான். 1928 புக்காரின் பிராவ்தாவில் எழுதிய கட்டரையிலும், 1929 இல் மத்திய குழுவுக்கு வழங்கிய அறிக்கையிலும் கூட்டுப் பண்ணையாக்களை எதிர்த்து நின்றார். வர்க்கப் போராட்டங்கள் தொடர்ந்து இடைவிடாது நடத்தப்படுவதே சோசலிசம் என்பதை மறுத்தார். சோவியத்தின் ஆரம்ப காலத்தில் விவசாயிகளை சலுகை வழங்கி அரவனைத்துச் செல்வது அவசியமாக இருந்தது. இந்த நிலையில் புக்காரின் நிலைப்பாடு சோவியத்துக்கு சார்பானதாக இருந்தது. அந்த வகையில் புக்காரின் 1924 இல் நாங்கள் மெல்லமெல்ல அடியெடுத்து வைத்து முன்னேறுவோம். பெருந்தொகையான குடியான்கள் என்ற வண்டியை நாம் எம்மோடு இழுத்துச் செல்ல வேண்டும்” என்றார். 1925 இல் புகாரின் நமது விசாலமான விவசாய வண்டியை நம் பின்னால் இழுத்துக் கொண்டு சிறு சிறு எட்டுகள் வைத்து நாம் முன்னேறுவோம்” என்றான். அதே நேரம் புகாரின் விவசாயிகளை நோக்கி நீங்கள் உங்களை வளப்படுத்திக் கொள்ளுங்கள்” என்றுகூறிய போது சரியாக இருந்தது. ஆனால் இது சோசலிசத்தின் இறுதிக் கொள்கையல்ல. புதிய வர்க்க முரண்பாடு அரங்கு வருகின்றது. புகாரின் இதை எதிர்த்து நிற்கின்றார். இதற்காக சோவியத் அமைப்பையே அழித்துவிட முனைகிறார். சோசலிச கட்டுமானத்தில் அவசியமான கூட்டுபண்ணையாக்கலை ஆதாரித்து, அதை எப்படி மெதுவாக விரைவாகவும் அலை அலையாக இணங்கிய வடிவில் நடைமுறைப்படுத்துவது என்ற நடைமுறைக் கொள்கையை ஸ்டாலினுடன் இணைந்து எடுத்து இருப்பின், ஸ்டாலின் விட்ட சில இடது தவறுகளை (ஸ்டாலின் இந்த தவறை பின்னால் ஒப்புக் கொள்கின்றார்) தவிர்த்து இருக்கமுடியும். ஆனால் புக்காரின் இதை எதிர்த்து இரகசிய சதிகளில் ஈடுபட்டார். சோவியத் எதிர்ப்பாளர் அணியுடன் தன்னை இரகசியமாக இணைத்துக் கொண்டார். சதியின் மூலங்கள் சோசலிச சமுதாயத்தில் தொடரும் வர்க்கப் போராட்டத்துடன் இணைந்தே வளர்ச்சி பெற்றது.

 

சதிகள் இணங்காணப்பட்ட நிலையில், விசாரணையையும் கைதுகளையும் கண்டு பயந்த எஞ்சிய சதியாளர்கள் இறுதித் தாக்குதலை நடத்தத் தவறுவது தற்கொலை சமமானது எனக்கருதினர். கிரஸ்டின்ஸ்கி, ரோசென்கோலிட்ஸ், துக்கா செவ்ஸகி, கமார்னின் ஆகியோர் இரகசியமாக கூடினர். 1937 மே 1ம் திகதிக்கு முன் இராணுவ நடவடிக்கையில் இறங்குவதென தீர்மானிக்கப்பட்டது. எப்படிக் கைப்பற்றுவது என்பது தொடர்பாக பல விவாதங்கள் நடந்தது. அவற்றில் துக்காசெவ்ஸ்கி வகுத்தது தான் சிறந்தது என பிற்காலத்தில் ரோசன்கோல்ட்ஸ் குறிப்பிட்டான். இச் சதி தொடங்கு முன்பே சோவியத் இவர்களை கைது செய்தது. பலர் தண்டனைக்கு உள்ளானர். உலகில் பல புதிய வதந்திகள் பரவின. செஞ்சேனை சோவியத் அரசிற்கு விரோதமாக கிளம்பிவிட்டது”, வரோஷிலோவ் மாஸ்கோ மீது படை எடுத்துச் செல்கிறார்”, சோவியத் ரஷ்யா முழுவதிலும் மக்கள் சுட்டுத் தள்ளப்படுகிறார்கள்”, சிறந்த தளகர்த்தர்களைச் செஞ்சேனை இழந்துவிட்டதால் அது சர்வதேச முக்கியத்துவம் வாய்ந்ததல்ல.” எனப் பல வதந்திகள் பரவின. இதே நேரம் சோவியத் அமெரிக்கத் தூதர் டேசிஸ் 1937 ஜூலை 4இல் சோவியத் வெளிநாட்டு அமைச்சர் மாக்சிம் விட்வினோவ் சந்தித்தார். அப்போது டேலிஸ் கூறினார். மாஸ்கோ விசாரனை டிராட்ஸ்கிய வாதிகளுக்கும், சில சேனைத் தலைவர்களுக்கும் கொடுக்கப்பட்ட தண்டனை அமெரிக்காவில் பரபரப்பை உண்டாக்கியுள்ளது.” எனத் தெரிவித்தார். அதற்கு சோவியத் வெளிநாட்டு அமைச்சர் மாக்சிம் விட்வினோவ், துரோகச் செயலிலிருந்து, சோவியத் அரசை நாங்கள் பாதுகாத்தோம் என்ற உண்மையை என்றாவது ஒரு நாள் உலகம் அறியும். நாஜி ஹிட்லரிர் ஆபத்தைத் தடுத்து நிறுத்துவதற்காக, சோவியத் யூனியனை மாபெரும் கோட்டை ஆக்கியிருகிறோம். அதன் மூலம் எங்களுக்குள்ள ஆபத்தைத் தவிர்ப்பது மட்டுமல்ல, நாஜியின் உலக ஆதிக்க வெறியை எதிர்த்துத் தாக்குவதின் மூலம், உலகத்திற்கே சிறந்த தொண்டாற்றுகிறோம்” என்று பதிலளித்தார். டிராட்ஸ்கிய மற்றும் சதியாளர்கள் மீதான நடவடிக்கை, பாசிசத்திற்கு துணைபோன பாசிசத்தை பலப்படுத்தியவர்கள் மீதான தாக்குதலாகவே இருந்தது.

 

ஆனால் முட்டாள் தனமான உணர்வற்ற ஸ்டாலின் மனநோய் தான் களையெடுப்பாகியது” என்று டிராட்ஸ்கிய பத்திரிகை தூற்றுகிறது. இரகசிய சதிக் குழுக்களைக் கட்டியது, இரகசிய பத்திரிகை கூட்டங்களை நடத்தியது, சதிகளை செய்தது, இராணுவம் மூலமான ஆட்சிக் கவிழ்ப்பு வரை திட்டமிடப்பட்டதை டிராட்ஸ்கியமாக காட்டி பெருமை கொள்ளும் இப் பத்திரிகை, அந்த சதியை எதிர்த்து நின்ற ஸ்டாலினுக்கு முட்டாள் தனமான மனநோய் உண்டு என்று தூற்றுகின்றது. சதிக்கு கம்பளம் விரித்து வரவேற்று இருக்க வேண்டும் என்ற சதிகார டிராட்ஸ்கிய கோட்பாடே, தூற்றுலுக்கு அடிப்படையாக உள்ளது.

 

ஸ்டாலின் ஜனநாயகம், ஜனநாயக மத்தியத்துவத்தை பேனுவதில் மிக உயாந்த கட்டம் வரைச் சென்றார். கட்சியில் இருந்தபடி டிராட்ஸ்கியே ஒப்புக் கொள்ளும் 1926, 1927 ஆட்சிக் கவிழ்ப்புகளின் பின் 1927 இல் கட்சியை விட்டே டிராட்ஸ்கி வெளியேற்றப்பட்டாரே ஒழிய கொல்லப்படவில்லை. அவர் வேறு ஒரு இடத்தில் தங்கவிடப்பட்டார். அங்கிருந்து அவர் சதிகளை திட்டிய நிலையில் 1928 இல் இதை நிறுத்தும்படி எச்சரிக்கப்பட்டார். இதை பெருமையாக டிராட்ஸ்கி தனது நூலில் ஒப்புக் கொள்கின்றார். ஆனால் டிராட்ஸ்கி தொடர்ந்தும் சதியில் ஈடுபட்டார். இதையடுத்து 1929 இல் நாடு கடத்தப்பட்டார். அப்போதும் கைது செய்யவில்லை. வெளிநாட்டில் இருந்து அவர் தொடர்ந்தும் சதியில் ஈடுபட்ட நிலையில், 1932 இல் சோவியத் குடியுரிமை பறிக்கப்பட்டது. உண்மையில் கட்சி விரோத நடவடிக்கை, தண்டைக்குரிய குற்றங்களை செய்த போதும் திருந்துவதற்காக இயன்றவரை சலுகை வழங்கப்பட்டது. காமெனவ்வை எடுத்தால் 1927 இல் கட்சி விரோத செயலுக்காக கட்சியில் இருந்து வெளியேற்றப்பட்டார். பின் தவறை உணர்ந்த நிலையில், கட்சியில் சேர்க்கப்பட்டார். பின் மீண்டும் கட்சி விரோத செயலுக்காக கட்சியில் இருந்து வெளியேற்றப்பட்டு மீளவும் சேர்க்கப்பட்டார். தொடர்ந்தும் பாட்டாளி வர்க்கத்துக்கு விரோதமான சக்திகளுக்கு எதிராக என்ன செய்ய வேண்டும் என்பதை லெனின் கூறும் போது வாழ விரும்பம் ஒரு கட்சி, தன்னுடைய வாழ்வு பற்றிய கேள்வியில் எள்ளளவும் ஊசாலாட்டத்தையோ, தன்னைக் குழி தோண்டிப் புதைக்க நினைப்பவர்களுடன் சமரசம் செய்த கொள்வதையோ அனுமதிக்க கூடாது” என்றார். இறுதியாகவே கட்சி விரோத நடவடிக்கைக்காக 1936 இல் தண்டனைக்குள்ளானார்கள். இப்படி பல தலைவர்கள் கட்சி விரோத நடவடிக்கைகாக வெளியேற்றப்பட்டு மீள இணைத்தும், பின் மீள வெளியேற்றப்பட்டு மீள இணைத்த பின், கட்சி விரோத சதிக்காக 1936 இல்  தண்டிக்கப்ட்டவர்களின் முந்திய வரலாற்றில் நாம் காணமுடியும். திருந்தியவர்கள் கட்சியில் தொடர்ந்து செயல்பட்டனர். இன்று சதிகளை தாம் செய்ததை பெருமையாக ஒப்புக் கொள்ளும் டிராட்ஸ்கியம், இதற்காக பலமுறை பாட்டாளி வர்க்கம் வழங்கிய சலுகைகளை துஷ்பிரயோகம் செய்தது. ஸ்டாலின் தலைமையிலான கட்சி திடீரென தண்டைகளை வழங்கிவிடவில்லை. கட்சி விரோதச் செயலில் ஈடுபட்டவர்கள் திருந்தவும், சரியான பாதைக்கு வரவும், சதிகளை கைவிட்ட ஜனநாயக மத்தியத்துவதை பேணவும் தொடர்ச்சியாக சந்தர்ப்பத்தை கட்சி வழங்கியது. ஆனால் இந்த சதியாளர்கள் இதை மீள மீள துஸ்பிரயோகம் செய்தனர். ஒரு சதிக் கும்பலாக வளர்ந்ததுடன், ஆட்சியை கவிழ்கவே திட்டமிட்டது. அது ஒரு எகாதிபத்திய ஆக்கிரமிப்புடன் ஒருங்கினைந்த போதே, கடும் தண்டனை வழங்கப்பட்டது. கட்சி விரோத நடவடிக்கைகாகவும், பாட்டாளி வர்க்க சர்வாதிகாரத்தை தூக்கியெறியவும் முயன்ற நிலையில், நாடு கடத்தப்பட்ட சதியாளரான டிராட்ஸ்கி மற்றும் பலருடன் தொடர்புகளை பேனி சதிகளை தீட்டினர்.

 

பாட்டாளி வர்க்கம் திருந்த வழங்கிய சந்தர்ப்பத்தை தூற்றும் டிராட்ஸ்கியம்; “… கீழ் மட்ட அணிக்குள் விமர்சனம் செய்பவர்கள் வர்க்க எதிரியின் புறநிலையான எஜண்டுகள் என வெளியேற்றப்பட்டனர். மற்றும் சிலர் பிராயச்சித்த சடங்குகளில் ஒழுங்கு படுத்தப்பட்டனர்…. அல்லது பல நாள் விவாதத்தின் போக்கில் தண்டனை அளிக்கப்பட்டு மீண்டும் சரியான வழிக்கு கொண்டு வரப்பட்டனர்” என்று கூறி, இதை தவறானது என்கின்றனர். தமது சதிகள், திட்டமிட்ட பயங்கரவாத நடடிவக்கைகள் சரியானவை என்கின்றனர். கீழ்மட்ட அணிகள் திருந்த சந்தர்ப்பம் வழங்குவது மார்க்சியமல்ல என்கின்றனர். ஸ்டாலினிசத்தின் அடிப்படை சிறப்பியல்பு என்னவென்றால் அந்த அடக்குமுறை கம்யூனிஸ்ட் கட்சியின் உறுப்பினர்கள், தலைவர்கள், அதிகாரிகள் முதலியவர்களுக்கு எதிராக வழிநடத்தப்பட்டது.” என்று கூறி, இதை அவதூறாக்கி தூற்ற முனைகின்றனர். வர்க்கப் போராட்டம் இடைவிடாது தொடரும் வரை, இது என்றைக்கும் அப்படித்தான் இருக்கும். லெனினும் அப்படித்தான் வரையறுக்கின்றார். லெனின் நவீன திரிபுவாதம் பற்றி குறிப்பிடும் போது தொழிலாளர் இயக்கத்தின் தலைமையிலுள்ள மிகச் சிறிய ஒரு பகுதி தான்” பாட்டாளி வர்க்கத்துக்கு எதிராக தன்னை புனராமைக்கின்றது. புரட்சிக்கு பிந்திய சமுதாயத்தில் இதை எதிர்த்து போராடுவதையே, டிராட்ஸ்கியம் தனிநாட்டு சோசலிசம் என்கின்றது. மாவோ பாட்டாளி வர்க்க அமைப்பில் எதிரி எங்கே உள்ளான் என்ற கேள்விக்கு, தற்போதைய இயக்கத்தின் பிரதான தாக்குதல் இலக்கு முதலாளித்துவப் பாதையை மேற்கொள்ளும் அதிகாரத்திலுள்ள கட்சி நபர்களாகும்” என்றார். இதைத் தான் ஸ்டாலினும் செய்தார். மாவோ 1962 இல் சொன்னார் நாம் சோசலிசக் கல்வியை நடத்த வேண்டும். வர்க்க முரண்பாடுகளையும் வர்க்கப் போராட்டத்தையும் சரியாகப் புரிந்து கொண்டு கையாள வேண்டும். நமக்கும் எதிரிக்கும் இடையிலான முரண்பாட்டை மக்கள் மத்தியிலான முரண்பாட்டிலிருந்து வேறுபடுத்தி அவற்றைச் சரியாகக் கையாள வேண்டும். இல்லையானல் நம்முடையயதைப் போன்ற ஒரு சோசலிச நாடு அதன் எதிரிடையானதாக மாறும், சீராழியும், ஒரு முதலாளித்துவ மீட்சி நடந்தேறிவிடும். இப்போதிலிருந்து ஒவ்வொரு ஆண்டும் ஒவ்வொரு மாதமும் ஒவ்வொரு நாளும் இதை மனதில் இருத்திக் கொண்டு இந்தப் பிரச்சனையை மேலோட்டமாகக் கருதாது மார்க்சிய-லெனினியப் பாதையைப் பற்றி நிற்க வேண்டும்” என்றார். ஒரு முதலாளித்துவ மீட்சியின் போக்கில் இரண்டு வெவ்வேறு கூறுகளை சரியாக அடையாளம் காண வேண்டியதை சுட்டிக் காட்டுகின்றார். அதில் இருந்தே எதிரியை பிரித்தறிந்து தண்டனைக்குள்ளாக்க வேண்டியதைச் சுட்டிக் காட்டுகின்றார். சோவியத்தில் எதிரி மக்களாகவோ, மக்கள் மத்தியிலான முரண்பாட்டில் இருந்து அடையாளம் காணப்படவில்லை. இரகசிய குழுக்களையும் அதன் தலைவர்களையுமே குறிவைக்கப்பட்டது.

 

சோவியத்தில் இரகசிமான சதிக் கும்பலின் வலைப் பின்னால் அம்பலமான நிலையைலேயே ஒரு விசாரனைக்கு சோவியத்தை உந்தித் தள்ளியது. இந்த களையெடுப்பில் எல்லையற்ற இரகசிய சதிக் குழுக்களாக இருந்தால், இந்த சதி மேல் இருந்து திட்மிடப்பட்டதால் இந்த விசாரனை எதிரி நன்பர்களை பிரித்தறிவது கடுமையாகியது. சதிக் குழுக்கள் அம்பலமாகி வந்த நிலையில் சதியை வேறுபடுத்தி பார்க்கும் ஒரு  நடைமுறை சார்ந்த கீழ் இருந்து பிரிதறியும் முறை கண்டறியப்படவில்லை. மேல் இருந்து நடந்த களையெடுப்பாக இருந்தால், தவறுகள் இழைக்கப்பட்டன. நட்பு ரீதியான கருத்து முரண்பாட்டுக்கும் சதிக் கும்பலுக்கும் இடையில் உள்ள வேறுபாட்டை இனம் காணும், அரசியல் வழிமுறை இன்றிய நிலை உருவானது. அத்துடன் திருந்தக் கூடிய, மற்றும் மேல் மட்ட கீழ்மட்ட உறுப்பினர்களை வேறுபடுத்தி அறியும் வழிவகையை எப்படிக் கையாள்வது என்ற வழிமுறை இன்றி விசாரனைகள் பொதுவாக நடந்தன. இதனாலும் முன் அனுபவமற்ற ஒரு சமூக வடிவமாக இருந்தாலும் பல தவறுகள் இழைக்கப்பட்டன. மாவோ சொந்த நாட்டில் இதை எதிர் கொண்ட போது கடந்த காலத்தில் கிராமப்புறப் பகுதிகளில், தொழிற்சாலைகளில், கலாச்சார அரங்குகளில் போராட்டங்களைத் தொடுத்தோம், சோசலிசக் கல்வி இயக்கத்தை நடத்தினோம். ஆனால் இவையனைத்தும் பிரச்சனைகளை தீர்க்கத் தவறின ஏனெனில் இருண்ட அம்சத்தை வெளிப்படையாகவும், அணைத்து தழுவிய வகையிலும் கீழிலிருந்து அம்பலப்படுத்தி பரந்துபட்ட மக்களைத் தட்டியெழுப்புவதற்கான ஒரு வடிவத்தை, ஒரு வழிமுறையை நாம் காணவில்லை” என்றார். மாவோ இதை கீழ் இருந்து முதலாளித்துவ மீட்சியை தடுக்கும் வழிவகையையும், எதிரியை தனிமைப்படுத்தி அழிக்கும் யுத்த தந்திரத்தை கண்டறிந்தார். மக்கள் கீழ் இருந்து நடத்தும் இடைவிடாத (கலாச்சாரப்) புரட்சி, எதிரிக்கு பலமான அடி கொடுத்தது. ஆனால் சோவியத்தில் முக்கியமான சதியாளர்கள் மீதான விசாரனை, சோவியத் சட்ட திட்டத்துக்கு இணங்க பகிரங்கமாக நடந்தது. மறுதளத்தில் சதியாளர்களை வேறுபடுத்தி அறியும் வழிமுறை இன்மையால், சோவியத் அரசியல் அமைப்பு சட்டத்துக்கு உட்பட்டவகையில் ஒரு பகுதி தண்டனை வழங்கப்படவில்லை. இதனால் தவறுகள் இயல்பாகி சிலர் தவறுதலாக தண்டனைக்குள்ளானர்கள். இதை 1939 இல் ஸ்டாலின் ஒப்புக் கொண்டார். அதற்கு முன்பே தொடர்ச்சியாக இந்த விசாரனைப் போக்கை தடுத்து நிறுத்தியிருந்தார். தவறு இழைத்தவர்களை திருந்துவதற்கான அனைத்து முயற்சியையும், கட்சியின் ஜனநாயக மத்தியத்துவத்தையும், ஆட்சி அதிகாரத்தையும் முழுமையாக பயன்படுத்தியே இந்த சதி நடந்தது. இது எந்த நாட்டிலும் இந்தளவு விரிவாக அனுமதிக்கப்படவில்லை. அரசிலும் கட்சியிலும் இருந்தபடி வெளிநாடுகள் வரை சென்று சதி செய்யும் உரிமையை சோவித்துக்கு வெளியில் யாரும் அனுமதித்ததில்லை. உண்மையில் முன் அனுபவமற்ற நிலையில் இதை எதிர்கொண்ட போது, எதிரியின் மூர்க்கத்தனமான சதிகளின் பின்னனியில் உருவான சில தவறுகளே இவை. ஸ்டாலின் தவறுகள் வரலாற்றுப் படிப்பினையாக மட்டுமே எடுக்கப்படவேண்டும். 

 

இந்நூலின் முந்தைய பகுதிக‌ள்

1. ஸ்டாலின்துற்றப்படுவதுஏன்? :பகுதி – 1

2. ஸ்டாலின்துற்றப்படுவதுஏன்? :பகுதி – 2

3. ஸ்டாலின்துற்றப்படுவதுஏன்? :பகுதி – 3

4. ஸ்டாலின்துற்றப்படுவதுஏன்? :பகுதி –  4

5. ஸ்டாலின்துற்றப்படுவதுஏன்? :பகுதி – 5

6. ஸ்டாலின்துற்றப்படுவதுஏன்? :பகுதி – 6

7. ஸ்டாலின்துற்றப்படுவதுஏன்? :பகுதி – 7

8. ஸ்டாலின்துற்றப்படுவதுஏன்? :பகுதி – 8

9. ஸ்டாலின்துற்றப்படுவதுஏன்? :பகுதி – 9

10. ஸ்டாலின்துற்றப்படுவதுஏன்? :பகுதி – 10

11. ஸ்டாலின்துற்றப்படுவதுஏன்? :பகுதி – 11

12. ஸ்டாலின்துற்றப்படுவதுஏன்? :பகுதி – 12

13. ஸ்டாலின்துற்றப்படுவதுஏன்? :பகுதி – 13

14. ஸ்டாலின்துற்றப்படுவதுஏன்? :பகுதி – 14

15. ஸ்டாலின்துற்றப்படுவதுஏன்? :பகுதி – 15

16. ஸ்டாலின்துற்றப்படுவதுஏன்? :பகுதி – 16

17. ஸ்டாலின்துற்றப்படுவதுஏன்? :பகுதி – 17

18. ஸ்டாலின்துற்றப்படுவதுஏன்? :பகுதி – 18

19. ஸ்டாலின் தூற்றப்படுவது ஏன்? : பகுதி – 19

20 ஸ்டாலின் தூற்றப்படுவது ஏன்? பகுதி: 20

மின்னூலாக(PDF) தரவிறக்க‌

குற்றவாளிகளைப் போல் மக்களை உளவும் அரசுகள்

சில நாட்களுக்கு முன்னர் ஒரு வாரம் இருமுறை இதழில் ஒரு செய்தி வந்திருந்தது. சென்னை தரமணியில் நுண்ணலை பொறியியல் மற்றும் ஆராய்ச்சி நிறுவனம் (சமீர்) மத்திய அரசின் தகவல் தொழில்நுட்பத் துறையின் கீழ் செயல்பட்டு வருகிறது. அமெரிக்காவின் ஜார்ஜியா தொழில்நுட்ப நிறுவனத்துடன் இணைந்து செல்லிடப்பேசி, மின்னணுவியல் பொருட்களை மிகச்சிறிய அளவில் தயாரிக்கும் இதில் நடந்த 20 கோடி ரூபாய் ஊழல் குறித்து அந்தச் செய்தி தொடர்கிறது. நீங்களும்கூட இந்தச் செய்தியை படித்து கடந்திருக்கக் கூடும். ஆனால், மத்திய அரசின் கீழ் இயங்கும் ஒரு நிறுவனமும் ஒரு அமெரிக்க நிறுவனமும் இணைந்து செல்லிடப்பேசி மின்னணு கருவிகளை மிகச் சிறிய அளவில் தயாரிக்க வேண்டிய அவசியமென்ன?

 

இந்தியா மட்டுமல்ல, பாதுகாப்பு நிறுவனங்கள் என்ற பெயரில் இது போன்ற நிறுவனங்கள் அமெரிக்க ஐரோப்பிய நாடுகளில் ஏராளம் இயங்குகின்றன. அமெரிக்காவின் s.s.8, blue coat, பிரான்சின் vupen, செக் குடியரசின் phonexia,  ஜெர்மனியின் ipoque போன்ற நிறுவங்கள் அரசுகளின் உதவியுடன் கணிணி நச்சு நிரல்களை பரப்புவது தொடங்கி, மக்கள் செல்லிடப்பேசிகளில் எடுக்கும் புகைப்படங்கள், பேச்சுக்களை அரசுக்கு விற்பது வரை அனைத்தையும் செய்கின்றன. அரசுகள் ஏன் இவைகளை செய்கின்றன?

 

நாட்டு மக்களை கண்காணிப்பது என்பது தொடக்க காலம் முதல் அரசுகள் செய்து வருவது தான். மக்களின் பாதுகாப்பு, எச்சரிக்கை என பல காரணங்கள் இதற்காக கூறப்பட்டாலும், அரசு குறித்து மக்கள் என்ன கருத்துக் கொண்டுள்ளார்கள் என்பதை அறிவது தான் ஆதார நோக்கம். தொழில்நுட்ப அறிவும், பொருட்களும் அதிகரிக்க, அதிகரிக்க அரசுக்கு தெரியாமல் மக்கள் எதையும் செய்ய முடியாது என்ற நிலையை ஏற்படுத்தியிருக்கிறது. தனி மனித உரிமை குறித்து மக்களுக்கு வகுப்பெடுக்கும் அரசுகள், அவர்களின் படுக்கையறை வரை கண்களை நுழைத்து வேவு பார்க்கின்றன. அடிப்படை வசதிகளான சுகாதாரம், குடிநீர், சாலை வசதிகளை செய்து தர மறுக்கும், பொருளாதார நெருக்கடி என்ற பெயரில் அற்ப மானியங்களைக் கூட வெட்டும் அரசு இது போன்ற கண்காணிப்புகளுக்காக ஆயிரக்கணக்கான கோடிகளைக் கொட்டியிறைக்கின்றன.

 

இந்தியாவில் உலகமயம் தீவிரமாக செயல்பாட்டுக்கு வந்த பிறகு மூன்று லட்சத்திற்கும் அதிகமான விவசாயிகள் தற்கொலை செய்து மாண்டு போயிருக்கிறார்கள், பல லட்சம் விவசாயிகள் விவசாயத்தை விட்டு துரத்தப்பட்டிருக்கிறார்கள். கைத்தறி நெசவின் சிறப்பு ரகங்கள் நீக்கப்படுகின்றன என்ற ஒற்றை உத்தரவினால் பல்லாயிரக் கணக்கான கைத்தறி நெசவாளர்கள் நெசவுத்தொழிலை விட்டு துரத்தப்பட்டார்கள். சிறு குறுவீத உற்பத்தியாளர்கள் அரசின் பல்வேறு திட்டங்களினால், அறிவிப்புகளினால் அவர்களின் தொழில்களிலிருந்து விரட்டி விடப்பட்டிருக்கிறார்கள். சில்லரை விற்பனையாளர்கள், சிறு வணிகர்கள் நேரக்கணக்கின்றி உழைப்பதின் மூலம் தங்கள் வாழ்வை நகர்த்துவதைக் கூட அன்னிய முதலீட்டை கொண்டு வந்து அழிக்கத்துடிக்கிறது அரசு. மட்டுமல்லாது நாட்டின் கனிம வளங்களை சிலர் கொள்ளையடிப்பதற்காக தலைமுறை தலைமுறையாக அங்கு வாழ்ந்து வரும் மக்களை பச்சையாக வேட்டையாடுகிறது. இந்தியாவில் மட்டுமல்ல உலகம் முழுவதும் ஏகாதிபத்தியங்களால் செயல் படுத்தப்பட்டுவரும் மறுகாலனியாக்கத்தினால் மக்கள் தொழில்களை இழந்து வாழ்விழந்து வெறுமை சூழ்ந்த இயலாமையில் வெதும்பிக் கொண்டிருக்கிறார்கள். இவர்கள் எங்கு எப்போது என்ன செய்வார்களோ என்று எல்லா அரசுகளுமே அஞ்சிக் கிடக்கின்றன. அவர்களை கட்டுக்குள் வைக்க துடிக்கின்றன.

 

அண்மையில் துனீசியாவில் தொடங்கி லிபியா ஈறாக அரேபிய ஆப்பிரிக்க நாடுகளிலும், கிரேக்கம், இங்கிலாந்து முதலான ஐரோப்பிய நாடுகளிலும், அமெரிக்க வால் ஸ்ட்ரீட் முற்றுகையுமாய் உலகெங்கும் அரசுக்கெதிராக வெடித்துக் கிளம்பி கலவரம் செய்து வருகிறார்கள் மக்கள். அதை முளையிலேயே கண்டுபிடித்து கிள்ளி எறிவதற்காக மக்கள் யாருடன் பேசுகிறார்கள்? என்ன பேசுகிறார்கள்? என்ன செய்கிறார்கள்? அவர்களின் செயல்பாடு என்ன? சிந்தனை என்ன? பொழுபோக்குகள் எப்படி? என அவர்களின் ஒவ்வொரு அசைவையும் அறிவதற்காக  எந்த எல்லைக்கும் செல்வதற்கு தயாராக இருக்கின்றன அரசும் ஆளும் வர்க்கமும்.

 

அதேநேரம் இது வெளிப்படையாக மக்களுக்கு தெரிந்தால் அதுவே எண்ணெய் வார்க்கும் என்பதால் தொழில்நுட்ப ஆராய்ச்சி என்ற போர்வையிலும், தனியார் நிறுவனங்களைக் கொண்டும் அதையும் மீறி மக்களுக்கான நல்வாழ்வுத் திட்டங்களாகவும் செயல் படுத்தப்படுகின்றன. அப்படியான ஒரு திட்டம் தான் இந்தியாவில் சில ஆண்டுகளுக்கு முன் தொடங்கப்பட்ட ஆதார் அடையாள அட்டை திட்டம். கடந்த ஆண்டில் இந்த தேசிய அடையாள அட்டை வழங்கலை தொடங்கிவைத்த மண்மோகன் சிங் இந்த அட்டையின் பயன்களை விளக்கினார். பொது விநியோகத்தில் நடந்து வரும் முறைகேடுகள் களையப்படும், கிராமப்புற வேலை உறுதித் திட்ட நிதி மக்களைச் சென்றடையும், அனைவருக்கும் கல்வி கிட்டும், உள்நாட்டிலேயே இடம் பெயர்ந்து வாழும் மக்களுக்கு ஓர் அடையாளம் தரப்படும், அரசின் நலத் திட்டங்கள் மக்களை முறையாகச் சென்றடையும், அதிகாரிகளின் ஊழல்-முறைகேடுகள் கட்டுப்படுத்தப்படும், நாட்டுக்கு பாதுகாப்பு கிடைக்கும், …. என்று தண்டவாளத்தில் பயணிக்கும் தொடர்வண்டி போல் நீட்டிக் கொண்டு சென்றார். ரேசன் கடைகளில் நடக்கும் முறைகேடுகளை, அதிகாரிகளின் ஊழல்களை இந்த அட்டை விசயகாந்து போல காலால் எகிறி அடித்து தடுக்குமோ? 

 

இந்த அட்டைக்கு மக்கள் தங்கள் பத்து விரல்களின் கை ரேகைகள், கண்ணின் விழித்திரை ரேகை, புகைப்படம், பெயர், முகவரி, குடும்ப உறுப்பினர்களின் விபரம், தொழில் குறித்த விபரங்கள் போன்றவற்றை பதிவு செய்ய வேண்டும். பின்னர் இந்த அட்டை புகைப்படம், 12 இலக்க எண், தகவல்கள் அடங்கிய மின்னணு சில் போன்றவற்றை உள்ளடக்கியதாக வழங்கப்படும். மட்டுமல்லாது, இந்த தகவல்கள் வங்கி, காவல் நிலையம், விமான நிலையம் உள்ளிட்ட ஏனைய வெளித்தகவல்களுடன் ஒன்றிணைக்கப்பட்டு கணிணி சேமிப்புக் கிடங்குகளில் சேமிக்கப்படும்.  இந்த திட்டம் முழுமையாக பயன்பாட்டுக்கு வந்தால் அனைவரும் இந்த அட்டையை கண்டிப்பாக உடன் வைத்திருந்தே ஆக வேண்டும் என்பதால் தில்லியில் இருந்து கொண்டே திருக்கணாம்பட்டி அய்யாவு எந்த இடத்தில் சென்று கொண்டிருக்கிறார் என்பதை அறிய முடியும். நாகரீகம், வசதி, முன்னேற்றம் என்ற பெயரில் செல்லிடப் பேசி உள்ளிட்ட மின்னணுவியல் பொருட்களை கைகளில் திணித்து வருவதால், திடீரென உங்கள் முன் காவல்துறையினர் தோன்றி கடந்த ஞாயிறு மாலை 6.15.28 மணி நேரத்தில் மன்மோகன் சிங் என்பதற்குப் பதிலாக மண்மோகன் சிங் என்று உச்சரித்தீர்கள் எனவே நீங்கள் காவலில் எடுக்கப்படுகிறீர்கள் என்று கூறலாம். சில நாட்களுக்கு முன்னர் தலைவர்கள் கடுமையாக விமர்சிக்கப் படுவதால் ஃபேஸ்புக் போன்ற சமூக தளங்களுக்கு கட்டுப்படுகள் விதிப்பது குறித்து அரசு விவாதித்து வருகிறது என்று மண்மோகன் சிங் கூறியதை இதனுடன் இணைத்துப் பார்த்து புரிந்து கொள்ளலாம்.

 

அரச வன்முறை வெறியாட்டங்களை பொது வெளியில் கூற முனைந்தால் போலி மோதல்களில் துப்பாக்கிக் குண்டுகள் பரிசாக கிடைக்கும் என்பது நடைமுறையாகி வருகிறது. காஷ்மீர் என்று இந்தியாவுடன் இருந்தது என்று கேட்டதற்காக அருந்ததி ராய் போன்றவர்கள் குறிவைக்கப் பட்டார்கள். சத்திஸ்கர் பழங்குடியினருக்கு விழிப்புணர்வு ஏற்படுத்தியதற்காக மருத்துவர் பினாயக் சென்னுக்கு ஆயுள் தண்டனை விதிக்கப்பட்டது. மக்களைத் திரட்டி போராடினால் தீவிரவாதிகளாய் சுட்டுக் கொல்லப்படுகிறார்கள். சில நாட்களுக்கு முன் மக்கள் தலைவர் தோழர் கிஷன் ஜியை சித்திரவதை செய்து கொன்று வீதியில் வீசினார்கள்.

 

அரசு அமைப்புக்கு எதிராக சுட்டுவிரல் நீட்டினாலும் கொன்று குவிப்பது ஒருபுறமென்றால்,மறுபுறம் மக்கள் அரசியலை நோக்கி திரும்பும் அத்தனை வழிகளையும் அடைத்து வருகிறார்கள்.  உழைக்கும் மக்களின் ஒரே பிரச்சார உத்தி, சுவரொட்டி ஒட்டுவதும் தெருமுனை கூட்டங்கள் நடத்துவதும் தான். நகரின் அழகு குலைகிறது என்று சுவரொட்டி ஒட்டுவதை தடுக்கிறார்கள்.  யார் பேசுவார்கள் என்ன பேசுவார்கள் என்று இரண்டு நாட்களுக்கு முன்னர் உள்ளூர் காவல் நிலையத்தில் எழுதிக் கொடுக்க வேண்டும் என்று மிரட்டுகிறார்கள். ஆக மக்கள் எந்த அரசியல் உணர்வும் இல்லாத, தங்களுக்கு தலையசைக்கும் மந்தைகளாக இருக்க வேண்டும் என்று தான் ஆளும் வர்க்கங்கள் விரும்புகின்றன. மீறினால் கழிப்பறை செல்லும் நேரங்களையும் விட்டுவைக்காமல் கண்காணித்து வாய்ப்புக்காகவும், தருணத்திற்காகவும் அலைகிறது.

 

நடக்கும் அனைத்தும் மக்களை அரசியலை நோக்கியே தள்ளிக் கொண்டிருக்கிறது. சேவாக்கின் இருநூறுக்காக கொண்டாடுவதும், கொலைவெறி பாடலை வெறிபிடித்து ரசிப்பதும் போதுமானது அல்ல என்பதை உரத்து உணர்த்திக் கொண்டிருக்கிறது.

 

தொடர்புடைய இடுகைகள்

புரிந்தவர்களுக்கு ஆபரேசன் கிரீன் ஹண்ட், புரியாதவர்களுக்கு…?

கொடியேற்று, கொண்டாடு, குடியரசு தினம்

 

மின்னூலாக(PDF) தரவிறக்க‌

அல்லாவின் பார்வையில் பெண்கள்: 3. விவாரத்து

விவாகரத்து செய்யும் வசதி பெண்களுக்கு அவசியம் என்பதிலோ, அதை இஸ்லாம் அங்கீகரித்திருக்கிறது என்பதிலோ மாற்றுக் கருத்து ஒன்றுமில்லை. ஆனால் அதை ஆண்களுக்கு நிகராக இஸ்லாம் கொடுத்த பெண்களுக்கான உரிமை என்பதில், அதை இஸ்லாம் தான் முதலில் வழங்கியது என்பதில் மாற்றுக் கருத்துக்கு இடமுண்டு. தவிர்க்க முடியாத ஒன்றாக, ஆணாதிக்கப் பார்வையுடன் தான் விவாகரத்து உரிமையை இஸ்லாம் பெண்களுக்கு வழங்கியிருக்கிறது. அதேநேரம் விவாகரத்து எனும் அனுமதி பெண்களுக்கு சரியான அளவில் பலனளிக்க வேண்டுமென்றால் பொருளாதார சுதந்திரம் பெண்களுக்கு இன்றியமையாதது. இஸ்லாம் இதில் பெண்களை ஆண்களுக்கு கீழாகவே வைத்திருக்கிறது என்பது வெளிப்படை.

 

பெண்களுக்கும் விவாகரத்துரிமை என்றதும் ஆண்களைப் போல் ‘தலாக்’ எனும் சொல்லை மும்முறை கூறி பெண்கள் திருமணத்தை ரத்து செய்துவிட முடியாது. ஆண்கள் செய்யும் விவாகரத்திற்கும் பெண்கள் செய்யும் விவாகரத்திற்கும் இடையே நடைமுறையில் வேறுபாடு இருக்கிறது. பெண்களின் விவாகரத்திற்கு ’குலாஃ’ அல்லது ’குலாஉ’ என்று பெயர். விவாகரத்து பெற விரும்பும் பெண் தலைவரிடம் (நீதிமன்றம்) சென்று முறையிட வேண்டும். அவர் கணவனை அழைத்து, திருமணத்தின் போது கணவன் கொடுத்த மணக் கொடையை மனைவி திரும்பக் கொடுத்ததும் இருவருக்கும் இடையிலான திருமணம் முறிந்ததாக கொள்ளப்படும்.

 

இஸ்லாத்திற்கு முன்பு அரேபியாவின் குடும்ப அமைப்பில் ஆணே தலைமைப் பொறுப்பில் இருந்தான் என்றாலும் பெண்ணிற்கான முதன்மைத்தனம் முற்றிலுமாக குலைந்து விடவில்லை. பெண்ணின் மறுமணம், விவாகரத்து போன்றவை அங்கு நடைமுறையாகவே இருந்தது. முகம்மதின் முதல் மனைவி ஹதீஜா என்பது அனைவரும் அறிந்தது தான். ஆனால், ஹதீஜாவுக்கு முகம்மது முதல் கணவரல்ல மூன்றாவது கணவர். அமைக்கப்பட்டிருக்கும் கூடாரத்தின் வாசலை ஒரு திசையிலுருந்து வேறொரு திசைக்கு மாற்றி வைப்பதன் மூலம் தன் கணவனை விவாகரத்து செய்து விட்டதாக பெண்கள் ஆண்களுக்கு அறிவிப்பது அங்கு வழக்கமாக இருந்திருக்கிறது. இந்த வழியில் தான் இஸ்லாமும் பெண்களுக்கான விவாகரத்தை அங்கீகரித்திருக்கிறது.

 

இங்கு கவனிக்கப்பட வேண்டிய செய்தி என்னவென்றால், ஆண்கள் பெண்களை விவாகரத்து செய்வது குறித்து பல வசனங்களில் விரிவாக விளக்கும் குரான், பெண்கள் ஆண்களை விவாகரத்து செய்வது குறித்து எந்த இடத்திலும் தனித்த வசனமாக பேசவில்லை. மாறாக ஓரிரு வசனங்களில் மேம்போக்காக சொல்லிச் செல்கிறது. ஆதலால் குலா விவாகரத்து குறித்து பேசும்போது ஹதீஸ்களை மட்டுமே மேற்கோள் காட்டி பேசுவார்கள்.

 

ஸாபித் இப்னு கைஸ் இப்னு ஷம்மாஸ் அவர்களின் துணைவியார் நபி அவர்களிடம் வந்து ……… தோட்டத்தை ஏற்றுக் கொண்டு ஒரு முறை தலாக் கூறிவிடுங்கள் என்றார்கள். புஹாரி 5273

 

இது போன்று இன்னும் சில ஹதீஸ்களும் இருக்கின்றன. இது குறித்து கூறும் குரான் வசனங்கள்,

 

…….. கணவர்களுக்கு பெண்களிடம் இருக்கும் உரிமைகள் போன்று முறைப்படி அவர்கள் மீதும் பெண்களுக்கு உரிமையுண்டு …….. குரான் 2:228

 

……. அல்லாஹ்வின் வரம்புகளை அவர்களால் நிலைநிறுத்த முடியாது என்று அஞ்சினால் அவள் ஏதேனும் ஈடாக கொடுத்து விடுவதில் குற்றமில்லை …….. குரான் 2:229

 

வசனம் 2:229 ல் ஏதேனும் ஈடாக கொடுத்து விடுவது என்பதற்கான பொழிப்புரையாகத் தான் புஹாரி 5273 சுட்டப்படுகிறது.  அதாவது திருமணத்தின் போது பெற்ற மஹரை திருப்பிக் கொடுத்துவிடுவது.

 

ஆண்களின் விவாகரத்தான தலாக்கிற்கும் பெண்களின் விவாகரத்தான குலாவிற்கும் இடையில் வித்தியாசங்கள் இருக்கின்றன.  ஆண்களின் தலாக் மூன்று கட்டங்களாக நிகழ்வது, பெண்களின் குலா ஒரே நேரத்தில் முடிவுக்கு வந்துவிடும். ஆண்களின் தலாக் யாரிடமும் முறையிட வேண்டிய அவசியமின்றி நேரடியாக மனைவியிடமே கூறிவிடலாம், பெண்களின் குலா பொதுவான தலைவரிடம் முறையிட்டே செய்யமுடியும். இவைகளை இஸ்லாம் கூறும் குடும்பவியல் நடைமுறைகளோடு ஒப்பு நோக்கினால் இந்த விவாகரத்து நடைமுறைகள் எந்த நோக்கில் திட்டமிடப்பட்டிருக்கின்றன என்பது தெரியவரும்.

 

ஆண்களுக்கு நான்கு முறைப்படியான மனைவிகளும் கூடவே எத்தனை அடிமைப் பெண்களை வேண்டுமானாலும் பயன்படுத்திக் கொள்ளும் அனுமதி இருக்கிறது. மட்டுமல்லாது தனக்கு கீழ்படிய மறுக்கும் மனைவியை படுக்கையில் விலக்கிவைத்து, அடித்து கட்டுப்படுத்தும் அனுமதியும் கணவனுக்கு இருக்கிறது. இதனோடு இணைந்து தலாக் எனும் விவாகரத்து மனைவியை மிரட்டுவதற்கு வழிவகை செய்து தருகிறது. பொதுவான ஒருவரிடம் முறையிட வேண்டிய தேவையின்றி படிப்படியாக இரண்டு முறை தலாக் கூறினாலும் மீண்டும் இணைந்து கொள்ள முடியும். ஆக, மனைவியை தனக்கு கட்டுப்பட்டவளாக நடக்க வைப்பதற்கான உச்ச கட்ட ஆயுதமாக ஆணுக்கு தலாக் பயன்படுகிறது. (இதை நடைமுறையில் யாரும் காணலாம்) ஒரு மனைவி இறந்தால் அவளின் உடமைகளின் பெரும்பகுதிக்கு கணவனே வாரிசாக இருக்கும் நிலையில், திருமணத்தின் போது கொடுக்கப்பட்ட மணக் கொடை கணவனிடம் திரும்பிச் சேர்வதை உறுதி செய்யும் பொருட்டு பொதுவான ஒருவரிடம் முறையிட்டுத்தான் பெண் விவாகரத்து பெற முடியும். அதேநேரம் மனைவி முறையிட்டு கணவனும் ஒப்புக் கொண்டு விட்டால் அந்தக் கணமே விவாகரத்து செயல்பாட்டுக்கு வந்து விடுகிறது. இதுவே ஆணுக்கு தவணை முறையில் செய்யப்படுவதால் அவனுக்கு இருக்கும் அவகாசம் பெண்ணுக்கு இல்லை. எனவே பெண் தனக்கு பிடிக்காத கணவனை விவாகரத்து செய்வது என்பது வேறு வழியில்லாத நிலையில் எதிர்காலம் குறித்த பயத்தையும் மீறித்தான் செய்ய முடியும். இது கணவனின் ஏற்க முடியாத செயல்களையும் கூட சகித்துப் போக வைக்கிறது. இதுவே ஆண் என்றால் தனக்கு கட்டுப்பட மறுப்பவளை தலாக் கூறி மிரட்டி அவள் பணிந்ததும் ஏற்றுக் கொள்ள முடியும்.

 

பொதுவாக விவாகரத்து பெறும் பெண்களுக்கு எதிர்காலம் என்பது இருண்டதாகவே இருக்கும். காரணம், இந்த ஆணாதிக்க உலகில் பெண் எல்லாவிதத்திலும் ஆணைச் சார்ந்தே இருக்க வேண்டியதிருக்கிறது. மண உறவுகள் விலகிவிட சொந்த உறவுகள் ஏற்றுக் கொண்டால் மட்டுமே அவளுக்கு எதிர்காலம். இல்லையென்றால் அவளுக்கு இந்த உலகம் நரகமாகவே இருக்கும். இது தான் பெண்களை கணவன் என்ன செய்தாலும் அதை சகித்துப் போக வைக்கிறது. இது மாற வேண்டுமென்றால் பெண்ணுக்கு பொருளாதாரத்தில் சுதந்திரம் வேண்டும். ஆனுக்கு சமமாக பெண்ணை உலவவிட எந்த மதமும் சம்மதித்ததில்லை, இதில் இஸ்லாமும் விலக்கில் இல்லை.  எனும்போது பெண்ணை ஆணுக்கு கீழானவளாக இருத்தி வைத்துவிட்டு விவாகரத்து உரிமை வழங்கியிருக்கிறோம் என்பதில் எந்தப் பொருளும் இருக்க முடியாது.

 

இத்தொடரின் முந்தைய பகுதிகள்

37. அல்லாவின் பார்வையில் பெண்கள் 2. சொத்துரிமை

36. அல்லாவின் பார்வையில் பெண்கள் 1. புர்கா

35. மனிதன்: அல்லாவின் அருளா? பரிணாமத்தின் பரிசா? 4

34. மனிதன்: அல்லாவின் அருளா? பரிணாமத்தின் பரிசா? 3

33. மனிதன்: அல்லாவின் அருளா? பரிணாமத்தின் பரிசா? 2

32. மனிதன்: அல்லாவின் அருளா? பரிணாமத்தின் பரிசா? 1

31. ஸம் ஸம் நீரூற்றும் குரானும்

30. விண்வெளியைக் கடந்த முதல் மனிதர் முகம்மதின் மிஹ்ராஜ்

29. மீனின் வயிற்றில் மனிதனைப் பாதுகாத்த அல்லா

28. குரான் குறிப்பிடும் பேசும் உயிரினங்கள் இருப்பது சாத்தியமா?

27. தடயமில்லாத அல்லாவின் அத்தாட்சிகள்

26. குரானில் மிதக்கும் சின்னச் சின்னப் பிழைகள்

25. நிலவை உடைத்து ஒட்டிய அல்லா

24. ஆதிமனிதன் மொழியறிந்தவனா? அல்லாவின் பதில் என்ன?

23. கால வெளியில் சிக்கிக்கொண்ட அல்லா

22. குரானின் காலப்பிழைகள்

21. குரான் குறிப்பிடும் நட்சத்திரங்கள்: மனிதப் பார்வையா? இறைப் பார்வையா?

20. மக்காவின் பாதுகாப்பு: குரானின் அறிவிப்புகள் உண்மையா?

19. சூரத்துல் கஹ்புக்கும் புத்தருக்கும் என்ன தொடர்பு?

18. நூஹின் கப்பல் நிறைய புராணப் புழுகுகள்

17. பிர் அவ்னின் உடல் எனும் கட்டுக்கதை

16. கருவறை குறித்த அல்லாவின் கதையாடல்கள்

15. விந்து குறித்த குரானின் விந்தைகள்

14. பாலும் தேனும் அல்லாவின் வேதத்தின் பாடுகள்

13. கோள்களும் அதன் விசையும் அல்லாவின் தேற்றங்கள்

12. விண்வெளி குறித்த அல்லாவின் பண்வெளிகள்.

11. குரானின் மலையியல் மயக்கங்கள்

10. கடல்கள் பற்றிய அல்லாவின் புனைகதைகள்

9. பூமி உருண்டை என யார் சொன்னது, அல்லாவா? மனிதனா?

8. பிரபஞ்சமும் அதை கட்டுப்பட அழைத்த குரானும்

7. குரான் கூறுவது அறிவியலாகுமா?

6. ஹதீஸ்களும் அதன் பிரச்சனைகளும்.

5. குரானின் பாதுகாப்பில் விழுந்த கேள்விக்குறிகள்.

4. மெய்யாகவே குரான் பாதுகாக்கப்பட்டது தானா?

3. குரானின் சவாலுக்கு பதில்

2. அல்லாவின் ஆற்றலிலுள்ள இடர்பாடுகள்

1. இஸ்லாம். பிறப்பும் இருப்பும்: ஓர் எளிய அறிமுகம்

இஸ்லாம்: கற்பனைக்கோட்டையின் விரிசல்கள் வழியே….

மின்னூலாக(PDF) தரவிறக்க‌

%d bloggers like this: