ரீல் ஹீரோக்களும், ரியல் ஹீரோக்களும்!

reel real

 

ஜெயலலிதா செத்ததற்குப் பிறகு, கருணாநிதி செயல்பட முடியாமல் போனதற்குப் பிறகு, தமிழகமே தனக்கு ஒரு தலைவர் இல்லாமல் தவிப்பது போலவும், இக்கட்டான இந்த நேரத்தில் ரஜினியும், கமலும் விஜயும், விஷாலும் நம்மை காப்பாற்றி வாழவைக்க வரிசை கட்டி நிற்பதாகவும் ஊடகங்கள் பரபரப்பு ஏற்படுத்துகின்றன. அரசியலில் நமக்கான அடுத்த தலைமை யார்? என்பதை இவர்கள் வரையும் ஒரு வட்டத்துக்குள் நின்று நம்மை சிந்திக்க வைக்க பழக்குகின்றன ஊடகங்கள்.

“இனி எவன் வந்தாலும் நமக்கு ஒன்னும் ஆவப் போறதில்லை, இந்த கவர்மெண்டு சிஸ்டமே டோட்டல் வேஸ்ட்” என்று உழைத்து வாழும் ஒவ்வொரு மக்களும் தெளிவாக பேசிவரும் நிலையில், இதோ கமல் காட்டமாக கருத்து சொல்கிறார், ரஜினி போருக்கு தயாராகச் சொல்கிறார், விஷால் விளாசுகிறார், விஜய் மெர்சலாகிறார் என்று இன்னும் ஒரு ரவுண்டு போடலாம் வாங்க என்று போதையேற்றுகின்றன முதலாளிகளின் ஊடகங்கள். உழைத்து வாழும் தொழிலாளி வர்க்கமான நமக்கு தலைமை தாங்கும் தகுதி இவர்களுக்கு இருக்கிறதா? என்று கேள்வி கேட்கும் உரிமை நமக்கு உண்டு. இவர்களின் வர்க்கம் என்ன? வாழ்க்கை நடத்தை என்ன? அரசியல் சித்தாந்தம் என்ன? என்று ஆராய்ந்து எதிர் கொள்வது நமது கடமை.

மக்களுக்கு போராடும் குணம் வந்து விட்டது என்றால் அதற்கான அடிப்படை அரசியல் இவர்களிடம் வெளிப்படுகிறதா என்பதை நாம் உரசிப் பார்க்க வேண்டும். நேற்றுவரை ஊரைக் கெடுத்த மைனர் நம்ம வீட்டுக்கு வந்து, உன் பெண்ணை வாழ வைக்கிறேன் என்றால் நாம் நம்புவோமா? இல்லை, அவனை நெம்புவோமா? இப்படித்தான் இவர்களின் திடீர் மக்கள் பாசத்தையும் தொழலாளர்கள், மாணவர்களாகிய நாம் பகுத்தறிந்து பார்க்க வேண்டும். சிறு வணிகர்களாகவும்,  வாரக்கூலி, மாதக்கூலிகளாகவும் காலம் தள்ளும் நாமும், நம் குடும்பமும், மோடி அரசின் திடீர் பண மதிப்பிழப்பு நடவடிக்கையினால் தவித்து நின்ற போது, நம் பிள்ளைகள் பாலுக்கு தவித்து நின்ற போது, இது கருப்புப் பணத்தை ஒழிக்கும் நடவடிக்கை என்று ஆதரித்தவர்கள் இந்த சூப்பர் ஸ்டாரும், உலக நாயகனும். நம்மை சிக்க வைத்து சின்னபின்னமாக்கும் ஜி.எஸ்.டி வரி விதிப்பின் போதும் மோடியோடு ஜோடி சேர்ந்தவர் ரஜினி. இன்று ஆழ்வார் பேட்டையில் அரசு வணிக வளாகத்தில் மாநகராட்சி கட்டணத்தை உயர்த்தியதற்காக (25 ஆண்டுகளுக்குப் பிறகு மாநகராட்சி கட்டணத்தை உயர்த்தியது) பழைய வாடகையான அதே 4500 ரூபாய் தான் தருவேன், கூடுதலான வாடகையை என்னால் தரமுடியாது. காரணம், ஜி.எஸ்.டிக்குப் பிறகு வருமானம் இல்லை என்று வாய் கூசாமல் கோர்ட்டில் புழுகியது ரஜினி குடும்பம். ஜி.எஸ்.டி ஊருக்குன்னா ஜெய ஹோ! தனக்கு என்றால் ஐய்யயோ! என்பது தான் ரஜினியின் அரசியல் யோக்கியதை. கமலும் இதில் விலக்கா என்ன? எல்லா முன்னணி நடிகர்களும் கருப்புப் பணத்தில் கை நனைப்பவர்கள் தான்.

முக்கியமாக, தமிழகத்து இபிஎஸ், ஓபிஎஸ் ஊழல் கிரிமினல் ஆட்சியை வெறுக்கும் மக்களிடம் ஒரு மாற்று புரட்சிகர அரசியல் உருவாகி விடக் கூடாது என்றும்; பழைய பாணியிலான திராவிட வாடை அடிக்கும் திமுக வந்துவிடக் கூடாது என்றும், தமிழக பார்ப்பனக் கும்பலும், மத்திய ஆரியக் கும்பலும் தவியாய் தவிக்கிறது. இவர்களின் நப்பாசை தயவிலும், உள்நோக்கத்தோடும் தான் மேற்கண்ட நடிகர்களின் அரசியல் பேச்சுக்களை பிரபலப்படுத்துகின்றன ஊடகங்கள்.

ஜல்லிக்கட்டு, மெரீனா போராட்டத்தில் அரசையும் ஆளும் வர்க்கத்தையும் நிர்ப்பந்தித்து பணிய வைக்கும் அரசியல் போராட்டத்தை தமிழக மாணவர்களும், இளைஞர்களும், மக்களும் ஒரு முன் மாதிரியாக படைத்துக் காட்டினார்கள். போதிய அரசியல் சித்தாந்தத் தெளிவு இல்லாத போதும், அரசியல் தலைமை இல்லாத போதும், மக்கள் பங்கேற்பு போராட்டம் என்ற அரசியல் தலைமைப் பண்பை உருவாக்கினார்கள். முதலில், இதற்கு ஈடு கொடுக்க ரஜினி, கமல், விஜய், விசாலுக்கு தகுதி உண்டா?

reel real 0

அன்றைய ஜல்லிக்கட்டு போல இன்று குமரி மீனவர்கள், உள்ளூர் உழைக்கும் மக்கள் ஓக்ஹி புயலுக்கு காணாமல் போன மீனவர்கள், பாதிக்கப்பட்ட மீனவர்கள் வாழ்வாதாரம் மீட்கக் கோரி ரயில் நிலையம் முற்றுகை, கலெக்டர் சிறைப்பிடிப்பு, ஆளுனர் முற்றுகை, அரசு அதிகாரிகளை துரத்தியடிப்பு என ஆள்பவர்களைன் அதிகாரத்தை கேள்வி கேட்டு, மக்கள் தங்கள் அதிகாரத்தை கையில் எடுத்துப் போராடும் அரசியல் தகுதிக்கு முன்பு ரஜினி, கமல், விஜய், விஷால் எல்லோரும் ஜீரோக்கள். உழைக்கும் மக்களும், மாணவர்களும் தான் உண்மையான அரசியல் ஹீரோக்கள். இது பெருமைக்காக சொல்லப்படுவது அல்ல, இது தான் உண்மை.

மக்கள் அதிகாரத்தை உயர்த்திப் பிடிக்கும் அரசியல் தான் மக்களுக்கு தேவையான பாதை. மீண்டும் மீண்டும் அதிகார வர்க்கத்தை நம்பி ஆளும் வர்க்கத்திடமே சரணாகதி அடையும் அடிமை அரசியலை உழைக்கும் மக்களும் மாணவர்களும் இனியும் விரும்பவில்லை. இந்த அரசியல் தகுதிக்கு குறைவானவர்களை இனி மக்கள் ஏற்கப் போவதும் இல்லை.

விவசாயிகளைப் பாதிக்கும் கதிராமங்கலம் நெடுவாசல் பிரச்சனையாக இருக்கட்டும், வணிகர்களைப் பாதிக்கும் ஆன்லைன் வர்த்தகம்,  ஜி.எஸ்.டி பிரச்சனையாக இருக்கட்டும், தொழிலாளர்களைப் பாதிக்கும் காண்டார்க் முறை, அவுட்சோர்சிங் முறை பிரச்சனையாக இருக்கட்டும், மாணவர்களைப் பாதிக்கும் கல்வியை கற்கமுடியாதபடி கட்டண உயர்வு, படித்த பிறகு வேலையின்மை பிரச்சனையாக இருக்கட்டும் போராட்டக்களத்தில் புதிய அரசியலைப் படைப்பது போராடும் வர்க்கமான உழைக்கும் மக்கள் தான். மக்களுக்கான உண்மையான தலைவர்கள் வசனத்திலிருந்து பிறப்பதில்லை, உழைக்கும் வர்க்கத்திலிருந்து பிறக்கிறார்கள்.

குடிநீரைத் துண்டித்த போதும், கழிப்பறைகளைப் பூட்டிய போதும், போலிசைக் குவித்த போதும் சென்னை டி.எம்.எஸ் வளாகத்தில் சளைக்காமல் போராடி அரசை மிரள வைத்த, நிர்ப்பந்திக்க வைத்த செவிலியர் போராட்டத்தின் வர்க்க அரசியல் தான் நம்மை தலைமை தாங்கும் தகுதி உடையது.  அந்த வீரச் செவிலியர்கள் தான் புதிய அரசியலின் கதாநாயகர்கள். கதிராமங்கலம் தொடங்கி கன்னியாகுமரி வரை ஆளும்வர்க்கத்தின் அதிகாரத்தை கேள்விக்குள்ளாக்கும் உழைக்கும் மக்களின் போராட்ட அரசியல் தான், நாம் கடைப்பிடிக்க வேண்டிய மாற்று.

தனது படம் ஓடாது என்று தெரிந்ததும் பின்வாசல் வழியாகச் சென்று ஆள்பவர்களை ஆளும் வர்க்கத்தை நயந்து சென்று பார்க்கும் இந்த சினிமா நாயகர்கள், ஓடாத நம் மீனவர் படகுகளுக்காக, ஓடாத நம் தறிக்காக, ஓடாத நம் சிறுவியாபாரத்துக்காக, படித்தும் கிடைக்காத நம்முடைய வேலைக்காக உழைக்கும் வர்க்கத்தின் போராட்டக் களத்தில் குதிக்கத் தயாராக இருப்பார்களா?

இந்தியன் தாத்தா கெட்டப்பில் பஞ்ச் டயலாக் பேசிய கமல், இந்தியர்களின் வயிற்றிலடிக்கும் கார்ப்பரேட் திட்டங்களை, ஊழல்களை ஏவிவிடும் இந்திய தா(த்)தா மோடியை கேட்வி கேட்கவாவது தயாராக இருப்பாரா?

மெரீனாவில் ஜனநாயக வழியில் போராடிய மாணவர்களை, மீனவர்களை மண்டையைப் பிளந்தது போலீசு. கதிராமங்கலத்தில் தங்களின் நிலத்திற்காக ஊன்றி நின்று போராடிய மக்களின் கால்களை முறித்தது அரசு. நாடெங்கும் மாட்டுக்கறியின் பெயரால் தலித், இஸ்லாமிய மக்களை நரவேட்டையாடியது பா.ஜ.க கும்பல். இந்த அரசு – ஆர்.எஸ்.எஸ் பயங்கரவாதத்துக்கு எதிராக போர்க்கொடி தூக்காத கமல், அரசியலில் நுழையும் போதே மக்களைப் பார்த்து நான் வன்முறையை ஏற்கமாட்டேன் என்பது எதைக் காட்டுகிறது? ஆளும் வர்க்கத்தின் அடக்குமுறைக்கு எதிராக போர்க்குணத்துடன் போராடும் மக்களின் அரசியலை ஏற்க மாட்டேன் என்பதைத் தானே காட்டுகிறது.

“அவனை நிறுத்தச் சொல் நான் நிறுத்துகிறேன்” என்று சினிமாவில் வசனம் பேசி நம்மிடம் கைதட்டல் வாங்கிய கமல், அரசு எவ்வளவு அடித்தாலும் தாங்கிக் கொண்டு சும்மா இருங்கள் என்று அரசியல் பேசுவதைக் கண்டு முதலாளிகள் கைதட்டுகிறார்கள்.

தனக்கான அரசியல் இலக்கை இனியும் தொழிலாளி வர்க்கம் சுரண்டும் வர்க்கத்திடம் பறிகொடுக்கத் தேவையில்லை என்பது தான் நடப்பு போராட்டங்கள் நமக்கு காட்டும் உண்மை. உலக நாயகன் கலக நாயகனாகி நான் அரசியலுக்கு வந்தால் எட்டு மணி நேரம் தான் வேலை, பணி நிரந்தரம், தொழிற்சங்கங்கள் அங்கீகரிக்கப்பட்டு, முறையான ஊதியம் என்பதை கொள்கையாக்குவேன் என அறிவிக்கத் தயாரா?

ஒரு பேச்சுக்குக் கூட நம் வாழ்க்கை நிலைமைகளை முன்வைக்கத் தயாராக இல்லாத இவர்களா நம் அரசியல் தலைமைகள்? இவர்கள் இவ்வாறு பேசாததற்கோ, சிந்திக்க முடியாததற்கோ காரணம் இவர்கள் வேறு வர்க்கத்தைச்  சேர்ந்தவர்கள் என்பது தான். உழைக்கும் வர்க்கத்துக்கும், மாணவர்களுக்கும், இளைஞர்களுக்கும் வழிகாட்டவோ, மாற்று அரசியலை உருவாக்கவோ இந்த வர்க்கத்துக்கு தகுதி இல்லை என்பது மட்டுமல்ல, அதற்கு தேவையும் இல்லை என்பது தான் நாம் புரிந்து கொள்ள வேண்டிய உண்மை.

மேலும், மாற்று அரசியல் என்று பொத்தம் பொதுவாக பேசுவதும் பிராடு.  எதில் மாற்று? எதற்கு மாற்று? முதலாளித்துவ சுரண்டல் கார்ப்பரேட்டுகளுக்கு இவர்கள் மாற்றா? சாக்கடையை ஒழிக்கத் திட்டமிடாத இந்த கொசுவர்த்தி வியாபாரிகளா நம் குல தெய்வங்கள்?

ஜெயலலிதா இருந்தவரை இவர்களுக்கு துணிவு இருந்ததா என்று ஒரு குரலும் பழைய பெருச்சாளியை நியாயப்படுத்தப் பார்க்கிறது. ஜெயலலிதா இருந்த போதே துணிச்சலுடன் போராடியது தொழிலாளி வர்க்கம். நெசவாளிகள், போக்குவரத்து தொழிலாளர்கள், சாலைப் பணியாளர்கள் என பாசிச ஜெயாவை மோதி வீழ்த்தியது தொழிலாளி வர்க்கம். ஜெயாவின் ஆணவ அதிகார போதையோடு, டாஸ்மாக் போதையையும் சேர்த்து காலி செய்தவர்கள் உழைக்கும் மக்கள். மக்களை வாழ வைக்க வக்கில்லாத ஆளும் வர்க்கத்தை கேள்விக்குள்ளாக்கும், அதிகாரத்தைக் கையில் எடுக்கும் உழைக்கும் மக்களின் அரசியல் தலைமை தான் நாட்டின் நம்பிக்கை நட்சத்திரமாக மின்னுகிறது. உழைக்கும் மக்களின் இந்த அரசியலோடு தலைமை தாங்க ‘தலைவா வா’ என அழைத்துப் பாருங்கள், டுவிட்டர் புலிகள் ‘எஸ்’ஸாகும் காட்சியை நீங்கள் இலவசமாகப் பார்க்கலாம்.

துரை சண்முகம்

புதிய தொழிலாளி டிச 2017

Advertisements

மசூதியை கட்டியே தீருவோம்

babari masjith

டிசம்பர் 6 துக்கநாள் அல்ல; எழுச்சியின் குறியீடு

மசூதியை இடிக்க ஏன் அந்த நாளை தேர்ந்தெடுத்தார்கள்?

‘இந்துவாகப் பிறந்தேன். இந்துவாகச் சாகமாட்டேன்’ என்று உறுதி எடுத்து, அதை நிறைவேற்றிய அண்ணல் அம்பேத்கர் நினைவு நாளையும் அவரின் இந்து எதிர்ப்பையும் இருட்டடிப்புச் செய்து, தலித் மக்களிடம் இஸ்லாமிய எதிர்ப்பின் மூலமாக இந்து உணர்வை கட்டமைக்க.

‘ஒரே கல்லில் இரண்டு மாங்காய்’ முஸ்லிம் – தலித் எதிர்ப்பு என்று கணக்கு வைத்து கல்லடித்தார்கள் மசூதி மீது.
முதலாளித்துவம் தன்னையறியாமலேயே தனக்கு எதிரான தொழிலாளர் வர்க்கத்தை உருவாக்கியதுபோல், இந்துத்துவ வெறியர்கள் அவர்களை அறியாமலேயே இஸ்லாமிய தலித் மக்களின் ஒற்றுமையின் அடையாளமாக டிசம்பர் 6 யை மாற்றியிருக்கிறார்கள்.

அதன் தொடர்ச்சியாக ‘மாட்டிறைச்சி தடை’ என்பதும் ஒரு குறியீடு. அது முஸ்லிம் எதிர்ப்பு மட்டுமல்ல, தலித் எதிர்ப்பும்தான்.
மாட்டிறைச்சி வைத்திருந்ததிற்காக முஸ்லிம்கள் மட்டும் படுகொலை செய்யப்படவில்லை, தலித் மக்களும்தான்.

ஆக, டிசம்பர் 6 துக்க நாள் அல்ல, அது தலித் முஸ்லிம் ஒற்றுமையின் அடையாளம். மத, ஜாதி ரீதியாக ஒடுக்கப்பட்ட ஒட்டுமொத்த மக்களின் எழுச்சிநாள்.

விரைவில் இந்து மதவெறி சக்திகள் ஆட்சியிலிருந்து மட்மல்ல, சமூகத்திலிருந்தே புறக்கணிக்கப்படுவார்கள்.
அப்போதும் முஸ்லிம் அல்லாத ஒடுக்கப்பட்ட ‘இந்துக்கள்’ அயோத்திக்கு செங்கல் எடுத்துச் செல்வார்கள். அது ராமர் கோயில் கட்ட அல்ல; இடிக்கப்பட்ட பாபர் மசூதியை கட்ட.

அதே அண்ணலின் நினைவு நாளான டிசம்பர் 6 ல் பாபர் மசூதியை கட்டியே தீருவோம்.

நன்றி: வே. மதிமாறன்

%d bloggers like this: