ராக்கெட் விட்டவர்களின் ராக்கெட்

கடந்த 25 ம் தேதி இஸ்ரோ கடவுள்கள் ஏவிய ஜிஎஸ்எல்வி ராக்கெட் சிவகாசி ராக்கெட்டாகிப் போனதில் கடவுளர்களுக்கு மட்டுமல்லாது பக்தர்களுக்கும் ஏக வருத்தம். ஏனென்றால் முன்பு உள்ளூர் தயாரிப்பு என்று ஏழுமலையானையெல்லாம் ஏவலுக்கு கூப்பிட்ட பிறகும் அவன் அழுத்தமாக போட்ட கோவிந்தாவின் இழுப்பு ஏப்ரலிலிருந்து டிசம்பர் வரை நீண்டுவிட்டதே. ஒரு செயற்கைக்கோள் ஏவல் வெற்றிகரமாக சுற்றுவட்டப்பாதையில் நிலை நிறுத்தப்படும்போது அது ஒரு செய்தியாக முடிந்துவிடுகிறது. ஆனால் அதுவே தோல்வியில் முடியும்போது அதனுடன் தேசபக்தியும் கலந்துவிடுவதால் அதன் பரப்பெல்லை செய்தி என்பதையும் தாண்டி விரிந்து விடுகிறது. இந்த முறையும் அது நடந்திருக்கிறது. சிலநூறு கோடிகள் வீணாகி விட்டதே என்று ஒரு பக்கமும், நம்முடைய அறிவியலாளர்கள் விரைவிலேயே அடுத்ததற்கு ஆயத்தமாகிவிடுவார்கள் என்று மறுபக்கமும், ரஷ்யாவிலிருந்து வாங்கிய ஏழு பொறிகளில் ஒன்று மட்டுமே மீதமிருக்கும் நிலையில் சந்திராயன் 2 தடைபட்டு விடுமோ என்று இன்னொரு பக்கமுமாக விசாரிப்புகள், விவாதிப்புகள்.

 

இதற்கு முன்னரும் பலமுறை இதுபோன்ற திட்டங்கள் தோல்வியில் முடிந்திருக்கின்றன. ஆனால் இப்போது நடந்திருக்கும் இந்தத்தோல்வியை அறிவியலாளர்களே சற்று ஆச்சரியத்துடன் தான் பார்க்கிறார்கள். ஏனென்றால் இதற்கு முன்னர் நிகழ்ந்த தோல்விகள் இரண்டாம் மூன்றாம் நிலைகளில் ஏற்பட்ட சிக்கல்களினால் நிகழ்ந்தவை. தற்போது முதல் நிலையிலேயே சிக்கல்கள் ஏற்பட்டிருக்கின்றன என்பது தான் அறிவியலாளர்களைக் கவலையுறச் செய்திருக்கிறது. ஏவப்பட்ட சில நொடிகளிலேயே தரைக் கட்டுப்பாட்டு நிலையத்திற்கும் ராக்கெட்டுக்குமான தொடர்பு அறுந்துவிட்டது. பிறகு வேறு வழியில்லை என்பதால் சிதறடிக்கப்பட்டு கடலில் வீழ்த்தப்பட்டிருக்கிறது.

 

ஏப்ரலில் நடந்த தோல்விக்குப் பிறகு, ஒரு குழு அமைக்கப்பட்டு தோல்விக்கான காரணங்களை அலசி அந்தக்குறை தற்போதைய ஏவுத‌லில் சரி செய்யப்பட்டதாகவும், ஆனால் தற்போது புதிதாக வேறொரு குறைபாடு ஏற்பட்டிருப்பதாகவும் சொல்கிறார்கள். இதைக்கொண்டு நாட்டின் மீது அக்கரைகொண்ட(!) சில நாளிதழ்கள் தங்கள் கவலைகளை வெளியிட்டிருக்கின்றன. அதாவது தற்போதைய கல்வி முறை எப்படி சிறந்த ஊதியத்தைப் பெறுவது எனும் அடிப்படையில் இருக்கிறது. பொறியாளர்களாக வருபவர்கள் எங்கு அதிக ஊதியம் கிடைக்கிறதோ அதற்குத் தேவையான சிறப்பம்சங்களைக் கற்பது எனும் நோக்கில் செயல்படுகிறார்கள். நாட்டுக்காக அர்ப்பணிப்புடன் பணிசெய்ய முன்வருபவர்கள் மிகவும் அரிதாகவே இருக்கிறார்கள் என்பதாகப் போகின்றன அந்தக் கவலைகள். ஆனால் இந்தப் போக்கிற்கு எது அடிநாதமாய் இருக்கிறது என்பது குறித்து அந்தக் கவலைகள் கவலைப்படவில்லை.

 

தற்போதைய சூழலில் கல்வி என்பது அறிதல் எனும் தளத்திலிருந்து நீக்கப்பட்டுவிட்டது. பெருநிறுவனங்களுக்கு என்ன விதமான தேவை இருக்கிறதோ அந்த விதத்தில் தெளிந்து கொள்வதே கல்வியாக இருக்கிறது. உடலுழைப்பிலிருந்து, அறிவுசார் உழைப்புவரை நிறுவனங்களுக்கு என்ன தேவை என்பதே முதன்மைப்படுத்தப்படுகிறது. நுகர்வுக் கலாச்சாரத்தில் மக்களை சுரண்டிக்கொழுக்க முதலாளிகளுக்கு என்ன தொழில்நுட்பம் தேவையோ அந்த தொழில்நுட்பத்தை கற்று வைத்திருப்பதற்குப் பெயர்தான் கல்வி. எடுத்துக்காட்டாக, செல்லிடப்பேசியில் நாள்தோறும் புதுப்புது தொழில்நுட்பங்கள் அறிமுகப்படுத்தப்படுகின்றன, இப்படி அறிமுகப்படுத்தப்படும் தொழில்நுட்பங்கள் முதலாலிகள் லாபமீட்டுவதற்குப் பயன்படும் வரையில்தான் அது கல்வியாக நடப்பிலிருக்கும். குறிப்பிட்ட அந்த தொழில்நுட்பத்தால் இனி லாபமீட்ட முடியாது எனும் நிலையில் அந்தக் கல்வி வேறொரு தொழில்நுட்பக் கல்வியால் இடம்பெயர்க்கப்பட்டிருக்கும். மட்டுமல்லாது, தற்போதைய அறிவியல் கண்டுபிடிப்புகளுக்கே பெருநிறுவனங்களும் முதலாளிகளும்தான் நிதியளிக்கிறார்கள். முதலாளிகள் நிதியளித்து நடத்தப்படும் ஆய்வுகள் முதலாளிகளின் லாபத்தை நோக்கமாகக் கொண்டிருக்குமா? மக்களின் நலவாழ்வை நோக்கமாகக் கொண்டிருக்குமா? ஆக கல்வி என்பதே முதலாளிகளுக்கு சேவை செய்வதற்கு என்றானபிறகு, அந்தக் கல்வியைக் கற்றவர்கள் முதலாளிகளுக்கு சாதக‌மாக தங்கள் கல்வியை பயன்படுத்தியே தீர‌வேண்டும் என்றான பிறகு, அர்ப்பணிப்புடன் நாட்டுக்கு சேவை செய்ய முன்வரவேண்டும் என அறிவுரை கூறுவதில் என்ன பொருள் இருந்துவிட முடியும்?

 

பொருளற்ற இதுபோன்ற கவலைகளையும் அறிவுரைகளையும் விட வேறொரு கவலை நமக்கு முதன்மையானதாக இருக்கிறது.

 

இந்தத்திட்டம் வெற்றியடைந்திருந்தால் என்ன சாதிக்கப்பட்டிருக்கும்? அதிக எடையும் தொழில்நுட்பமும் கொண்ட ஜிசாட் செயற்கைக்கோள் தகவல் தொடர்பில் மிகச்சிறந்த இடத்தை இந்தியாவுக்கு பெற்றுத்தந்திருக்கும், 2500 கிலோ எடைகொண்ட செயற்கைக்கோள் செலுத்தும் திறன் கொண்ட நாடுகளின் பட்டியிலில் இந்தியாவுக்கும் இடம் கிடைத்திருக்கும். இதனால் செயற்கைக் கோள்களை அனுப்ப பிரான்ஸ் போன்ற நாடுகளைச் சார்ந்திருக்க வேண்டிய தேவையிருக்காது என்பதுடன் வணிக நோக்கிலும் இந்தியாவுக்கு சாதகங்களை ஏற்படுத்தித்தந்திருக்கும். சந்திராயன் ஒன்று, இரண்டு போன்ற திட்டங்களினால் கிடைக்கும், கிடைக்கப்போகும் பலன்களென்ன? நிலவில் நீர்வளம் இருக்கிறதா என ஆராயலாம். நிலவின் தரையில் என்னென்ன கனிவளங்கள் மறைந்துகிடக்கின்றன? அவைகளை எப்படி பூமிக்கு கொண்டுவரலாம்? இவைகள் தானே. இவைகளினால் யாருக்கு பயன்? இந்தியாவுக்கு சாதகம், இந்தியாவின் பெருமை என்பதன் பொருள் என்ன? எந்த இந்தியா? இந்த ஆய்வுகளினால் பலனடைபவர்களின் இந்தியாவா? யாருக்கு எதிராக பயன்படப்போகிறதோ அவர்களின் இந்தியாவா? டாடா, அம்பானிகளின் இந்தியாவுக்கா? சோற்றைக்கூட திருடி உண்ணும் நிலையில் இருப்பவர்களின் இந்தியாவுக்கா?

உலகின் நீர்வளம் யாருக்கு சாதகமாய் பயன்பட்டுக்கொண்டிருக்கிறது? யாருக்கு பாதகமாய் பயன்பட்டுக்கொண்டிருக்கிறது? பூமியின் மொத்த நீர்வளத்தில் 99 விழுக்காடு கடல் நீர். மிதமிருக்கும் ஒரு விழுக்காட்டிலும் பெரும்பகுதி துருவப்பகுதிகளில் பனிப்பாறைகளாய் உறைந்துகிடக்கிறது. இவைபோக பயன்பட்டுக்கொண்டிருக்கும் நீர்வளத்தில் கால் பங்கிற்கு மேல் பெப்சி, கோக்களின் கட்டுப்பாட்டில் இருக்கிறது. எஞ்சியிருப்பவைகளைக்கூட அந்நிறுவனங்கள் தங்கள் கட்டுப்பாட்டிற்குள் வேகவேகமாய் கொண்டுவந்து கொண்டிருக்கின்றன. உலகின் அனைத்து நாடுகளையும் இதுபோன்ற பன்னாட்டு நிறுவனங்கள் உலகமயத்தின் மூலம் மக்களுக்கு நீர் வழங்குவதில் கட்டுப்பாடுகளை ஏற்படுத்தி லாபம் சம்பாதித்து வருகின்றன. நீர் நிலைகள், ஏரிகுளங்களை பராமரிக்கக்கூடாது என்று நிர்ப்பந்தம் செய்கின்றன. ஆக பூமியில் இருக்கும் நீர்வளமே முதலாளிகளுக்கு சாதகமாகவும், மக்களை தண்ணீருக்கு விலை கொடுக்க வைத்திருப்பதன் மூலம் அவர்களுக்கு பாதகமாகவும் பயன்படுத்தப்பட்டுக் கொண்டிருக்கிறது. இதுபோன்றே கனிம வளங்களும். இந்தியாவின் மத்திய கிழக்குப் பகுதிகளில் கிடைக்கும் கனிமப்பொருட்களை அற்பமான விலையில் முதலாளிகள் கொள்ளையிட்டுச் செல்ல வசதியாக இந்தப்பகுதியில் வாழும் பழங்குடி மக்களை அரசே வேட்டையாடி அப்புறப்படுத்துகிறது. உலகின் எந்தப்பகுதியில் புதிதாக கனிமவளங்கள் கண்டுபிடிக்கப்பட்டாலும் அது முதலாளிகளுக்கு சாதகமாகவும் மக்களுக்கு பாதகமாகவும் முடிகிறது. பூமியில் கிடைக்கும் வளங்களையே முதலாளிகள் தங்களின் லாபத்திற்காக மக்களை வதைக்கப் பயன்படுத்திக்கொண்டிருக்கும் போது, நிலவிலும் இன்னும் வேறுபல கோள்களிலும் கண்டுபிடிக்கப்படும் வளங்கள் மக்களின் நன்மைக்காக நலனுக்காக பயன்பட்டுவிடுமா?

 

நாடு என்பதை தங்களுக்கானது எனும் பொருளில் பயன்படுத்துபவர்கள், அதை வெளிப்படையாகச் சொல்வதில்லை, செய்வதில்லை. ஏனென்றால் அந்த நாட்டிலிருந்து நாட்டு மக்களிடமிருந்து தங்களுக்குத் தேவையானதை அவர்கள் பறித்தெடுக்க வேண்டியதிருக்கிறது. அதனால் அதை அவர்கள் பொதுவாகவே முன்னிருத்துகிறார்கள். இந்தியாவின் பெருமை, இந்தியாவின் வளர்ச்சி, இந்தியாவின் சுத‌ந்திரம் என்பதெல்லாம் இந்தப்பொருளில் வருபவைகள் தாம். ஆனால் இதை பிரித்தெடுத்துக்காட்டும் போது அதை எதிர்கொள்வதற்காக வேறொரு கேள்வியை முன்வைப்பார்கள். அறிவியலை எதிர்க்கிறார்கள், அறிவியல் முன்னேற்றத்திற்கு தடை போடுகிறார்கள், அறிவியலை விலக்கிவிட்டு கற்காலத்தில் போய் வாழமுடியுமா? என்பதுதான் அந்தக் கேள்வி.

 

அறிவியல் என்பது இயற்கையை புரிந்துகொண்டு, மனிதகுல வாழ்வுக்கு எதிராக இருக்கும் இயற்கையின் தடைகளை மாற்றுவதற்காகப் போராடுவது. இதை மறுக்கமுடியாது. ஆனால் அறிவியல் இந்த திசையில் பயணப்படுகிறதா என்பதே முக்கியமான கேள்வி. 250 ஒளியாண்டுகள் தூரத்தில் சூரியனைவிட ஆயிரம் மடங்கு பெரிய ஐ.ஆர்.எஸ்5 எனும் கோள் இருக்கிறது என விண்ணை உளவி கண்டுபிடிக்க முடிந்த அறிவியலை பாதாளச் சாக்கடையில் எந்த இடத்தில் அடைப்பு ஏற்பட்டிருக்கிறது என்பதை துளவி கண்டுபிடிக்கவைக்காமல் மனிதனை மூழ்கி கண்டுபிடித்து அடைப்பெடுக்க நிர்ப்பந்திக்கிறதே, இதை அறிவியலின் பிழையாகக் கொள்வதா? அதை கையில் வைத்திருக்கும் முதலாளியத்தின் பிழையாகக் கொள்வதா? நவீன செயற்கைக்கோள்கள் துணையுடன் எந்த இடத்தில் என்ன வகை மீன்கள் தற்போது அதிகம் கிடைக்கும் என கண்டறிந்து சொல்லி ஆழ்கடல் மீன்பிடி கப்பல்களை அனுப்பி கடல்வளத்தை கொள்ளையடிக்க பயன்படுத்தும் அறிவியலை பகலென்றும் இரவென்றும் பாராமல் வலையிழுத்தே வாழ்வைக்கடக்கும் மீனவர்களை எல்லை தாண்டினான் என்று ஆண்டுக்கணக்கில் சிறைவைக்க நிர்ப்பந்திக்கிறதே இது அறிவியலின் பிழையா? முதலாளியத்தின் பிழையா? எண்பதுகளைத் தாண்டிய கொழுத்தவர்களின் பழுத்த இதயத்தை ஈரிதழ் வால்வு என்றும் ஃபேஸ் மேக்கர் என்றும் துள்ளவைக்கும் அறிவியல் ஓட்டை விழுந்த இதயத்துடன் பணமில்லை என்பதால் பத்திலேயே பாடை கட்ட நிர்ப்பந்திக்கிறதே இது அறிவியலின் பிழையா? முதலாளியத்தின் பிழையா? அறிவியலை யாரும் மறுக்கமுடியாது. ஆனால் அது யாருடைய கைகளில் இருக்கிறதோ அவர்களை மறுக்கமுடியும். ஏனென்றால் அவர்கள் உலகின் பெரும்பான்மை மக்களுக்கு எதிராக அறிவியலை ஓர் ஆயுதமாக பயன்படுத்துகிறார்கள். எனவே அவர்களை எதிர்க்க வேண்டும்.

 

இவைகளை உணராமல் சந்திராயனை அனுப்பிய‌தற்காக பெருமைப்படுவதும், சிவகாசி ராக்கெட் வெடித்துப்போனதற்காக சோகப்படுவதும் நம்மை நாமே ஏமாற்றிக் கொள்வதாகும். அறிவியலை அனைவருக்குமானதாய் மாற்றியமைக்க போராடத்துணிவதே நாம் முன்னிற்க வேண்டிய‌ இன்றைய அவசியம்.

 

நிலவை உடைத்து ஒட்டிய அல்லா

இஸ்லாம்: கற்பனைக்கோட்டையின் விரிசல்கள் வழியே பகுதி ௨௫

இந்த வரைகலை படம் தான் 54:1 வசனத்திற்கு ஆதாரமாம்.

நிலா பூமியின் ஒரே துணைக்கோள். சராசரியாக‌ 3,84,403 கிமீ தூரத்தில் நீள்வட்டப்பாதையில் தன்னைத்தானே சுற்றிக்கொண்டு பூமியையும் சுற்றிவருகிறது. புவியின் ஈர்ப்பு விசையில் ஆறில் ஒரு பங்கே கொண்டிருந்தாலும், நிலவின் தாக்கம் பூமியில் குறிப்பிடத்தகுந்த அளவு செயல்படுகிறது. வானவியல் ஆய்வுகளில் மனிதர்களின் முன்னேற்றம் பிரபஞ்சத்துடன் ஒப்பிடுகையில் குறைவு என்றாலும், மனித வரலாற்றுடன் ஒப்பிடுகையில் மீப்பெரும் சாதனைகள் வானவியலில் நிகழ்த்தப்பட்டிருக்கின்றன. விண்கற்களின் மோதல்கள் தொடங்கி நெபுலாக்கள், புழுத்துளைகள் ஈறாக வானவியல் மாற்றங்களை நுணுக்கமாக கவனித்துக்கொண்டிருக்கிறான். ஒரு கோளோ, விண்மீனோ, விண்கற்களோ உடைந்துபோய் மீண்டும் ஒட்டிக்கொன்டு பழைய நிலையிலேயே செயல்படமுடியும் என்பதற்கான எந்தவித வாய்ப்பும் வானவியலில் இல்லை. ஆனால் குரானில் அப்படியான ஒரு நிகழ்ச்சி குறிப்பிடப்பட்டிருக்கிறது.

“நேரம் நெருங்கி விட்டது சந்திரனும் பிளந்துவிட்டது” “எனினும் அவர்கள் ஓர் அத்தாட்சியைப் பார்த்தால் புறக்கணித்துவிடுகிறார்கள். இது வழமையாக நடைபெறும் சூனியம்தான் என்றும் கூறுகிறார்கள்” குரான் 54:1,2. இந்த குரான் வசனத்தின் விளக்கமாக சில ஹதீஸ்களும் இருக்கின்றன. “நாங்கள் நபி அவர்களுடன் மினாவில் இருந்தபோது சந்திரன் பிளவுபட்டது உடனே நபி அவர்கள் நீங்கள் சாட்சியாக இருங்கள் என்று கூறினார்கள். இரண்டு துண்டுகளில் ஒன்று (ஹீரா) மலையின் திசையில் சென்றது” புஹாரி 3869.

அதாவது, அன்றைய அரபு மக்கள் முகம்மதுவிடம், நீர் இறைவனின் தூதர்தாம் என்பதற்கும், இறைவன் தான் உம்மிடம் வேதவசனங்களைத் தருகிறான் என்பதற்கும் என்ன அத்தாட்சி? என்று கேட்க அதற்கு முகம்மது, ஆம் நான் இறைவனின் தூதன் தாம் என்று நிலவைப்பிளந்து அதை அத்தாட்சியாக காண்பிக்கிறார். ஆனால் மனிதனால் செய்யமுடியாத மிகப்பெரிய அதிசய நிகழ்வான இதைக் கண்டு அன்றைய அரபு மக்களில் யாரும் இஸ்லாத்திற்கு மாறவில்லை என்பது ஆச்சரியம் தான். பிளந்த அந்த நிலவு என்ன ஆனது? எவ்வளவு நேரம் இரண்டு துண்டுகளாக இருந்தது? எப்போது மீண்டும் ஒன்றாக இணைந்தது என்பதுகுறித்து குரானிலோ, ஹதீஸ்களிலோ எந்த விளக்கமும் இல்லை. அதே நேரம் பூமிக்கு இரண்டு நிலவுகள் இருந்து ஒன்று அழிந்துபோய் இன்னொன்று மட்டும் மிச்சமிருப்பதாக யாரும் கூறிவிட முடியாது என்பதால், உடைந்த அந்த நிலவே ஒட்டிக்கொண்டு இப்போதும் தொடர்ந்து பூமியை சுற்றிக்கொண்டிருக்கிறது என்று நம்புவோமாக‌.

1400 ஆண்டுகளுக்கு முன்னுள்ள அந்த உலகில் குரான், ஹதீஸுக்கு வெளியே, இப்படி ஒரு நிகழ்வு நடந்ததற்கான எந்த ஒரு பதிவும் இல்லை. கிபி ஐந்து ஆறாம் நூற்றாண்டுகளில் நிகழ்ந்த எத்தனையோ நிகழ்வுகள் வரலாற்றில் இடம்பெற்றிருக்க, ஆக மிகப்பெரும் அதிசய நிகழ்வான இந்த நிலவு இரண்டான செய்தி உலகின் வேறெந்தப் பகுதியிலும் காணப்பட்டதாக தகவல் இல்லை. ஏன் அன்றைய அரேபியாவின் வேறு ஊர்களில் கூட இதை யாரும் கண்டதாக சாட்சியில்லை. இப்படியிருக்க நிலவு பிளந்ததை எந்த அடிப்படையில் ஏற்பது? இப்போது தந்திர விற்பன்னர்கள் தொடர்வண்டியை மறைப்பது, தாஜ்மஹாலை மறைப்பது என்று வித்தை செய்து காட்டுகிறார்களே அதுபோல முகம்மதுவும் தன்னிடம் கேள்விகேட்டு நச்சரித்துக் கொண்டிருந்தவர்களுக்கு மட்டும் வித்தை காட்டி விட்டாரா? அப்படியும் எடுத்துக்கொள்ள முடியாது. ஏனென்றால் அந்த குரான் வசனம் நேரடியாக மிகத் தெளிவாகவே இருக்கிறது “சந்திரனும் பிளந்துவிட்டது” என்று. தவிரவும் நிலவு உடைந்தது மறுமை நாளுக்கான அத்தாட்சி என்றும் சில ஹதீஸ்கள் கூறுகின்றன. மறுமை நாள் என்பது உலகில் மக்கள் வாழ்ந்தது போதும் என இறைவன் முடிவு செய்து உலகை அழிக்கும் நாள் என்பது ஐதீகம். அந்த மறுமை நாளுக்கான அத்தாட்சிகள் என்று சில நிகழ்வுகள் சொல்லப்பட்டிருக்கின்றன. அதில் இந்த நிலவு உடைந்ததும் ஒன்று. அந்த அத்தாட்சிகள் நிகழ நிகழ மறுமை நாள் நெருங்கி வந்துகொண்டிருக்கிறது என்பது பொருள். இதைத்தான் அந்த வசனம் குறிப்பிடுகிறது, “நேரம் நெருங்கிவிட்டது சந்திரனும் பிளந்து விட்டது” ஆக நிலவு உடைந்தது கட்டுக்கதையோ, கண்கட்டு வித்தையோ அல்ல உண்மையான நிகழ்வு இஸ்லாமியர்களைப் பொருத்தவரையில்.

நிலவு எப்படித் தோன்றியது என்பது குறித்து பல யூகங்கள் இருந்தாலும், 4 பில்லியன் ஆண்டுகளுக்கு முன்னர் செவ்வாய் அளவுள்ள ஒரு கோள் பூமியை தாக்கியதால் சிதைந்து பிரிந்துபோனது தான் நிலவாக பூமியை சுற்றுகிறது எனும் சேய்க்கொள்கைதான் ஓரள‌வுக்கு ஏற்கப்பட்டிருக்கிறது. இப்படி பூமியை சிதைத்து நிலவைப் பிரித்த அந்த மோதல்தான், புவியில் உயிரினங்கள் ஏற்படுவதற்கான சாதகமான சூழலை தொடங்கிவைத்தது என்றும் கணிக்கப்பட்டிருக்கிறது. இன்றும் ஆண்டுக்கு தோராயமாக 3.8 செமீ தூரம் பூமியை விட்டு நிலவு விலகிக் கொண்டிருக்கிறது. அன்றிலிருந்து புவியை உயிரினங்கல் வாழ்வதற்க்குத் தோதாக நகர்த்திக்கொண்டு வருவதில் நிலவு குறிப்பிடத்தகுந்த பங்காற்றி வருகிறது. நிலவின் தாக்கங்கள் என்று முதன்மையானதாக இரண்டைக் குறிப்பிடலாம். ஒன்று, பூமியின் பருவ மாறுதலுக்கு காரணமான பூமி தன் அச்சில் 23 பாகையளவு சாய்ந்திருப்பதை நிலைப்படுத்துவது. இரண்டு, கடல் நீரின் ஏற்ற வற்றங்களை கட்டுப்படுத்துவதன் மூலம் உயிர்சுழற்சிக்கு உதவுவது.

முக்கியமான இந்த இரண்டு தாக்கங்களை பூமியில் நிகழ்த்திக்கொண்டிருக்கும் நிலவு, திடீரென ஒரு நாள் உடைந்துபோனது என்றால் அதன் தாக்கம் பூமியின் பருவகால நிலைகளில் தகுந்த மாறுதல்களை ஏற்படுத்தியிருக்க வேண்டும். ஆனால் அது போன்ற எந்த மாறுதல்களும் பூமியில் ஏற்படவில்லை என்பதே உண்மை. இந்த நிகழ்வை முகம்மது நிகழ்த்திக்காட்டியது மக்கா எனும் ஊரில் அதாவது செங்கடலுக்கு அருகிலுள்ள ஒரு ஊர். கடலின் ஏற்றவற்றங்களைக் கட்டுக்குள் வைத்துருக்கும் நிலவு உடைந்தபோது செங்கடலில் ஏதாவது மாற்ற‌ங்கள் நிகழ்ந்திருக்க வேண்டுமல்லவா? அந்த மாற்றங்கள் அருகிலிருந்த மக்கவும் எட்டியிருக்க வேண்டுமல்லவா? அது ஹதீஸ்களில் பதியப்பட்டிருக்க வேண்டுமல்லவா? (நிலவு உடைந்ததற்கான ஆதாரமாகவேனும்) அப்படி ஏதேனும் ஹதீஸ் இருக்கிறதா? என்றால் நிலவு உடைந்தது என்பதை எப்படி ஏற்பது?

நிலவின் ஈர்ப்பு விசை மிகமிகக் குறைவு. தனக்கான வளிமண்டலங்களைக்கூட ஈர்த்து தக்கவைத்துக்கொள்ள முடியாத அளவுக்கு நிலவின் ஈர்ப்புவிசை பலவீனமானது. அதனால்தான் அங்கு காற்று இல்லை. காற்றைக்கூட ஈர்த்துவைத்துக்கொள்ள முடியாத நிலவு உடைந்து அதன் இரண்டு துண்டுகளும் மலையின் இருபக்கம் தெரியும் அளவுக்கு பிரிந்துவிட்ட பிறகு தமக்குள் எப்படி ஒன்றை ஒன்று ஈர்த்துக்கொண்டன?

குரானில் அனேக இடங்களில் மனிதர்கள் குரானை சிந்தித்துப்பார்க்க வேண்டாமா? என்று கூவுகிறது. இஸ்லாமியர்கள் இந்த வசனத்தை சந்திரனை உடைத்ததை எப்படி சிந்திக்கிறார்கள்? எப்படி புரிந்து கொள்கிறார்கள்? ஒரு கதை கூறப்படுவதுண்டு, வானில் கடவுள் தெரிகிறார் என்று ஒருவன் கூற மற்றவர்கள் தெரியவில்லையே எனக்கேட்க, வாழ்நாளில் பொய்யே கூறாதவர்களுக்கு மட்டும்தான் கடவுள் காட்சி தருவார் என்று அவன் கூறவும், மற்ற எல்லோரும் ஆமாம் தெரிகிறார் என்று கன்னத்தில் போட்டுக்கொண்டார்களாம். அப்படித்தான் அந்த ஹதீஸ்களைக் கூறியவர்கள் நிலவு உடைந்ததைக் கண்டார்களோ. எது எப்படியோ! முகம்மது தன் சொந்தக் கற்பனைகளை மெய்ப்படுத்திக்கொள்ளத்தான் அல்லாவையும் வேதத்தையும் பயன்படுத்திக்கொண்டார் என்பதைத்தான் இது மெய்ப்பிக்கிறது.

இத்தொடரின் முந்தைய பகுதிகள்

24. ஆதிமனிதன் மொழியறிந்தவனா? அல்லாவின் பதில் என்ன?

23. கால வெளியில் சிக்கிக்கொண்ட அல்லா

22. குரானின் காலப்பிழைகள்

21. குரான் குறிப்பிடும் நட்சத்திரங்கள்: மனிதப் பார்வையா? இறைப் பார்வையா?

20. மக்காவின் பாதுகாப்பு: குரானின் அறிவிப்புகள் உண்மையா?

19. சூரத்துல் கஹ்புக்கும் புத்தருக்கும் என்ன தொடர்பு?

18. நூஹின் கப்பல் நிறைய புராணப் புழுகுகள்

17. பிர் அவ்னின் உடல் எனும் கட்டுக்கதை

16. கருவறை குறித்த அல்லாவின் கதையாடல்கள்

15. விந்து குறித்த குரானின் விந்தைகள்

14. பாலும் தேனும் அல்லாவின் வேதத்தின் பாடுகள்

13. கோள்களும் அதன் விசையும் அல்லாவின் தேற்றங்கள்

12. விண்வெளி குறித்த அல்லாவின் பண்வெளிகள்.

11. குரானின் மலையியல் மயக்கங்கள்

10. கடல்கள் பற்றிய அல்லாவின் புனைகதைகள்

9. பூமி உருண்டை என யார் சொன்னது, அல்லாவா? மனிதனா?

8. பிரபஞ்சமும் அதை கட்டுப்பட அழைத்த குரானும்

7. குரான் கூறுவது அறிவியலாகுமா?

6. ஹதீஸ்களும் அதன் பிரச்சனைகளும்.

5. குரானின் பாதுகாப்பில் விழுந்த கேள்விக்குறிகள்.

4. மெய்யாகவே குரான் பாதுகாக்கப்பட்டது தானா?

3. குரானின் சவாலுக்கு பதில்

2. அல்லாவின் ஆற்றலிலுள்ள இடர்பாடுகள்

1. இஸ்லாம். பிறப்பும் இருப்பும்: ஓர் எளிய அறிமுகம்

இஸ்லாம்: கற்பனைக்கோட்டையின் விரிசல்கள் வழியே….

சந்திராயனும் பிதுக்கப்படும் இந்திய பெருமையும்

இந்தியராய் பிறந்த ஒவ்வொருவருக்கும் இந்த நாள் ஒரு பொன்னாள் என்றும் இந்தியாவின் வரலாற்று சிறப்புமிக்க ஒரு நிகழ்வு என்றும் இன்னும் பலவாறாக குறிப்பிடப்படும் சிறப்புமிக்க சந்திராயன்1 திட்டம் வெற்றிகரமாக நிறைவேற்றப்பட்டுள்ளது. கடந்த 22ம் தேதி காலை 6மணி22னிமிடத்திற்கு சந்திராயன்1 விண்கலம் துருவ செயற்கைக்கோள் செலுத்து வாகனம் பிஎஸ்எல்வி சி11 மூலம் விண்ணில் செலுத்தப்பட்டு நிலவை நோக்கி பயணமாகிவிட்டது. அது குறைந்தது 250கிமி தூரத்திலும் அதிக அளவாக 23ஆயிரம் கிமி தூரத்திலும் நீள்வட்டப்பாதையில் பூமியை இரண்டு நாட்கள் சுற்றிவிட்டு அடுத்த இரண்டு வாரத்தில் நிலவை நெருங்கி 100கிமி தூரத்தில் தொடர்ந்து இரண்டு ஆண்டுகளுக்கு நிலவை சுற்றி வேண்டிய தகவல்களை அனுப்பும் வகையில் அந்த விண்கலம் வடிவமைக்கப்பட்டுள்ளது. ஒரு அறிவியல் முன்னேற்றம் என்ற வகையில் இதுவரை பூமியின் வான் எல்லை வரையில் மட்டுமே செலுத்தும் திறன் பெற்றிருந்த நிலையில் அதைத்தாண்டியும் செலுத்த முடியும் என்ற வகையில் நிச்சயம் மகிழ்ச்சிதான்.மகிழலாம். ஆனால் இதன் பயன் என்ன? எழுபது விழுக்காட்டிற்கும் அதிகமானோர் நாளொன்றை 20ரூபாய் வருவாயில் கழித்துக்கொண்டிருக்கும் ஒரு நாட்டின் அறிவியல் ஆய்வுகள் எதை நோக்கியதாக இருக்கவேண்டும்? இது அந்தப்பெருமையைவிட முக்கியத்துவம் வாய்ந்த்தல்லவா?

சந்திராயன்1 விண்கலம் மூன்று நோக்கங்களுக்காக அனுப்பப்படுவதாக விண்கலத்தின் தலைமை இயக்குனர் விஞ்ஞானி அண்ணாதுரை தெரிவிக்கிறார். நிலவில் தண்ணீர் இருக்கிறதா என ஆய்வு செய்வது, தகவல் தொடர்புக்கு நிலவின் பங்களிப்பு எந்தவகையில் அமையும் என ஆய்வு செய்வது, ஹீலியம்3 பூமிக்கு கொண்டுவரமுடியுமா என ஆய்வுசெய்வது இவைகளுக்காக தொடர்ச்சியாக விண்கலங்களை அனுப்பவேண்டியது அவசியமாகிறது. தற்போது சந்திராயன்1க்கு 386 கோடி செலவாகியுள்ளது அடுத்து 2009 அல்லது 2010ல் சந்திராயன்2 விண்கலம் 425 கோடி செலவில் திட்டம் ஆயத்தமாகிவருகிறது. இதனைத்தொடர்ந்து 2015ல் நிலவுக்கு இருவரை அனுப்பிவைக்கும் திட்டமும் 12000 கோடி செலவில் திட்டமிடப்பட்டு ந‌டுவ‌ண‌ர‌சின் ஒப்புத‌லுக்காக‌ காத்திருக்கிற‌து. இதில் ச‌ந்திராய‌1க்கான‌ செல‌வுக‌ளை ப‌ற்றி குறிப்பிடும் போது நாட்டின் வ‌ருவாயில் 386 கோடி என்ப‌து 0.1 விழுக்காடுதான். அறிவிய‌ல் முன்னேற்ற‌த்திற்கு இது சொற்ப‌மான‌ செல‌வுதான் என்கிறார்க‌ள். ஓரிரு நாட்க‌ள் திட‌ர் ம‌ழை பெய்த‌வுட‌ன் சாலைக‌ளிலும் குடியுறுப்புக‌ளிலும் ம‌ழைநீர் வெள்ள‌மாக‌ தேங்கிவிடுகிற‌து, வ‌டிகால் வ‌ழிக‌ளை செப்ப‌னிட‌ அர‌சிட‌ம் போதுமான‌ நிதியில்லை என‌வே த‌னியாரிட‌ம் அளிக்கிறோம் என்று அடித்த‌ட்டு ம‌க்க‌ளுக்கான‌ திட்ட‌ங்க‌ளை த‌னியாரிட‌ம் தாரைவார்க்கும் அர‌சு இதுபோன்ற‌ மேல்த‌ட்டு ம‌க்க‌ளுக்கு தேவையான‌ திட்ட‌ங்க‌ளுக்கு த‌ய‌ங்காம‌ல் செல‌வு செய்வ‌து எப்ப‌டி? நில‌வுக்கு விண்க‌ல‌ங்க‌ளையும் ஆட்க‌ளையும் அனுப்புவ‌து த‌ற்கொலை செய்து கொள்ளும் விவ‌சாயியை த‌டுத்து நிருத்துமா? விண்வெளி ஆய்வினாலேயே த‌ன் பொருளாதார‌ வ‌ல்ல‌மையை இழ‌ந்த‌து சோவிய‌த் யூனிய‌ன். இன்றோ 90கோடி ரூபாயை வாங்கிக்கொண்டு கோடீஸ்வ‌ர‌ர்க‌ளை விண்வெளிக்கு சுற்றுலா அழைத்துச்செல்கிற‌து ர‌ஷ்யா. ப‌னிப்போரில் சோவிய‌த்தை வீழ்த்துவ‌த‌ற்கு ந‌ட்ச‌த்திர‌ போர்த்திட்ட‌த்திற்காக‌ விண்வெளி ஆய்வையும் நில‌வுப்ப‌ய‌ண‌த்தையும் மேற்கொண்ட‌ அமெரிக்கா ப‌னிப்போர் முடிவ‌டைந்த‌தும் அவைக‌ளை கைவிட்டுவிட்ட‌து. ஆனால் ச‌ந்திராய‌ன் விண்க‌ல‌த்தில் நாசாவின் இர‌ண்டு க‌ருவிக‌ளும், ஐரோப்பிய‌ விண்வெளி மைய‌த்தின் மூன்று க‌ருவிக‌ளும் கூட‌ அனுப்ப‌ப்ப‌ட்டிருக்கின்ற‌ன‌. இவைக‌ள் என்ன‌ க‌ருவிக‌ள்? எத‌ற்கான‌வை? அல்ல‌து வ‌ர்த்த‌க‌ நோக்க‌மா? என‌ இஸ்ரோ விள‌க்க‌வில்லையே ஏன்?

மின்சார‌ தேவைக‌ள் பெருகிவிட்ட‌து அத‌னால் அணு ஆற்ற‌ல் உட‌ன்பாடு நாட்டின் முன்னேற்ற‌த்துக்கு அவ‌சிய‌ம் தேவை என்ற‌வ‌ர்க‌ள், த‌ற்போது நில‌வில் ஹீலிய‌ம்3 கிடைக்குமா என‌ தேடிப்பார்க்க‌ விண்க‌ல‌ம் அனுப்புகிறோம் என்கிறார்க‌ள். அதாவ‌து அணுப்பிள‌வு தொழில்னுட்ப‌ம் ந‌ம‌க்கு போதாது அத‌னால் மின்சார‌ தேவைக‌ளுக்காக‌ அமெரிக்காவிட‌மிருந்து அந்த‌ தொழில்நுட்ப‌த்தை வாங்குகிறோம்‌ என்று கூறிய‌வ‌ர்க‌ள், அணுப்பிணைவு மூல‌ம் மின்சார‌ம் த‌யாரிக்க‌லாம் என்று அந்த‌ ஆய்வுக்கு ப‌ய‌ன்ப‌ட‌க்கூடிய‌ ஹீலிய‌ம்3யை தேடுகிறார்க‌ள் என்றால் அத‌ன் பொருள் அணுப்பிள‌வு தொழில்நுட்ப‌ம் ம‌ட்டும‌ல்ல‌ அணுப்பிணைவு தொழில் நுட்ப‌மும் ந‌ம்மால் இய‌ல‌க்கூடிய‌து என்ப‌து தானே. அணுப்பிள‌வைவிட‌ முன்னேறிய‌ தொழில்நுட்ப‌மான‌ அணுப்பிணைவு ந‌ம்மால் செய்துகாட்ட‌ முடியும் எனும்போது, ப‌ழைய‌ தொழில்நுட்ப‌மான‌, மேற்க‌த்திய‌ நாடுக‌ளால் கைவிட‌ப்ப‌ட்ட‌ தொழில்நுட்ப‌மான‌ அணுப்பிள‌வு மூல‌ம் மின்சார‌ம் பெறும் தொழில்நுட்ப‌ம் ந‌ம்மிட‌ம் இல்லை என்று அமெரிக்க‌ அடிமையாக‌த்துடித்தார்க‌ளே இந்த‌ முர‌ண்பாட்டுக்கு யார் பொறுப்பு?

உல‌கிலுள்ள‌ மொத்த‌ த‌ண்ணீர் வ‌ள‌த்தில் ஒரு விழுக்காடைத்தான் உல‌க‌ ம‌க்க‌ள் ப‌ய‌ன்ப‌டுத்திவ‌ருகின்ற‌ன‌ர். ஏனைய‌வை க‌ட‌ல் நீராக‌வும் துருவ‌ப்ப‌னியாக‌ உறைந்தும் கிட‌க்கிற‌து. அந்த‌ ஒரு விழுக்காடு நீரில் கால் ப‌ங்கிற்கும் அதிக‌மான‌ நீர் பெப்சி கோக் ஆகிய‌ இர‌ண்டு நிறுவ‌ன‌ங்க‌ளின் க‌ட்டுப்பாட்டில் இருக்கிற‌து. ம‌க்க‌ள் ப‌ய‌ன்ப‌டுத்தும் நீரைப்போல் 99 ம‌ட‌ங்கு பூமியிலேயே இருக்க ம‌க்க‌ளின் தாக‌த்தை தீர்க்கும் நோக்கில் ஆய்வுக‌ள் மேற்கொள்வ‌தை விட்டுவிட்டு, ம‌க்க‌ளின் தாக‌த்திற்கு த‌ண்ணீர் த‌ர‌ ம‌றுக்கும் கொள்கைக‌ளை விர‌ட்டிய‌டிப்ப‌தை விட்டுவிட்டு நில‌வுக்கு த‌ண்ணீர் தேடி விண்க‌ல‌ம் அனுப்புகிறோம், ஆய்வு செய்கிறோம் என்ப‌து மோச‌டிய‌ல்ல‌வா?

பூமியின் வான்வெளியில் செய‌ற்கைக்கோள் குப்பைக‌ள் நிறைந்து சுற்றுகின்ற‌ன‌. உல‌கின் அனேக‌ நாடுக‌ள் த‌ங்க‌ளுக்காக‌ செய்ற்கை கோள்க‌ளை செலுத்தியிருக்கின்ற‌ன‌(சொந்த‌மாக‌வும், வாட‌கைக்கும், பிற‌நாட்டு உத‌வியுட‌னும்)த‌ட்ப‌வெப்ப‌ம் க‌ல்வி என‌ ப‌ய‌னுள்ள‌ செய‌ற்கைக்கோள்க‌ள் இருந்தாலும் உள‌வு பார்க்க‌வும், ராணுவ‌ நோக்கிலும், வ‌ர்த்த‌க‌ ந‌ல‌னுக்காக‌வும் அனுப்ப‌ப்ப‌ட்ட‌ கோள்க‌ளே ஏராள‌ம். இவைக‌ள் நிலையாக‌ த‌க‌வ‌ல் த‌ருப‌வை அல்ல‌. ஒருசில‌ ஆண்டுக‌ளில் அவ‌ற்றின் ப‌ய‌ன்பாடு முடிந்துவிடும். பின்ன‌ர் அவை குப்பையாகி வீணே சுற்றிக்கொண்டிருக்கும். இப்ப‌டியான‌ குப்பைக‌ள் விண்ணில் ஏராள‌ம் ஏராள‌ம். அப்ப‌டிய‌ல்லாம‌ல் நில‌வை நிர‌ந்த‌ர‌மான‌ செய‌ற்கைக்கோளாக‌ மாற்ற‌ முடியுமா? என்ற‌ ஆய்வும் ச‌ந்திராய‌னில் உண்டு.

இந்த‌ நோக்க‌ங்க‌ளில் எவை ம‌க்க‌ளுக்கு ப‌ய‌ன்ப‌ட‌க்கூடிய‌து? கால‌நிலை, சூழ‌ல் மாற்ற‌ங்க‌ளை அறிந்து கொள்வ‌து ம‌க்க‌ளுக்கு ப‌ய‌னுள்ள‌து இல்லையா என‌ சில‌ர் கேட்க‌க்கூடும். இன்தோனேசியாவின் க‌ட‌லுக்குள் நில‌ந‌டுக்க‌ம் ஏற்ப‌ட்ட‌தை நான்கு ம‌ணி நேர‌த்திற்கு முன்பே அறிந்திருந்தும் ஓங்க‌லை(சுனாமி) ஏற்ப‌டும் என‌ க‌ண்ட‌றிந்து ம‌க்க‌ளை காக்க‌ ப‌ய‌ன்ப‌ட‌வில்லையே இந்த‌ செய‌ற்கை கோள்க‌ள். 45 ஆண்டுக‌ளுக்கு முன்பே நில‌வுக்கு ஆள‌னுப்பும் வ‌ல்ல‌மை பெற்றிருந்த‌ அமெரிக்காவிற்கு, காத்ரினா சூறாவ‌ளி நியூஆர்லிய‌ன்ஸை சூறையாடிய‌ போது ம‌க்க‌ளை காக்க‌ ப‌ய‌ன்ப‌டுத்த‌ முடிய‌வில்லையே. அனால் நாடுக‌ளை உள‌வு பார்க்க‌ செய‌ற்கைக்கோள்க‌ள் ப‌ய‌ன்ப‌டுத்த‌ப்ப‌டுகின்ற‌ன‌. அப்பையானால் விஞ்ஞான‌ முன்னேற்ற‌மே தேவையில்லையா? அப்ப‌டிய‌ல்ல‌, அறிவு வ‌ள‌ர்ச்சியும் அறிவிய‌ல் முன்னேற்ற‌மும் ம‌க்க‌ளுக்காக‌ ப‌ய‌ன்ப‌டுவ‌தாக‌ இருக்க‌வேண்டும். அறிவிய‌ல் வ‌ள‌ர்ச்சி த‌னிம‌னித‌ ஆதாய‌ங்க‌ளுக்காக‌ ப‌ய‌ன்ப‌டுவ‌து த‌டுக்க‌ப்ப‌ட‌வேண்டும். அந்த‌ நோக்கில் இந்தியா நில‌வுக்கு விண்க‌ல‌ம் அனுப்பிய‌து ம‌க்க‌ளுக்கான‌ ப‌ய‌ன் பாட்டிற்காக‌ அல்ல‌. பிராந்திய‌ வ‌ல்ல‌ர‌சு எனும் க‌ன‌வுக்கு துணை செய்வ‌த‌ற்கே. வ‌ர‌ட்டு கௌர‌வ‌த்திற்கே. இதில் பெருமைப்ப‌ட‌ ஒன்றுமில்லை. மெய்யாக‌வே அறிவிய‌ல் ஆய்வுக‌ள் ம‌க்க‌ளுக்காக‌ ப‌ய‌ன்ப‌டும் நோக்கில் ந‌க‌ரும் போது நிச்ச‌ய‌ம் பெருமைப்ப‌டுவோம். அத‌ற்காக‌ உழைப்போம்.

%d bloggers like this: