போலிகளையும் காலிகளையும் புறந்தள்ளி தொடர்கிறது தில்லை போராட்டம்.

     தில்லைக் கோவிலை அரசு தன்னுடைய பொறுப்பில் எடுத்துக்கொள்ள வைக்கப்பட்டதிலிருந்து அங்கிருந்து விரட்டப்பட்ட தீட்சிதக் கும்பலைப்போலவே வேறுசில கும்பல்களும் வயிற்றில் அமிலமேறிக் கொதிக்கிறார்கள்.ஆனால் அதை தீட்சித ரவுடிகள் போல் வெளிப்படுத்த முடியாமல் சுவரொட்டிகளில் உமிழ்ந்திருக்கிறார்கள் அரசுக்கு நன்றி என்று.     

    
தில்லை நடராஜரின் காதில் தமிழ் ஓதியதும் ஆலயத்திலிருந்து அயோக்கியர்களை வெளியேற்றியதும் வக்கீல் வைத்து வாதாடிப் பெற்ற வெற்றி மட்டுமல்ல, மக்களை ஒன்றினைத்து போராடிப்பெற்ற வெற்றி. எத்தனை தடைகள்? எத்தனை குள்ள நரித்தனங்கள். அத்தனையையும் மக்களின் துணையால் துடைத்தெறிந்து பெற்ற வெற்றி. முதல் கூட்டத்தில் புலி வேசம் கட்டி உருமிய சிபிஎம் போலிகள் பின் பார்ப்பான் என்று சொல்லாதிர்கள் என்று பூனையாகி ஒதுங்கினர். போராட்டத்திற்கு வராத தேசியவாதிகள் வக்கில் ராஜீவை நாங்கள் தான் அறிமுகப்படுத்தி வைத்தோம் என்று விலகி நின்று துண்டு போடுகிறார்கள். இவர்களின் கூத்துகளைக்கண்ட சிதம்பர மக்களோ இரண்டாம் வாயால் சிரித்துக்கொண்டிருக்கிறார்கள். ஏனென்றால் முதியவர் ஆறுமுகச்சாமியை அடித்து வீதியில் தள்ளியதையும் கண்டார்கள், யானையில் வந்து தமிழ் பாடியதையும் கண்டார்கள். இந்த இரண்டுக்கும் இடையேயான மாற்றம் சும்மா வந்து விடவில்லை என்பதையும் கண்டார்கள். இதை பொறுக்கமாட்டாமல் தான் பார்ப்பனியத்தில் ஊறித்திழைத்த ஊடகங்கள் புரட்சிகர அமைப்புகளை அவர்களின் போராட்டங்களை இருட்டடிப்பு செய்கின்றன. இரவில் நடை சாத்தப்பட்டப் பிறகு கோயிலின் பிரகாரங்களில் மடைமாற்றிய சல்லாபங்களை தலையங்கமாய் தீட்டாத நாளிதழ்கள் கோயிலை அரசு எடுத்துக்கொண்டதும் தலையங்கம் தீட்டுகின்றன. ஆத்தீகக் கோயிலுக்குள் நாத்தீகச் சதி என்று அலறுகின்றன. கள்வெறி ஆட்டங்களையும் காமக்களியாட்டங்களையும்; சுரண்டியும் திருடியும் வயிறு பெருக்கிய கொட்டத்தை சுற்றியிருந்த மடங்களும் ஆத்திகர்களும் ஏன் கேட்கவில்லை? கடலுக்குள் பயனற்றுக் கிடக்கும் மணல்திட்டை தொட்டபோது புண்பட்ட இந்துக்களின் மனம் கோயிலுக்குள் ஒழுக்கக் கேட்டின் எல்லையையே தொட்டபோது ஏன் புண்படவில்லை? ஏனென்றால் அது ஆத்தீகப் புண்ணல்ல. அரசியல் புண். இந்தப் புண்ணுக்கு நாத்திகர்களான புரட்சிகர இயக்கங்களிடம் தான் மருந்து இருக்கிறது.     

     அன்று மக்கள் முன் அறிவிக்கப்பட்ட இலக்குகள் இன்னும் மீதமிருக்கிறது. நந்தன் நுழைந்த தெற்குச் சுவர் இன்னும் மீதமிருக்கிறது. இது ஆன்மீகமல்ல, தீண்டாமை. இந்த சாதி வெறியை தீண்டாமையை, அரசியல் போலிகளின் கபட நாடகங்களை திரைகிழிப்பது அவசியம். மொட்டை சோ முதல் முட்டை சு.சாமி வரை கோவிலை அரசிடமிருந்து பிடுங்கப் போராடும் இதே கும்பல் தான் சுகாதாரம் முதல் கல்வி வரை மக்களின் அடிப்படைத் தேவைகளுக்கான துறைகளைனைத்தையும் அரசிடமிருந்து பிடுங்கப் போராடுகிறது. இந்த மக்கள் விரோதக் கும்பலை விரட்டியடிப்பதும் தீண்டாமையை பக்தியாக காட்டும் ரவுடிக் கும்பலை விரட்டியடிப்பதும் வேறு வேறானதல்ல. அந்த திசை வழியில் தில்லையில் தொடர்கிறது போராட்டம். பிப்ரவரி 21ம் தேதியில் நடைபெறும் பேரணியும் பொதுக்கூட்டமும் இதை விரிவான தளத்தில் உங்களிடம் எடுத்து வைக்கும்.  

 

பேரணி மற்றும் பொதுக்கூட்டம்

நாள்:சனிக்கிழமை பிப்ரவரி 21, சனிக்கிழமை

பேரணி துவங்கும் இடம் காந்தி சிலை அருகி்ல்

பொதுக்கூட்ட இடம் : பெரியார் சிலை,

சிதம்பரம்

வென்றது தில்லைச் சமர்; வீழ்ந்தது தீட்சிதத் திமிர்

தில்லையில் குடிகொண்டிருக்கும் நடராஜர் பார்க்கும் கண்ணுள்ளவராக இருந்திருந்தால் கோவிலுக்குள்ளேயே தீட்சிதர்கள், செய்யும் கொடூரங்களையும் காமக்களியாட்டங்களையும் கண்டு கண்ணீர் வடிப்பதை பக்தர்கள் காண நேர்ந்திருக்கும். சிதம்பரம் நகரின் முன்னாள் ஊராட்சிமன்ற தலைவர் இளங்கோ பெயர் குறிப்பிட்டு தீட்சிதர்கள் நடத்திய கொலை கொள்ளை கொழுப்பெடுத்த விளையாட்டுக்களை புகார் மனுவாக முதல்வர்க்கு அனுப்பியிருக்கிறார். ஆயிரக்கணக்கான ஏக்கர் நிலங்களையும் தங்கம் வேய்ந்த கூரைகளையும் சொத்தாகக் கொண்ட தில்லை நடராஜர் கோயிலையும் உண்டியல் வைக்காமல் பக்தர்களிடம் வசூலித்த பணம் நகைகளையும் பல்லாண்டு காலமாக ஆண்டு அனுபவித்து வந்தனர் தீட்சித பார்ப்பனர்கள். கடவுளையே முகம் சுழிக்கச்செய்யும் இந்த கொட்டங்களை அடக்குவதற்கு நாத்திகர்கள் வரவேண்டியிருந்தது. தேவாரத்திருவாசகம் பாடி மூடிக்கிடந்த கதவை திறந்ததாக நம்பப்படும் கோவிலில் தேவாரத்திருவாசகங்களை பாட அனுமதி மறுக்கப்பட்டது. அப்படி ஒரு முயற்சியில் அடித்து விரட்டப்பட்ட ஆறுமுகச்சாமி என்ற சிவனடியார் வழியாக புரட்சிகர கம்னியூஸ்டுகளில் கைகளுக்கு அந்தப்பிரச்சனை வந்தது முதல் தொடங்கியது போராட்டம். தில்லை மக்களையும், பக்தர்களையும் இணைத்துக்கொண்டு நடந்த அந்த தொடர் போராட்டம் இறுதியில் தீட்சிதர்கள் தமிழுக்கு இடமில்லை என்று யாரை அடித்து விரட்டினார்களோ அந்த ஆறுமுகச்சாமி தீட்சிதர்கள் முன்னால் யானையில் அழைத்துவரப்பட்டு தமிழில் பாடவைக்கப்பட்டார். இதைச் சாதிப்ப‌த‌ற்கு க‌டும் போராட்ட‌ங்க‌ளை ந‌ட‌த்த‌வேண்டியிருந்த‌து.கொடும் ந‌ரித்த‌ன‌ங்க‌ளையும் குயுக்திகளையும் எதிர் கொள்ள‌ வேண்டியிருந்த‌து. ஆனாலும் அதோடு முடிந்துவிட‌வில்லை. தொட‌ர்ந்தது, தொட‌ர்கிற‌து.

க‌ருவ‌றைக்குள் நுழைய‌ முன்ற‌ ந‌ந்த‌னை எரித்துக் கொன்றுவிட்டு ஜோதியில் க‌ல‌ந்துவிட்ட‌தாக‌ க‌தை க‌ட்டி அதையே புராண‌மாகச் சொல்லி ப‌க்த‌ர்க‌ளை ஏமாற்றும் தீட்சித‌ர்க‌ளின் கொட்ட‌த்தை அட‌க்கும் முய‌ற்சியில் அடுத்த‌க்க‌ட்ட‌ வெற்றியாக‌ அமைந்த‌துதான் க‌ட‌ந்த‌ திங்க‌ள‌ன்று வ‌ழ‌ங்க‌ப்ப‌ட்ட‌ தீர்ப்பு. அத‌ன்ப‌டி இன்னும் ஒருவார‌ கால‌த்திற்குள் சித‌ம்ப‌ர‌ம் ந‌ட‌ராஜ‌ர் கோவிலை நிர்வகிக்க‌ அலுவ‌ல‌ர் ஒருவ‌ர் நிய‌மிக்க‌ப்ப‌டுவ‌த‌ன் மூல‌ம் இதுவ‌ரை தீட்சித‌ர்க‌ளின் கையிலிருந்த‌ கோவில் அர‌சின் கைக‌ளுக்கு போகிற‌து. தீர்ப்பு வ‌ந்த‌ அன்று மாலையே தில்லை ந‌ட‌ராஜ‌ர் கோவிலுக்கான‌ இந்து அற‌நிலைய‌த்துறை நிர்வாக‌ அதிகாரியாக‌ கிருஷ்ண‌குமார் என்ப‌வ‌ர் நிய‌மிக்க‌ப்ப‌ட்டார். அன்று‌ அற‌நிலைய‌த்துறையின் உத்த‌ர‌வுட‌னும் போலிஸ் காவ‌லுட‌னும் த‌மிழ் பாட‌ வ‌ந்த‌ ஆறுமுக‌ச்சாமியை த‌டுக்க‌ கும்ப‌லாக‌ திர‌ண்டு வாச‌லை அடைத்து அடாவ‌டித்த‌ன‌ம் செய்த‌ தீட்சித‌ ச‌ண்டிய‌ர்க‌ள், இன்று அதிகாரியின் நியமன‌ உத்த‌ர‌வை அதிக‌ம் எதிர்ப்புக்காட்டாம‌ல் பெற்றுக்கொண்டிருப்ப‌து அவ‌ர்க‌ள் ஆடிப் போயிருக்கிறார்க‌ள் என்ப‌த‌ற்கான‌ சான்று.

ஆனாலும் இது இறுதி வெற்றியல்ல. சிதம்பரம் கோவில் மட்டுமே இலக்கும் அல்ல. காஞ்சி ஜெயேந்திரனின் ஆபாச லீலைகளும், கேரள கண்டரரு மோகனருவின் அந்தரங்க லீலைகளும் அம்பலப்பட்டு நாறியதைப்போல் பெருங்கோவில்களின் நெடுங்கதவுகளுக்குப்பின்னால் புதைந்து கிடக்கும் அசிங்கங்களும் தீண்டாமைக்கொடூரங்களும், கொலைகளும் அம்பலப்படுத்தப்படவேண்டும். ஒண்டக்குடிசையின்றி கோடிக்கணக்கானோர் சாலையோரம் குடியிருக்கும் நாட்டில் கோவில்களுக்கு ஏக்கர்கணக்கில் நிலமும், பல கோடிக்கணக்கில் சொத்தும் இருப்பதும்; குந்துமணித்தங்கமில்லாமல் திருமணமாகமுடியாமல் பெண்கள் முதிர்கன்னிகளாய் உலாவரும் நாட்டில் கோவிலின் கூரை தங்கத்தால் வேயப்பட்டிருப்பதும் தன்மானமுள்ள மக்கள் முன் விடப்பட்டுள்ள சவால். அந்த சவால்கள் நேர்செய்யப்படுவதுவரை போராட்டங்கள் தொடரும். ஓயாது.

%d bloggers like this: