500, 1000: இனி செய்ய வேண்டியது என்ன?

modi-cartoon

மக்களின் வாழ்வு தலைகுப்புற புரட்டிப் போட்டது போலிருக்கிறது. எதிர்ப்படும் அனைத்து முகங்களிலும் ஏனைய அனைத்து உணர்ச்சிக் குறிகளையும் விட என்ன செய்வது எனும் கவலையே மேலோங்கித் தெரிகிறது. ரூபாய்தாள்கள் செல்லாது என்ற அறிவிப்புக்குப் பிறகு எல்லாம் முடங்கிக் கிடக்கிறது. மக்களின் அவலங்கள் அன்றாடச் செய்திகளாய் சுருங்கி, கடந்து போய்க் கொண்டிருக்கிறது.

ஒவ்வொரு நாளும் இன்று என்ன அறிவிப்பு புதிதாய் வரப்போகிறது? அதைக் கொண்டு எப்படி தங்களின் அடிவருடித்தனத்தை புதுப்பித்துக் கொள்வது என்று ஊடகங்கள் அலைகின்றன. பொதுவாக ஊடகங்களும் காவிக் கூடாரங்களும் ரூபாய்த் தாள்கள் செல்லாததாக்கிய நடவடிக்கையை கருப்புப் பணத்துக்கு எதிரான நடவடிக்கை என்றே சாதிக்கின்றன.

இந்த நடவடிக்கையை எதிர்ப்பவர்கள் எல்லோரும் இது எப்படி கருப்புப் பணத்தை ஒழிக்காது என்பதை பலவிதமான விளக்கங்களுடனும் தரவுகளுடனும் எடுத்து வைத்து வாதிட்டுக் கொண்டிருக்கிறார்கள். ஆதரிப்பவர்களோ அவர்களின் விளக்கங்களுக்கு மறுப்பளிக்காமல், கேள்விகளுக்கு பதிலளிக்காமல், கருப்புப் பணத்தை ஆதரிக்கிறார்கள், அதனால் தான் இந்த நடவடிக்கையை எதிர்க்கிறார்கள் என்று மடைமாற்றுவதைத் தவிர வேறெதையும் சொல்ல மறுக்கிறார்கள்.

பாசிச மோடியோ, இரண்டு நாட்களில் நிலமை சீராகி விடும், இரண்டு வாரங்களில் சீராகி விடும் என்று தற்போது ஐம்பது நாட்கள் பொறுத்துக் கொள்ளுங்கள் என்கிறார். டேஷ் பக்தாக்களின் இராணுவ வீரன் கதையை விட மோடியின் ஐம்பது நாள் கதை கேலிக் கூத்தாகிக் கொண்டிருக்கிறது. அரசின் ஒவ்வொரு அறிவிப்பையும் வரும் செய்திகள் குப்பையாக்கிக் கொண்டிருக்கின்றன.

நிலமை விரைந்து சீரடையும் எனும் அறிவிப்பை, புழக்கத்திலிருந்து நீக்கப்பட்ட ரூபாய்த் தாள்களின் மொத்த மதிப்பை அச்சடித்து முடிக்க ஏழு மாதங்கள் வரை ஆகும் என்று இந்தியாவின் அச்சடிப்புத் திறனுடன் ஒப்பிட்டு பொருளாதார வல்லுனர்கள் கூறுகிறார்கள். தவிரவும் அச்சடிப்பு குளறுபடிகளால் 500 ரூபாய்த் தாள்கள் அச்சடிப்பதை தற்காலிகமாக நிறுத்தி வைத்திருப்பதாக அரசு மறு அறிவிப்பு செய்திருக்கிறது. மட்டுமல்லாது, முன்னர் ரூபாய்த் தாள்கள் அச்சடித்துக் கொண்டிருந்த சில நிறுவனங்கள் முறைகேடுகளில் ஈடுபடுகின்றன – கள்ளநோட்டுகளை அச்சடிக்கின்றன – என்ற குற்றச்சட்டின் பேரில் நிறுத்தி வைக்கப்பட்டிருந்தன. தற்போது அந்த நிறுவனங்களுக்கெல்லாம் மீண்டும் அச்சடிக்க வாய்ப்பு தரப்பட்டிருப்பதாக செய்திகள் கூறுகின்றன. இவைகளெல்லாம் நிலமை விரைந்து சீரடையாது எனும் தவிர்க்க முடியாத உண்மையை அரசு ஏற்றுக் கொண்டிருப்பதற்கான சான்றுகள்.

நாளுக்கு நாள் வங்கிகளில் கூட்டம் அலை மோதிக் கொண்டிருப்பதை அடுத்து, மக்கள் கோபத்தை தணிப்பதற்காக, இனி வங்கிகளில் உள்ள சேமிப்புப் பணத்தை வரம்பின்றி எவ்வளவு வேண்டுமானாலும் எடுத்துக் கொள்ளலாம் என அறிவித்தது அரசு. ஆனால் வங்கிகளில் பணமில்லை, மக்களுக்கும் வங்கி அலுவலர்களுக்கும் இடையே மோதல்கள் ஏற்படுகின்றன.

பா..க வினரிடமே கட்டுகட்டாக புதிய ரூபாய்த் தாள்கள் பிடிபட்டதும் ஆடம்பரமாய் 10 லட்ச ரூபாய் கோட்டு போட்டது விவாதமானவுடன் ஏலம் விட்டு சமாளித்ததைப் போல் நவம்பர் 8 லிருந்து டிசம்பர் 30 வரை பா..க வினர் தங்கள் கணக்குகளை கட்சித் தலைமையிடம் சமர்ப்பிக்க வேண்டும் என்று அறிவித்தார்கள். ஆனால் அமித்ஷாவே நவம்பர் 8 ம்தேதி 35 சதவீத கமிஷனுக்கு கோடி கோடியாக பணத்தை மாற்றிக் கொடுத்தார் என்றும், மோடியின் நண்பர்கள், கார்ப்பரேட்டுகள் பலருக்கு செல்லாது நடவடிக்கை முன்பே தெரியும் என்றும் மோடிக்கு வலது கரமாக இருந்த யாதின் ஓசா பகிரங்கமாக குற்றம் சாட்டினார். இதுவரை எந்த யோக்கியனும் பதில் கூறவில்லை.

நவம்பர் 8ன் வீரியம் படிப்படியாக இறங்கி, கருப்புப்பணம் என வீர வசனம் பேசியவர்கள், பின்னர் கள்ளப் பணம் தான் குறிக்கோள் என்றார்கள். இப்போது அதுவும் இறங்கி பணமற்ற பொருளாதாரம் தான் எங்கள் நோக்கம் என்று மடிகிறார்கள். வங்கிகளில் மாற்றி, அட்டைகளை உரசினால் ஊழல் உயிர் வாழாது என்று சத்தியம் செய்தார்கள். அதுவும் ஆதாரங்களுடன் மறுக்கப்பட்டு விட்டது.

முட்டுச் சந்தில் வசமாக மாட்டிக் கொண்ட திருடன் போல் விழி பிதுங்கி, கூனிக் குறுகி நிற்க வேண்டிய மோடி, திமிருடன் அடுத்த அறிவிப்பை வாசிக்க கையில் கார்ப்பரேட்டுகள் எழுதிக் கொடுத்த தாளுடன் தயாராக இருக்கிறார் என்றால், அதன் பொருள் இதை கருப்புப்பண எதிர்ப்பு நடவடிக்கை என இன்னும் நம்பும் அப்பாவிகள் இருக்கிறார்கள் என்பது தான்.

ஆனால் இதில் பலியிடப்பட்டுக் கொண்டிருப்பது நம்முடைய வாழ்வாதாரங்கள் தான். குறைந்த முதலீட்டுடன் சொந்தத் தொழில் செய்து கொண்டிருப்பவர்கள் தொடங்கி, அன்றாடம் கூலி வேலை செய்து பிழைப்பவர்கள் வரை அனைவரும் அடுத்து என்ன செய்வது என தெரியாமல் கவலை படிந்து நிற்கிறார்கள். மாதச் சம்பளம் வாங்கும் அரசு, தனியார் ஊழியர்கள் கூட முதன்முறையாக தங்களைச் சுற்றி ஏதோ நடக்கிறதோ என்று சிந்திக்கத் தொடங்கியிருக்கிறார்கள்.

நாட்டுக்காக இதையெல்லாம் தாங்கிக் கொள்ளுங்கள் என்கிறார்கள். நாடு என்பது என்ன? வெறுமனே எல்லைகளும், எல்லைகளுக்கு நடுவே இருக்கும் நிலமும் தானா? அதில் வசிக்கும் மக்கள் இல்லையா? நாட்டுக்காக தாங்கிக் கொள்ளலாம் தான். எதன் பொருட்டு தாங்கிக் கொள்வது. மக்களை ஏமாற்றுவதையே முழுமூச்சாய்க் கொண்டு செயல்பட்டுக் கொண்டிருக்கும் இந்த அரசின் பொருட்டா? எதற்காக பொறுத்துக் கொள்ள வேண்டும்?

உணவு மானியம் வெட்டு,

ரேசன் கடைகள் மூடல்,

கல்வி தனியார்மயம்,

அரசு பள்ளிகள் சீரழிப்பு,

கல்விக் கடனுக்கு கடும் வட்டி,

கல்விக் கடனை வசூலிக்க ரிலையன்ஸுக்கு அனுமதி,

மின் கட்டண உயர்வு,

பேருந்து கட்டண உயர்வு,

இரயில் கட்டண உயர்வு,

அத்தியாவசியப் பொருட்கள் அத்தனையும் விலை உயர்வு,

சந்தை விலையை விட மூன்று மடங்கு விலையில் பெட்ரோல், டீசல்,

நீராதாரங்கள் அனைத்தும் பராமரிப்பின்றி சாக்கடையாக்கியது,

எல்லாப் பொருட்களிலும் மறைமுக வரி,

கல்வி வரி,

சேவை வரி,

விற்பனை வரி,

குறைந்தபட்ச கோரிக்கைக்காக போராடினால் கூட காவல்துறை தடியடி,

கார்ப்பரேட்டுகளுக்கு ஆண்டொன்றுக்கு 5 லட்சம் கோடி வரிச்சலுகை,

7.5 லட்சம் கோடி வாராக்கடன் தள்ளுபடி,

இயற்கை வளங்கள் அனைத்தையும் கொள்ளையடிக்க ஏற்பாடு

இன்னும் எத்தனையோ விதங்களில் மக்களை வதைக்கும் இந்த அரசின், கார்ப்பரேட்டுகள் நலம் பேணும் நடவடிக்கைகளுக்காக மக்கள் எதற்காக தங்கள் வாழ்வாதாரங்களை இழந்து தாங்கிக் கொள்ள வேண்டும்?

50 நாட்கள் மட்டும் பொறுத்துக் கொள்ளுங்கள் என்கிறார்கள். 50 நாட்கள் கழித்து .. .. ..?

விலைவாசி இறங்கிவிடுமா?

இலவசக் கல்வி கிடைக்குமா?

உயர்கல்விக் கொள்ளைகள் நிறுத்தப்படுமா?

வேலை வாய்ப்புகள் பெருகி விடுமா?

கருப்புப் பணமோ, கள்ளப் பணமோ 50 நாட்களுக்குப் பிறகு இருக்காதா?

நீர்வளம் காக்கப்படுமா?

வனம் பேணப்படுமா?

சிறுவணிகம் பாதுகாக்கப்படுமா?

விவசாயம் செழிக்க நடவடிக்கை எடுக்கப்படுமா?

பங்குச் சந்தை, ஊக வணிக சூதாட்டங்கள் நிறுத்தப்படுமா?

சுகாதாரம் உறுதி செய்யப்படுமா?

காற்று, நீர் மாசுபாடுகள் அகற்றப்படுமா?

தீண்டாமை ஒழிக்கப்படுமா?

மனித மலத்தை மனிதனே அள்ளும் அவலம் நீக்கப்படுமா?

என்ன செய்யப்படும் இந்த 50 நாட்களுக்குப் பிறகு? எவன் உறுதிமொழி கொடுப்பான் இவைகளுக்கு?

எதுவும் நடைபெறப் போவதில்லை. வங்கிகளில் நாம் சிறுகச் சிறுக போட்டு சேமித்து வைத்திருந்த பணத்தை கொள்ளையடித்து முடித்து விட்டார்கள். இனி புதிதாக கடன் எனும் பெயரில் கொள்ளையடித்து நாட்டை சுடுகாடாக்க; நம்மிடமிருக்கும் பரிவர்த்தனைப் பணத்தை வங்கிகளில் செலுத்த வைக்கத் தான் கருப்புப் பண எதிர்ப்பு நாடகங்கள். சில்லரை வர்த்தகங்களில் லட்சக்கணக்கான கோடிகள் புரள்வதால் கார்ப்பரேட்டுகள் அதை வழித்தெடுக்க வேண்டும் என்பதற்காகத் தான் இந்த கள்ளப் பண நாடகங்கள்.

அமெரிக்க சப் பிரைம் பொருளாதார நெருக்கடியைத் தொடர்ந்து பொருளாதார பலம் வாய்ந்த பல நாடுகள் சீட்டுக் கட்டு கோபுரம் போல் சரிந்து விழுந்தன. அதற்குக் காரணம் அங்கு பரிவர்த்தனை அனைத்தும் வங்கிகளில் நடந்தது தான். அந்த நிலையில் இந்தியப் பொருளாதாரம் பெரும் சரிவைத் தவிர்த்து வீழாமல் நின்றதற்குக் காரணம், இங்கு பெரும்பாலான பரிவர்த்தனைகள் ரொக்கமாக நடைபெற்றது தான்.

நம்மைக் காப்பதும் நாட்டைக் காப்பதும் வேறு வேறு அல்ல. இந்த கொள்ளைக் கும்பல்களிடம் இருந்து நாட்டையும் நம்மையும் பாதுகாக்க வேண்டுமென்றால் அதற்கு இப்போதைக்கு சாத்தியமுள்ள ஒரே வழி ரொக்கப் பொருளாதாரத்தை தக்க வைத்துப் பாதுகாப்பது தான். வங்கிகளுக்குச் செல்லுங்கள், நீங்கள் உழைத்து சிறுகச் சிறுகச் சேர்த்த பணத்தை உங்களுக்கு தேவையான அளவு எடுங்கள். மறுத்தால் அப்போதே கணக்கை முடிப்பதாகக் கூறி மொத்தப் பணத்தையும் திரும்பக் கேளுங்கள். இது ஒரு இயக்கமாக மாறினால் அது அரசை நெருக்கடிக்கு உள்ளாக்கும், நாம் ஏமாளிகள் அல்ல என்பதை நிரூபிக்கும். நம்மை மட்டுமல்ல, நம் நாட்டையும் காப்பாற்றும் வழி பிறக்கும்.

மின்னூலாக(PDF) தரவிறக்க‌

500, 1000 செல்லாது: மோடியை கழுவி ஊற்றிய மக்கள்

500-2000-2

நேற்று (08/11/2016) மாலையில் திடீரென 500, 1000 ரூபாய் நோட்டுகள் செல்லாது என்று மோடியால் அறிவிக்கப்பட்டது. இரவு 12 மணிக்குள் மாற்றாவிட்டால் வைத்திருக்கும் பணம் ஒன்றுமில்லாமல் காற்றில் கரைந்து விடுமோ எனும் பரிதவிப்பில் மக்கள் அலைந்ததை பார்க்கையில் கண்களில் கண்ணீர் வந்து விட்டது. தமிழில் இதுவரை செவியுற்றிருக்காத சொற்களை உருவாக்கி மக்கள் மோடியை அர்ச்சித்துக் கொண்டிருந்தார்கள்.

மக்களே! பதட்டம் வேண்டாம். ஓரிரு நாட்களில் வங்கிகள் இயங்க தொடங்கியதும் உங்கள் கையிலிருக்கும் பழைய 500, 1000 ரூபாய் தாள்களை வங்கியில் கொடுத்து அதற்கு ஈடான புதிய 500, 2000 ரூபாய்களை பெற்றுக் கொள்ளலாம். டிசம்பர் 31 வரை இவ்வாறு நீங்கள் மாற்றிக் கொள்ளலாம். வங்கிகள் இயங்கத் தொடங்கும் வரை தொடர் வண்டி நிலையம் போன்ற மத்திய அரசு நிலையங்களில் 500, 1000 களை மாற்றிக் கொள்ளலாம்.

120 கோடிக்கும் அதிகமான மக்கள் தொகை கொண்ட இந்த நாட்டில், கோடிக்கணக்கான மக்கள் வறுமைக் கோட்டுக்குக் கீழ் வாழ்ந்து வரும் இந்த நாட்டில், பெரும்பான்மையான மக்கள் அன்றாடங் காய்ச்சிகளாக வாழும் இந்த நாட்டில் ஒரு சில மணி நேர அவகாசத்தில் பெரு மதிப்பு கொண்ட ரூபாய் நோட்டுகள் செல்லாது அறிவித்தது முட்டாள்தனம், அயோக்கியத்தனம், அறுவெறுக்கத்தக்க திமிர்த்தனம். என்னடா பெரிய பொடலங்கா பொருளாதாரம்!

மக்கள் அடைந்த பதட்டத்தை சொற்களால் சொல்லிவிட முடியாது. 12 மணிவரை செல்லும் என்று சொன்னாலும் யாரும் வாங்கிக் கொள்ளத் தயாரில்லை. 12 மணிக்குப் பிறகு என்ன செய்வது எனும் பெருங்கவலை. இரண்டு ஐநூறு ரூபாய் நோட்டுகளை வைத்திருக்கும் ஒருவருக்கு அது வெறும் பண மதிப்பு மட்டுமல்ல, அன்றைய உழைப்பின் வலி, நாளைய உழைப்புக்கான உணவு. அதில் கேள்விக்குறியை போட எந்தக் கொம்பனுக்கு அதிகாரம் இருக்கிறது இங்கு? ரொட்டி இல்லையென்றால் என்ன? மக்கள் கோக் சாப்பிடட்டும் என்றாளாம் பிரெஞ்சு தேசத்து அரசி. அதற்கு ஈடான கொழுப்பெடுத்து வடியும் திமிர்த்தனம் இது.

இந்த அவசர நடவடிக்கைக்கு என்ன காரணம்? என்ன நோக்கத்தில் இப்படி அறிவிக்கப்பட்டிருக்கிறது? என்பது குறித்து இன்னும் பருண்மையாக அறிந்து கொள்ளவில்லை. தெரியவில்லை. என்றாலும், இவர்கள் எந்த ஆணியை பிடுங்கினாலும் அது தேவையில்லாத ஆணியாகத் தான் இருக்கும் என்பதில் மாற்றுக் கருத்து ஒன்றுமில்லை. இப்போதைக்கு கருப்புப் பணத்தை ஒழிக்க என்று காரணம் சொல்லியிருக்கிறார் மோடி.

சுவிஸ் வங்கிகளில் கொட்டிக் கிடக்கும் கருப்புப் பணத்தைக் கொண்டு வந்து ஆளுக்கு 15 லட்சம் போடுவோம் என்றார்கள், இதுவரை கிழித்தது என்ன? வங்கிகளில் பல்லாயிரம் கோடிக்கணக்கில் கடன் வாங்கிவிட்டு ஏப்பம் விட்டவர்களின் பெயர்களைக் கூட அறிவிக்கத் துப்பில்லாத அரசு, கருப்புப்பணத்தை ஒழிக்கப் போகிறோம், சிரமத்தை பொருத்துக் கொள்ளுங்கள் என்கிறது. கேப்பையில் நெய் வழிகிறது என்று இதைத்தான் சொல்வார்களோ.

கருப்பு பணம் யாரிடம் இருக்கிறது? பெரு முதலாளிகளின் வணிக நடவடிக்கைகள் அனைத்தும் கருப்புப் பணத்தாலேயே இயங்குகின்றன. ஆனால் அவை 500, 1000 ரூபாய் நோட்டுகளாக ஒருபோதும் இருப்பதில்லை. அவர்களிடம் குவிந்திருக்கும் கருப்புப் பணம் 500,1000 ரூபாய் நோட்டுகளாக இருக்கும் என நம்பினால், அதை விட பைத்தியக்காரத்தனம் வேறு இருக்க முடியாது. அவை அசையும் அசையாச் சொத்துகளாக, வெளிநாட்டு உள்நாட்டு முதலீடுகளாக, சுவிஸ் போன்ற வெளிநாட்டு வங்கிகளில் இருப்பாக இருக்கிறது. நாட்டில் இருக்கும் 90 விழுக்காடு கருப்புப் பணம் இந்த வடிவங்களில் தான் இருக்கிறது. 500, 1000 ரூபாய் நோட்டுகள் செல்லாது என அறிவித்திருப்பது இந்தக் கருப்புப் பணத்தை ஏதாவது செய்து விடுமா?

90 விழுக்காடு கருப்புப் பணத்தை வைத்திருப்பவர்களின் விளம்பரத் தூதுவராகத்தான் மோடி இருந்து கொண்டிருக்கிறார். குடிமக்களின் தனிப்பட்ட தகவல்களை யாருக்கும் வழங்க மாட்டோம் என்று கூறித்தான் ஆதார் அட்டை எடுக்க சட்டத்துக்கு அப்பாற்பட்டு நிர்ப்பந்தித்தார்கள். ஆனால் ஜியோ சிம் வாங்க கைரேகை வைத்ததும், நாம் சொன்ன ஆதார் அட்டை இலக்கம் சரியா தவறா என்று புகைப்படம் உள்ளிட்டு அனைத்து தகவல்களும் அவர்களின் கணிணியில் வந்து விழுகின்றதே. ஆதார் விபரங்களை ரிலையன்ஸுக்கு கொடுத்தது யார்? இப்போது இந்த 500, 1000 செல்லாது என்று அறிவித்திருப்பது முன்னமே அவர்களுக்கு தெரிந்திருக்காது என்று எந்த முட்டாளாவது நம்ப முடியுமா?

500, 1000 செல்லாது என அறிவித்திருக்கும் இந்த அறிவிப்பு மக்களைத் தான் கடுமையாக பாதித்திருக்கிறது. நாட்டில் முறைசார் தொழில், முறைசாரா தொழில் என தொழில் துறை இரண்டாக இருக்கிறது. முறைசார் தொழில் என்பது பெரிய நிறுவனங்கள் தொடங்கி அனைத்து கார்ப்பரேட் வணிக குழுமங்களும் அடங்கும். இவர்கள் யாரும் தங்களுடைய அன்றாட நடவடிக்கைகளுக்காக பணத்தை ரொக்கமாக வைத்திருக்க வேண்டிய அவசியமில்லை. முறைசாரா தொழில் என்பதில் காய்கறிக் கடை தொடங்கி சிறு குறு வணிகர்கள் ஊடாக மக்கள் தங்கள் அன்றாட நடவடிக்கைகளை சிக்கலின்றி செய்ய உதவும் அனைத்து வணிக நடவடிக்கைகளும் அடங்கும். இவர்கள் தங்கள் தினசரி நடவடிக்கைகளை, பணத்தை தங்கள் கையில் ரொக்கமாக வைத்திருத்தாலன்றி எதையும் நடத்த இயலாது. காய்கறி விற்கும் ஒரு வியாபாரி குறைந்தபட்சம் 25000 ரூபாய் கையில் வைத்திருந்தால் தான் காய்கறி வாங்கி அதை பிறருக்கும், மக்களுக்கும் வினியோகிக்க முடியும். அவர்கள் அதை 500, 1000 மாக இல்லாமல் 50, 100ராக வைத்திருப்பார்களா? இந்த செல்லாது அறிவிப்பால் காலையில் அவர்களின் கொள்முதலும், வினியோகமும் எப்படி நடக்கும்? கார்ப்பரேட் நிறுவனங்கள் இயங்குவதில் எந்தச் சிக்கலும் இருக்காது. ஆனால், சிறு குறு நிறுவனங்கள் அடுத்து வரும் இரண்டு மூன்று நாட்களுக்கு இயங்க முடியாமல் போகும். இது மக்களைத் தான் கடுமையாக பாதிக்கும். குறிப்பாக 50, 100ராக பணம் கையிருப்பில் வைத்திராத, அரிசி, காய்கறிகளை வீட்டில் வாங்கி சேமிக்காமல் அன்றாடம் வாங்கி பயன்படுத்தும் மக்களை பட்டினிக்குள் தள்ளும்.

ஓரிரு நாட்கள் கடந்து வங்கிகள் இயங்கத் தொடங்கியதும் மக்கள் அனைவரும் தங்கள் கைவசமுள்ள ரூபாய் நோட்டுகளை மாற்ற வங்கிகளில் சென்று குவிவார்கள். ஒரு நாளோ, இரண்டு நாளோ தங்கள் வேலைகளை விட்டு விட்டு வங்கிகளின் நீண்ட வரிசையில் சென்று காத்திருக்க வேண்டும். மக்கள் ஓரிரு நாட்கள் வேலையை அதன் ஊதியத்தை இழந்திருப்பது தான் மோடியின் இந்த செல்லாது அறிவிப்பினால் நேர்ந்த அவலம்.

இந்த செல்லாது நடவடிக்கை கருப்புப் பணத்தை ஒழிக்குமா? நிச்சயம் ஒழிக்காது. 90 விழுக்காடு கருப்புப் பணம் 500, 1000 ரூபாய் நோட்டுகளுக்கு அப்பாற்பட்டு இயங்கிக் கொண்டிருக்கிறது. அதை இந்த அறிவிப்பு நெருங்கக் கூட முடியாது. மீதமிருக்கும் 10 விழுக்காடு கருப்புப் பணத்தை மட்டுமே இந்த அறிவிப்பு பாதிக்கும். அதுவும் முழுமையாக இருக்காது.

வங்கிகள், நிதி நிறுவனங்களின் ஊழலுக்கே இது வழிவகுக்கும். பத்து லட்சம் கருப்புப் பணம் வைத்திருக்கும் ஒருவர் வங்கி அதிகாரிகளிடம் பேரம் பேசி ஒன்பது லட்சம் வெள்ளையாக வாங்கிக் கொள்வார். அந்த ஒரு லட்சம் வங்கி அதிகாரிக்கு. பகரமாக அந்த பத்து லட்சத்தை, 1000, 2000 மாக மாற்ற வரும் மக்களின் கணக்கில் சிறிது சிறிதாக அதிகரித்துக் காட்டி கணக்கில் நேர் செய்து விடுவார்.

ஆக, இந்த முட்டாள் தனமான அறிவிப்பின் ஒட்டு மொத்த பலன் என்ன? 90 விழுக்காடு கருப்புப் பணத்தை ஒன்றும் செய்ய முடியாது. 10 விழுக்காடு கருப்புப் பணம் மக்களின் கணக்கில் வெள்ளையாக்கப்படும். அதாவது, 10 விழுக்காடு கருப்புப் பணத்தை மக்கள் இரண்டு மூன்று நாட்கள் பட்டினி கிடந்து, தங்கள் வேலை வருமானத்தை இழந்து, தங்கள் சொந்தக் கணக்கில் வெள்ளையாக மாற்றிக் கொடுக்கிறார்கள். இதற்குப் பெயர் தான் கருப்புப் பண ஒழிப்பு நடவடிக்கையா?

இதில் முதன்மையான இன்னொரு அம்சமும் இருக்கிறது. மக்கள் தங்களிடம் இருக்கும் ரூபாய் நோட்டுகளை வங்கிகளில் மாற்றும் போது ஆதார் உள்ளிட்ட தங்கள் அடையாள அட்டைகளை காண்பித்து மாற்றிக் கொள்ள வேண்டும் என அறிவிக்கப்பட்டுள்ளது. ரூபாய் நோட்டுகள் செல்லாது என்று அறிவிக்கப்பட்டிருக்கும் இந்த நடவடிக்கையின் உள்ளார்ந்த கருத்து இதில் தான் புதைந்து கிடக்கிறது. கருப்புப் பணத்தில் உருவாகி, கருப்புப் பணத்தில் குளித்துக் கொண்டிருக்கும் கார்ப்பரேட் முதலாளிகளுக்கு குண்டி கழுவிக் கொண்டிருக்கும் இந்த அரசாங்கம் மக்களைப் பார்த்துச் சொல்கிறது உங்களிடம் இருக்கும் பணம் கருப்புப் பணம் இல்லை என்பதை நிரூபித்துக் கொள்ளுங்கள் என்று. இது பச்சை அயோக்கியத்தனம் இல்லையா?

ஆர்.எஸ்.எஸ், காவி நாய்களே! மோடியின் துணிச்சலான நடவடிக்கை என்று கூறிக் கொண்டு மக்கள் முன்னே சென்று விடாதீர்கள். அவர்கள் தங்கள் பிய்ந்து போன செருப்பால் உங்களை ஓட ஓட விரட்டுவார்கள்.

மின்னூலாக(PDF) தரவிறக்க‌

%d bloggers like this: